پاکستان ریلویز اچ دیانت، محنت اتے قومی جذبے نال فرض دی ادائیگی ویلھے دی اہم لوڑھ اے، محمد حنیف عباسی

اسلام آباد۔23 جولائی (اے پی پی) وفاقی وزیر ریلوے محمد حنیف عباسی آکھیے جو پاکستان ریلویز اچ دیانت، محنت اتے قومی جذبے نال فرضں دی ادائیگی ویلھے دی اہم لوڑھ اے، پاکستان ریلوے کوں جدید، فعال اتے عوام دوست ادارہ بݨاوݨ کیتے مربوط اتے نتیجہ خیز کوششاں ضروری ہن۔ اے ڳالھ انہاں تھیوݨ آلے اجلاس دی صدارت کریندے آکھی ۔ اجلاس اچ نویں اہداف،ساوݨ حکمت عملی اتے قومی جذبے توں سرشار اقدامات تے زور ݙیندے وفاقی وزیر آکھیا جو ساوݨ دے خطریں توں بچاوݨ کیتے سارے ریلوے پُل، پٹریاں اتے انفراسٹرکچر دا وختی معائنہ کیتا ونڄے اتے کہیں وی ممکنہ حادثے توں بچݨ کیتے پیشگی حفاظتی اقدامات یقینی بݨائے ونڄن۔ انہاں آکھیا جو مسافراں اتے عملے دی جان و مال دا تحفظ اساݙا پہلا قومی فرض اے، پاکستان ریلوے دی ترقی اتے عوامی خدمت اساݙا مشن اے، “صاف سُتھرا پنجاب” مہم دے تحت ریلوے سٹیشنز دی تزئین و آرائش جاری اے۔ انہاں آکھیا جو ریلوے سٹیشنز تے جدید صفائی نظام، ویسٹ مینجمنٹ اتے صفائی دا تسلسل یقینی بݨایا ویندا پئے۔ ٹکٹ دے بغیر سفر کرݨ آلیں دے خلاف پر زور مہم چلاوݨ دا اعلان کریندے انہاں آکھیا جو بغیر ٹکٹ سفر کرݨ آلا اتے کراوݨ آلا ݙوہیں جیل ویسن۔ ایں ضمن اچ انہاں مسافراں توں تعاون دی اپیل کریندے آکھیا جو ریلوے اساݙا قومی اثاثہ اے، ایں دی حفاظت اساݙی ذمے واری اے۔ اجلاس اچ سارے ڈی ایس صاحبان آن لائن شرکت کیتی اتے ریلوے نظام دی بہتری کیتے مربوط اقدامات دے عزم دا اظہار کیتا۔