خسارے اچ چلݨ آلے قومی اداریں دی نجکاری ملکی معیشت دی بہتری اتے ترقی کیتے ٻہوں ضروری اے، وزیراعظم شہباز شریف دا سرکاری ملکیت اداریں دی نجکاری دی پیشرفت متعلق جائزہ اجلاس نال خطاب

اسلام آباد۔23 جولائی (اے پی پی) وزیراعظم محمد شہباز شریف آکھیے جو خسارے اچ چلݨ آلے قومی اداریں دی نجکاری ملکی معیشت دی بہتری اتے ترقی کیتے ٻہوں ضروری اے، نجکاری دے عمل کوں مؤثر، جامع اتے مستعدی نال مکمل کرݨ حکومت دی پہلی ترجیح اے، منتخب اداریں دی نجکاری اچ سارے قانونی مرحلے اتے شفافیت دے تقاضے پورے کیتے ونڄن۔ اے ڳالھ انہاں سرکاری ملکیت اداریں دی نجکاری دی پیشرفت متعلق جائزہ اجلاس دی صدارت کریندے آکھی ۔ اجلاس اچ وفاقی وزیر پاور ڈویژن سردار اویس خان لغاری، وفاقی وزیر اقتصادی امور احد خان چیمہ، چیئرمین نجکاری کمیشن محمد علی، وزیر مملکت خزانہ و ریلوے بلال اظہر کیانی اتے ٻئے متعلقہ سرکاری افسران اتے اعلیٰ حکام شرکت کیتی۔ وزیراعظم آکھیا جو قومی اداریں دی ٻہوں قیمتی زمین تے ناجائز قبضہ کہیں صورت اچ قابل قبول کائںی، نجکاری دے مرحلیں اچ قومی اداریں دی ملکیت اچ ٻہوں قیمتی زمین دے تصفیے اچ ہر ممکن احتیاط ملحوظ خاطر رکھی ونڄے، مذکورہ اداریں دی مرحلہ وار نجکاری دے اہداف مارکیٹ دے معاشی ماحول دے موجب مقرر کیتے ونڄن تاں جو قومی خزانے کوں ممکنہ ضیان توں ہر صورت بچایا ونڄ سڳے ۔ انہاں آکھیا جو نجکاری دے مرحلیں اچ سرخ فیتے اتے غیر ضروری عناصر دا خاتمہ کرݨ کیتے نجکاری کمیشن کوں قانون موجب مکمل خودمختاری ݙتی ویسی، سارے فیصلیں تے مکمل اتے مؤثر انداز اچ عملدرآمد یقینی بݨایا ونڄے، نجکاری کمیشن اچ جاری کم دی پیشرفت دی باقاعدگی نال خود نگرانی کریساں، نجکاری دے مرحلیں اتے اداریں دی تشکیل نو اچ پیشہ ور ماہرین دی مشاورت اتے بین الاقوامی معیار کوں برقرار رکھیا ونڄے۔ وزیراعظم کوں 2024 اچ نجکاری لسٹ اچ شامل کیتے ڳئے اداریں دی نجکاری تے پیشرفت تے بریفنگ ݙتی ڳئی۔ وزیراعظم کوں ݙسیا ڳیا جو نجکاری کمیشن منتخب اداریں دی مرحلہ وار نجکاری اچ قانونی، مالیاتی اتے شعبہ جاتی تقاضیں کوں سامݨے رکھیندا پئے ، منتخب اداریں دی مرحلہ وار نجکاری کوں کابینہ توں منظور شدہ پروگرام دے تحت مقررہ وقت اچ مکمل کیتا ویسی، پی آئی اے، بجلی دی ترسیل کار کمپنیز (ڈسکوز) سودھے نجکاری دی لسٹ اچ شامل سارے اداریاں دی نجکاری کوں مقررہ معاشی، اداراجاتی اتے انتظامی اہداف موجب مکمل کیتا ویسی۔