او آئی سی ایں سال نبی پاکﷺ دا 1500ویں یوم ولادت خاص طور تے مناوݨ کیتے رکن ملکاں کوں اعلامیہ جاری کر ݙتا

اسلام آباد۔24 جولائی (اے پی پی) اسلامی تعاون تنظیم (او آئی سی) ایں سال نبی پاکﷺ دے 1500ویں یوم ولادت کوں خاص طور تے مناوݨ کیتے رکن ملکاں کوں اعلامیہ جاری کیتے جئیں دے تناظر اچ وزارت مذہبی امور 50ویں “قومی سیرت کانفرنس” کیتے تیاریاں دا آغاز کر ݙتے۔ وزارت مذہبی امور دے ترجمان “اے پی پی” نال خاص گالھ مہاڑ کریندیں ہوئیں آکھیا جو ربیع الاول 1447ھ اچ نبی پاکﷺ دے 1500ویں یوم ولادت دے موقع تے 50ویں قومی سیرت کانفرنس دا خاص طور تے انعقاد کیتا ویسی۔ ایں بارے او آئی سی رکن ملکاں کوں اعلامیہ بھیجے جئیں اچ آپﷺ دے 1500ویں یوم ولادت کوں خاص طور تے مناوݨ دا آکھیا ڳئے ۔ وزارت مذہبی امور ایں سال سیرت کانفرنس دا موضوع “سوشل میڈیا دے ذریعے تعلیم و تربیت: سیرت طیبہ دی روشنی اچ” رکھیے۔ ایں بارے کتب سیرت، کتب نعت اتے مقالات سیرت کیتے مقابلیاں دے انعقاد دا اعلان کیتے جئیں اچ پہلا، ݙوجھا اتے تریجھا نمبر آوݨ آلیاں کوں انعام ݙتے ویسن۔ وزارت مذہبی امور 50ویں قومی سیرت کانفرنس دے انعقاد کیتے مختلف کمیٹیاں ٻݨا ݙتن جو سارے انتظامات کوں حتمی شکل ݙیوݨ اچ مصروف ہن۔او آئی سی دے اعلامیہ اچ آکھیا ڳئے جو اسلامی ملکاں دے وزراء خارجہ دے ترکیہ استنبول اچ 21 اتے 22 جون 2025 کوں تھیوݨ آلے اجلاس اچ منظور تھیوݨ آلی قرارداد اچ آکھیا ڳئے جو رکن ملک ایں مبارک موقع تے ثقافتی، تعلیمی اتے علمی سرگرمیاں دا اہتمام کرن، قرارداد اچ رکن ملکاں توں درخواست کیتی ڳئی ہے جو او اسلام اتے سنت نبویﷺ دی درست تفہیم کوں فروغ ݙیوݨ کیتے میڈیا کمپین شروع کرن اتے نبی پاک ﷺ دی تعلیمات دی عکاسی کرݨ آلی مخیرانہ اتے انسانی سرگرمیاں کوں منظم کرن۔ او آئی سی رکن ملکاں توں درخواست کیتی اے جو ایں قرارداد دے تناظر اچ نبی پاک ﷺ دے 1500ویں یوم ولادت دے موقع تے امن، انصاف اتے رحمت بارے پیغمبر اسلام ﷺ دی تعلیمات اتے احادیث مبارکہ دی روشنی اچ بنی نوع انسان دے محافظ دے طور تے آپ ﷺ دی تعلیمات کوں اجاگر کرݨ کیتے خاص پروگراماں دے انعقاد بارے معلومات او آئی سی سیکرٹریٹ کوں فراہم کیتی ونجن۔ او آئی سی سیکرٹریٹ قرارداد دے نفاذ اچ تعاون کریسی۔