روس اچ مسافر طیارہ ڈھیہہ تے تباہ، سارے مسافر ہلاک

ماسکو۔24 جولائی (اے پی پی) روسی مسافر طیارہ خمیس کوں چین دی سرحد دے نیڑے آمور ریجن اچ منزل مقصود تے پڄݨ توں کجھ ویلھا پہلے ڈھیہہ تے تباہ تھی ڳیا جئیں اچ ایں سوار سارے مسافر ہلاک تھی ڳئے۔ روسی خبر رساں ادارے تاس ایمرجنسی حکام دے حوالہ نال ݙسیا جو مسافر طیارے اچ عملہ دے 6 ممبران اتے ݙو ٻالڑیاں سودھے 46 افراد سوار ہن جڈاں جو آمور ریجن دے گورنر واسیلی اورلوف آپݨے ٹیلی گرام چینل تے طیارے اچ سوار مسافراں دی تعداد 43 اتے عملے دے ممبران دی تعداد 6 ݙسائی اے۔ گورنر ٻیا ݙسیا جو مسافراں اچ پنڄ ٻال شامل ہن۔ تاس دے مطابق حادثے اچ طیارے اچ سوار سارے بندے ہلاک تھی ڳئے ۔ تاس دے مطابق روس دے علاقے سائبیریا دی فضائی کمپنی انگارہ ایئرلائن دا اے این۔24 طیارہ بلاگو ویشچنسک نامی مقام توں آمور ریجن اچ واقع ٹائنڈا ایئر پورٹ دے نیڑے پڄا ہا جو اونکوں ٻھاہ لگ ڳئی اتے اے ایئرپورٹ توں 16 کلومیٹر دے فاصلے تے ڈھیہہ ڳیا۔