کھنڈ دے ناجائز منافع خوراں کوں نشان عبرت بݨا ݙیسوں، وفاقی وزیر رانا تنویر حسین

اسلام آباد۔24 جولائی (اے پی پی) وفاقی وزیر نیشنل فوڈ سکیورٹی اینڈ ریسرچ رانا تنویر حسین آکھیے جو کھنڈ دے ناجائز منافع خوراں کوں نشان عبرت بݨا ݙیسوں، کھنڈ دی قیمت کنٹرول کرݨ کیتے سارے صوبائی چیف سیکرٹریز اتے ڈپٹی کمشنرز کوں ہدایات جاری کر ݙتیاں ڳئن۔ سرکاری خبر رساں ادارے “اے پی پی” نال ڳالھ مہاڑ کریندے انہاں آکھیا جو کھنڈ دے منافع خوراں دے ݙینھ ڳݨ ڳھدے ڳئن ۔ انہاں آکھیا جو ضلعی انتظامیہ کھنڈ دا ایکس مل ریٹ 161 روپے اتے ریٹیل ریٹ 173 روپے کھنڈ فی کلو کوں ہر حال اچ یقینی بݨاوے ۔ وفاقی وزیر مزید آکھیا جو کھنڈ دی وافر سپلائی کوں وی یقینی بݨایا ویندا پئے ۔ انہاں آکھیا جو غریب عوام دا استحصال کرݨ آلیں کیتے کوئی نرمی نہ ہوسی، انہاں دا تعلق کہیں وی سیاسی جماعت نال ہووے۔ رانا تنویر حسین آکھیا جو عوام دے مفاد دے خلاف کم کرݨ آلیں کوں ریاست اتے قانون دی طاقت دا سامݨا کرݨا پوسی ۔ انہاں آکھیا جو حکومت کمزور طبقے دے حقوق دے تحفظ کیتے آہنی دیوار وانڳوں کھڑی اے۔ انہاں آکھیا جو ناجائز منافع خوری اساݙے معاشرے دا ہک وݙا چیلنج بݨ چُکئے اتے موجودہ قیادت ہر طرح دے چیلنج نال نبݨݨ دی صلاحیت رکھیندی اے۔ انہاں آکھیا جو ملکی معیشت کوں تکڑا بݨاوݨ کیتے ساریاں صلاحیتاں استعملا اچ گھن آئیاں ویندیاں پئن اتے او ݙینھ پرے کائنی جݙاں پاکستان کوں ہر طرح دے مافیاز توں پاک کر تے تکھے ترقی کریندا ہویا ملک بݨا ݙتا ویسی۔