آسیان ملکاں دے نال تجارتی و سرمایہ کاری رابطیں کوں مزید مستحکم بݨاوݨ چاہندوں ، وفاقی وزیر رانا تنویر حسین

اسلام آباد۔24 جولائی (اے پی پی) وفاقی وزیر قومی غذائی تحفظ و تحقیق رانا تنویر حسین آکھیے جو پاکستان آسیان ملکاں دے نال گھاٹےتاریخی، ثقافتی اتے تزویراتی تعلقات رکھیندے اتے تجارتی و سرمایہ کاری دے رابطیں کوں مزید مستحکم بݨاوݨ چاہندوں ۔ ایف پی سی سی آئی دے زیر اہتمام “پاکستان اتے آسیان خطے وچال اقتصادی انضمام” دے موضوع تے ہک تعارفی سیشن نال خطاب کریندے انہاں اقتصادی رابطیں کوں مزید ودھارے تے زور ݙتا۔ ایں موقع تے آسیان ملکاں دے سفارتکاراں، اعلیٰ سرکاری افسراں، تاجر رہنماواں اتے مختلف شعبیں دے نمائندیں شرکت کیتی ۔وفاقی وزیر پاکستان اتے آسیان خطے وچال اقتصادی رابطیں کوں مزید تکڑا بݨاوݨ دی اہمیت تے زور ݙتا۔ انہاں ایف پی سی سی آئی دے متحرک صدر عاطف اکرام شیخ دی ایں ویلھے تے اتے دور اندیش نشست دے انعقاد تے تعریف کیتی۔ انہاں آکھیا جو آسیان جیڑھا ست سو ملین توں ودھ آبادی اتے ترائے ٹریلین ڈالر توں ودھ دے مشترکہ جی ڈی پی دا حامل اے، عالمی معیشت اچ ہک مؤثر بلاک دے طور تے ابھرئے، پاکستان آسیان ملکاں دے نال گھاٹےتاریخی، ثقافتی اتے تزویراتی تعلقات رکھیندے اتے ہݨ تجارتی و سرمایہ کاری دے رابطیں کوں مزید مستحکم بݨاوݨ چاہندے۔رانا تنویر حسین آکھیا جو سانجھے امکانات دے باوجود پاکستان اتے آسیان وچال تجارتی حجم اپݨی حقیقی صلاحیت توں کتھائیں گھٹ اے۔ انہاں تجارتی رکاوٹاں مکاوݨ ، برآمدات دے دائرہ کار کوں وسعت ݙیوݨ اتے ݙو طرفہ و کثیر جہتی سرمایہ کاری کوں ودھارے کیتے سانجھیاں کوششاں تے زور ݙتا۔ انہاں ٹیکسٹائل، زراعت، دواسازی، آئی ٹی اتے توانائی جیھے شعبیں کوں خاص طور تے اجاگر کیتا جتھاں سانجھے تعاون دے مثبت نتیجے برآمد تھی سڳدن۔انہاں ٹیکنالوجی دے تبادلے، ڈیجیٹل انٹرپرینیورشپ اتے ہنر مندی دی ترقی دے میدان اچ تعاون دی لوڑھ تے وی زور ݙتا اتے آکھیا جو پاکستان آسیان ملکاں دی جدت، پیشہ ورانہ تربیت اتے نوجواناں دی ترقی دے تجربیں توں فیدہ چا سڳدے۔ انہاں عوامی رابطیں، سیاحت، تعلیمی تبادلیں اتے ثقافتی شراکت داری دے ودھارے کیتے ویزا پالیسیاں اچ نرمی دی تجویز ݙتی۔ انہاں ایں ڳالھ تے زور ݙتا جو عوامی سطح تے تعلقات اعتماد سازی اتے دیرپا اشتراک کیتے کلیدی کردار ادا کریندن۔ انہاں خطے دے جغرافیائی ربط دی اہمیت کوں اجاگر کریندے آکھیا جو پاکستان سی پیک دے ذریعے وسط ایشیا اتے مشرق وسطیٰ کیتے گیٹ وے دا کردار ادا کر سڳدے جݙاں جو آسیان پاکستان کوں مشرقی ایشیا اتے بحرالکاہل دے خطے نال مزید جوڑ سڳدے۔اپݨی ڳالھ مہاڑ اچ وفاقی وزیر ایں عزم دا اعادہ کیتا جو حکومت پاکستان خطے اچ اقتصادی انضمام اتے تجارتی سفارتکاری دے ودھارے کیتے مکمل طور تے پرعزم اے۔ انہاں ایف پی سی سی آئی، ای سی او سی سی آئی اتے سی اے سی سی آئی جیھے اداریں دے کردار دی تعریف کیتی جیڑھے علاقائی تعاون اتے کاروباری شراکت داری کوں ودھارا ݙیوݨ اچ اہم کردار ادا کریندے پئن۔ انہاں آکھیا جو اے نشست محض ہک مکالمہ کائنی بلکہ مشترکہ ترقی، علاقائی استحکام اتے سانجھی خوشحالی دی سمت ہک واضح روڈ میپ اے۔ وفاقی وزیر رانا تنویر حسین سارے شرکاء تے زور ݙتا جو او رسمی معاہدیں توں اڳوں ودھدے ہوئیں سانجھے منصوبے، تجارتی تبادلے اتے پائیدار ترقیاتی اقدامات دے نفاذ دی طرف پیشرفت کرن۔ انہاں ایں ڳالھ دا اعادہ کیتا جو پاکستان آسیان ملکاں دے نال رل تے جامع تجارت، تزویراتی تعاون اتے دیرپا دوستی دے ہک نویں دور دے آغاز کیتے تیار اے۔