سکیورٹی فورسز دا مستونگ اچ خفیہ اطلاعات تے آپریشن، ترائے دہشت گرد جہنم واصل

راولپنڈی۔24جولائی(اے پی پی)سکیورٹی فورسز بلوچستان دے ضلع مستونگ اچ گزریل ݙینھ 23 جولائی کوں خفیہ اطلاعات دی بنیاد تے دہشت گرداں دے خلاف ہک اہم آپریشن کیتے۔ اے دہشت گرد بھارتی حمایت یافتہ تنظیم فتنہ الہندوستان نال تعلق رکھیندے ہن۔ آئی ایس پی آر دے مطابق آپریشن اچ سکیورٹی فورسز دہشت گرداں دے ٹھکانے کوں موثر انداز اچ نشانہ بݨایا جیندے اچ ترائے دہشت گرد واصل جہنم تھی ڳئے۔ آپریشن اچ شدید فائرنگ دے تبادلے اچ پاک فوج دے ہک بہادر افسر میجر زیاد سلیم اول شہید تھئین۔ انہاں دے نال پاک دھرتی دے ہک ٻئے سپوت سپاہی ناظم حسین وی اپݨی جان دا نذرانہ پیش کیتا۔ 31 سالہ میجر زیاد سلیم اول دا تعلق ضلع خوشاب اتے 22 سالہ سپاہی ناظم حسین دا تعلق ضلع جہلم نال اے۔ علاقے اچ کلیئرنس اتے سینیٹائزیشن آپریشن جاری اے تاں جو کہیں وی بھارتی حمایت یافتہ دہشت گرد کوں مکایا ونڄ سڳے۔ آئی ایس پی آر دے مطابق سکیورٹی فورسز مادر وطن توں بھارتی سپانسرڈ دہشت گردی دے مکمل خاتمے کیتے پرعزم ہن اتے اساݙے شہداء دیاں اے قربانیاں اساݙے عزم کوں مزید مضبوط کریندن۔