آرمی چیف فیلڈ مارشل سید عاصم منیر دا چین دا سرکاری دورہ، اعلیٰ سیاسی و عسکری قیادت نال ملاقاتاں

راولپنڈی۔25جولائی (اے پی پی) چیف آف آرمی سٹاف فیلڈ مارشل سید عاصم منیر نشان امتیاز (ملٹری) عوامی جمہوریہ چین دا سرکاری دورہ کیتے۔ آئی ایس پی آر توں جاری بیان موجب ایں دورے دے دوران آرمی چیف بیجنگ اچ چین دی اعلیٰ سیاسی و عسکری قیادت دے نال ٻہوں اعلیٰ سطحی ملاقاتاں کیتیاں جنہاں وچ پاکستان اتے چین وچال تکڑی سٹریٹجک شراکت داری دی توثیق کیتی ڳئی۔چیف آف آرمی سٹاف نائب صدر عوامی جمہوریہ چین ہان ژینگ اتے وزیر خارجہ وانگ ای نال ملاقات کیتی۔ ڳالھ مہاڑ اچ خطے اتے دنیا اچ بدلدے سیاسی حالات، چین پاکستان اقتصادی راہداری (سی پیک) دے تحت منصوبیں اتے سانجھے جغرافیائی سیاسی چیلنجز کیتے مربوط ردعمل دی لوڑھ تے ڳالھ مہاڑ کیتی ڳئی ۔ ݙوہائیں فریقین ݙو طرفہ تعلقات تے اطمینان دا اظہار کیتا اتے خودمختارانہ برابری، کثیر الجہتی تعاون اتے لمبی مدت علاقائی استحکام کیتے اپݨے عزم دا اعادہ کیتا۔ چینی قیادت جنوبی ایشیا اچ امن دے قیام کیتے پاکستان دی مسلح افواج کوں ہک مضبوط ستون اتے کلیدی کردار دا حامل قرار ݙتا۔دفاعی شعبے اچ فیلڈ مارشل سید عاصم منیر جنرل ژانگ یوژیا، وائس چیئرمین سینٹرل ملٹری کمیشن (سی ایم سی)، جنرل چن ہوئی، پولیٹیکل کمشنر پی ایل اے آرمی اتے لیفٹیننٹ جنرل کائی ژائی جن، چیف آف سٹاف پی ایل اے آرمی نال ملاقاتاں کیتیاں۔ پی ایل اے آرمی ہیڈ کوارٹر پُڄݨ تے آرمی چیف کوں گارڈ آف آنر پیش کیتا ڳیا جیڑھا ݙوہائیں افواج وچال پراݨی دوستی دی علامت اے۔انہاں ملاقاتاں اچ دفاعی و سلامتی تعاون تے جامع ڳالھ مہاڑ تھئی جنہاں وچ انسداد دہشت گردی، مشترکہ تربیت، دفاعی شعبے اچ جدت اتے ادارہ جاتی رابطیں کوں مزید تکڑا بݨاوݨ جیھے امور شامل ہن۔ آپریشنل ہم آہنگی اتے سٹریٹجک تعاون کوں بہتر بݨاوݨ تے زور ݙتا ڳیا تاں جو ہائبرڈ اتے سرحد پار خطریں دا موثر مقابلہ کیتا ونڄ سڳے۔ چینی عسکری قیادت ݙو طرفہ دفاعی شراکت داری تے مکمل اعتماد دا اظہار کیتا اتے علاقائی امن دے ودھارے وچ پاکستان دے کلیدی کردار دی تعریف کیتی ۔ فیلڈ مارشل عاصم منیر چین دی مسلسل حمایت دی تعریف کیتی تے پاکستان دی طرفوں عسکری سطح تے ہر شعبے وچ تعاون کوں مزید وسعت ݙیوݨ دے عزم دا اعادہ کیتا۔ اے دورہ ݙوہائیں بھرا ملکاں وچال ودھدے سیاسی و عسکری تعلقات دا مظہر اے اتے ایں امر کوں اجاگر کریندے جو او علاقائی سلامتی کوں ودھارا ݙیوݨ کیتے اعلیٰ سطحی رابطیں اتے مشاورت دے عمل کوں جاری رکھݨ کیتے پرعزم ہن۔