وزیراعظم دی پاکستان دے پہلے سکلز امپیکٹ بانڈ دی منظوری، نینگراں کوں روزگار دے قابل تعلیم و ہنر ݙیوݨ نال ملک دی تقدیر وٹیسوں، محمد شہباز شریف

اسلام آباد۔25جولائی(اے پی پی)وزیراعظم محمد شہباز شریف پاکستان دے پہلے سکلز امپیکٹ بانڈ دی منظوری ݙیندے آکھیے جو اے جدید ماڈل نینگراں کوں روزگار دے قابل بݨاوݨ کیتے نجی سرمایہ کاری کوں متوجہ کریسی، نینگراں کوں روزگار دے قابل تعلیم و ہنر ݙیوݨ نال ایں ملک دی تقدیر وٹا ݙیسوں، نینگراں کوں پاکستان اتے بیرون ملک روزگار دے مواقع اتے حصول دی تعداد دے تخمینے تے مبنی ہک جامع روڈ میپ پیش کیتا ونڄے، ہر ݙو مہینے اچ ایںدے تے عملدرآمد دی پیش رفت دا آپ جائزہ ڳھنساں۔ وزیراعظم شہباز شریف دی زیر صدارت نینگراں کوں روزگار ݙیوݨ بارے روڈ میپ تے جائزہ اجلاس اسلام آباد اچ تھیا۔ اجلاس اچ وفاقی وزراء احد خان چیمہ، عطاء اللہ تارڑ، چیئرمین وزیراعظم یوتھ پروگرام رانا مشہود احمد خان، رکن قومی اسمبلی آمنہ بتول اتے متعلقہ اعلیٰ حکام شرکت کیتی۔ ایں موقع تے وزیراعظم آکھیا جو ایں نظام دے تحت نینگراں کوں عصری تقاضیاں دے مطابق اینجھے ہنر سکھائے ویسن جیںدے نال پاکستان دے نوجوان با اختیار اتے ملکی اقتصادی ترقی اچ اپݨاں اہم کردار ادا کر سڳسن۔ نینگراں دی استعداد کار کوں ودھاوݨ، عصری تقاضیاں نال ہم آہنگ ہنر دی تربیت اتے تربیت دے بعد روزگار کیتے ودھ اقدامات کیتے ونڄن، پاکستانی نینگراں کوں بیرون ملک روزگار دے حصول وچ معاونت کیتے انہاں ملکاں دیاں مقامی زباناں دی تعلیم دے مواقع ݙتے ونڄن، بیرون ملک روزگار دے حصول کیتے ہنرمند افراد دی تیاری کوں ترجیح ݙتی ونڄے، نینگراں کوں ڈیجیٹل یوتھ ہب تے موجود روزگار دے مواقع بارے آگاہی مہم چلائی ونڄے۔ اجلاس کوں نینگراں کوں روزگار دے قابل بݨاوݨ کیتے ہنر و تعلیم دی فراہمی، پاکستان و بیرون ملک روزگار کیتے جامع اقدامات، ڈیجیٹل یوتھ ہب دے تحت اقدامات دی پیش رفت دا وی ݙسایا ڳیا۔ اجلاس اچ وزیراعظم پاکستان دے پہلے سکلز امپیکٹ بانڈ دی منظوری وی ݙتی۔ ایں نظام دے تحت نینگراں کوں عصری تقاضیاں نال ہم آہنگ اینجھے ہنر سکھائے ویسن جیںدے نال پاکستان دے نوجوان با اختیار اتے ملکی اقتصادی ترقی اچ اپݨاں اہم کردار ادا کر سڳسن۔