وفاقی وزیر شزا فاطمہ خواجہ نال چینی ادارے پیس کیبل انٹرنیشنل نیٹ ورک دے وفد دی ملاقات

اسلام آباد۔26جولائ(اے پی پی) شنگھائی وچ جاری ورلڈ آرٹیفیشل انٹیلیجنس کانفرنس دے موقع تے وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ چینی ادارے پیس کیبل انٹرنیشنل نیٹ ورک دے سینئر وفد نال اہم ملاقات کیتی۔ پریس ریلیز موجب پیس کیبل دے وفد دی قیادت چیف ایگزیکٹو افسر سن شیاوہوا کریندے پئن جݙاں جو انہاں دے نال سیلز ڈائریکٹر ژوانگ وی المعروف لُکس وی موجود ہن۔ملاقات وچ پاکستان اتے خطے وچال سب میرین اتے زمینی آپٹیکل فائبر کیبل دے ذریعے ڈیجیٹل رابطیں کوں بہتر بݨاوݨ تے تفصیلی ڳالھ مہاڑ تھئی۔ وفد پیس کیبل دے وسیع پورٹ فولیو تے روشنی پاتی جیں وچ سب میرین و زمینی فائبر کیبلز اتے توانائی دے جدید حل شامل ہن جݙاں جو ادارے دی سالانہ آمدن تقریباً 24 ارب امریکی ڈالر ݙسائی ڳئی۔ وفاقی وزیر وفد کوں وزیرِ اعظم پاکستان شہباز شریف دے وژن “ڈیجیٹل نیشن پاکستان” توں آگاہ کیتا، جیں دا ہک اہم ستون قومی فائبرائزیشن پالیسی ہے۔ ایں وژن دے تحت حکومت دا ہدف آندے تریجھے سال وچ ہک کروڑ گھراں کوں فائبر براڈبینڈ نال منسلک کرݨ، موبائل ٹاورز دی فائبرائزیشن 14 فیصد توں ودھا تے 60 فیصد تئیں ڳھن ونڄݨا اتے وزیراعظم دی زیرِ قیادت اصلاحات دے ذریعے رائٹ آف وے دے اخراجات وچ نمایاں کمی ڳھن آوݨ اے۔پیس کیبل کوں پاکستان وچ ایف ٹی ٹی ایچ نیٹ ورک دے قیام وچ سرمایہ کاری، او ڈی این مارکیٹ وچ داخلے اتے زمینی فائبر ڈھانچے دی ترقی دے موقع دریافت کرݨ دی دعوت ݙتی ڳئی۔ ایں ضمن وچ وفاقی وزارت آئی ٹی نجی و سرکاری شعبیں دے نال مکمل تعاون دا یقین ݙیوایا ڳئے