ریاستی رٹ چیلنج کرݨ آلیں دے نال اوکھے ہتھاں نال نبڑیا ویسی، محسن نقوی

کوئٹہ۔26جولائی (اے پی پی) وفاقی وزیر داخلہ محسن نقوی آکھیے جو بھارتی سپانسرڈ دہشت گرداں اتے انہاں دے سہولت کاراں کوں انجام تئیں پُڄیسوں، ریاستی رٹ چیلنج کرݨ آلیں دے نال اوکھے ہتھاں نال نبڑیا ویسی، دہشت گردی دے خلاف جنگ وچ بلوچستان حکومت دی مکمل سپورٹ جاری رکھیسوں۔ وزارت داخلہ توں جاری بیان موجب وفاقی وزیر داخلہ محسن نقوی اتے وزیر اعلیٰ بلوچستان میر سرفراز بگٹی دی زیر صدارت امن و امان متعلق خصوصی اجلاس وچ فتنہ الہندوستان دے خلاف مختلف علاقیں وچ سکیورٹی فورسز دیاں کارروائیاں تے تفصیلی غور کیتا ڳیا۔ اجلاس وچ انسپکٹر جنرل پولیس، آئی جی ایف سی نارتھ، ڈی آئی جی سی ٹی ڈی، ڈی آئی جی اسپیشل برانچ، ڈی جی لیویز دے علاوہ محکمہ داخلہ اتے قانون نافذ کرݨ آلے اداریں دے اعلیٰ حکام وی شریک ہن۔ ایں موقع تے وزیراعلیٰ سرفراز بگٹی امن و امان دی مجموعی صورتحال اتے سکیورٹی اقدامات تے بریفنگ ݙتی۔ اجلاس دے دوران صوبائی ایکشن پلان تے عمل درآمد اتے ایں وچ درپیش رکاوٹاں دا جائزہ ڳھدا ڳیا۔ایں موقع تے ڳالھ مہاڑ کریندے وفاقی وزیر داخلہ محسن نقوی آکھیا جو فتنہ الہندوستان دے دہشت گرداں دا انجام عبرتناک موت اے، بھارتی سپانسرڈ دہشت گرداں اتے انہاں دے سہولت کاراں کوں انجام تئیں پُڄیسوں، ریاستی رٹ چیلنج کرݨ آلیں دے نال اوکھے ہتھاں نال نبڑیا ویسی۔ وفاقی وزیر داخلہ مزید آکھیا جو دہشت گردی دے خلاف جنگ وچ بلوچستان حکومت دی مکمل سپورٹ جاری رکھیسوں۔ انہاں آکھیا جو پاکستان دشمن عناصر کیتے زمین تنگ کر ݙتی ڳئی اے۔ وزیراعلیٰ بلوچستان میر سرفراز بگٹی اجلاس اچ ڳالھ کریندے آکھیا جو وفاق اتے صوبائی حکومت متفق ہن جو اے جنگ سکیورٹی فورسز دی نی بلکہ پوری قوم دی جنگ اے، دہشت گردی وچ ملوث عناصر دے خلاف کارروائیاں مزید تکھیاں کرݙتن ۔ انہاں آکھیا جو بلوچستان وچ امن دے قیام کیتے ریاستی ادارے مکمل ہم آہنگی نال سرگرم عمل ہن، سکیورٹی فورسز اتے عوام دیاں قربانیاں ضائع نہ ویسن، ہر قیمت تے امن قائم کریسوں۔