وفاقی وزیر شزا فاطمہ خواجہ دی چینی وفد نال ملاقات

اسلام آباد (اے پی پی) وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ شنگھائی اچ جاری ورلڈ آرٹیفیشل انٹیلیجنس کانفرنس دے موقع تے چین دے نامور طبی اَتے ٹیکنالوجی ماہرین دے ہک وݙے وفد نال ملاقات کیتی تان جو پاکستان اَتے چین وچال مصنوعی ذہانت، سمارٹ سٹی حل اَتے میڈیکل ٹیکنالوجی دے شعبیں اچ رل مل کَم ودھایا ونڄ سڳے ۔ وفد اچ چنگ ڈونگ، جیڑھے آل چائنا فیڈریشن آف ریٹرنڈ اوورسیز چائنیز دی سٹینڈنگ کمیٹی دے رُکن اَتے شنگھائی زانگ جیانگ ہائی ٹیک سٹی میڈیکل انوویشن ریسرچ انسٹیٹیوٹ دے ایگزیکٹو وائس پریزیڈنٹ ہن، لیو یوئنگوئی، وائس پریزیڈنٹ شینلان ٹیکنالوجی (شنگھائی) کمپنی لمیٹڈ، پروفیسر ژاؤ شانٹنگ، جیڑھے جرمنی توں تربیت یافتہ میڈیکل ڈاکٹر اَتے ڈاکٹریٹ سپروائزر ہن اَتے ڈاکٹر ہی بن، جنہاں کوں جرمنی توں پی ایچ ڈی ملی ہوئی اے اَتے او پروفیسر ژاؤ دے معاون ہن، شامل ہن ۔ وزارتِ انفارمیشن ٹیکنالوجی و ٹیلی کمیونیکیشن دے جاری اعلامیہ موجب ملاقات اچ کئی اہم مسئلیں تے ڳالھ مہاڑ کیتی ڳئی، جیں وچ پاکستانی نینگراں کیتے مصنوعی ذہانت دیاں صلاحیتاں دے تبادلے تے مبنی پروگرام دا آغاز، نیشنل آئی ٹی بورڈ نال ڈیجیٹل گورننس سلوشنز تے شراکت داری اَتے پاکستانی سٹارٹ اپس نال ہیلتھ ٹیک، ایڈٹیک اَتے فن ٹیک دے شعبیں اچ سانجھے منصوبے شامل ہن ۔ وفد پاکستان اچ سمارٹ مینٹیننس مشینری اَتے اے آئی تے مبنی ایپلیکیشنز دی نمائش اچ وی دلچسپی ݙکھائی، نال ہی چینی طب اَتے اے آئی دے رلاوݨ نال دائمی اَتے اعصابی بیماریاں دے علاج دی تحقیق کوں ودھاوݨ تے وی زور ݙتا۔وفاقی وزیر شزا فاطمہ خواجہ انہاں تجویزاں دا خیرمقدم کریندے آکھیا جو پاکستان جدید ٹیکنالوجی کوں قومی ترقی کیتے استعمال کرݨ دا پکا ارادہ رکھیندے ۔ انہاں وفد کوں وزارتِ آئی ٹی و ٹیلی کمیونیکیشن ولوں مکمل تعاون دا یقین ݙیوائے تانجو اختراعات، ڈیجیٹل صلاحیتاں اچ ودھارا اَتے شمولیت اُتے مبنی سرحد پار شراکت داری کوں ودھایا ونڄ سڳے ۔