اوورسیز پاکستانیاں دی محنت دی کمائی ملک دی ترقی اچ اہم کردار ادا کریندی اے، وزیراعظم شہباز شریف

اسلام آباد (اے پی پی) وزیراعظم شہباز شریف ٻاہرلے ملک رہݨ آلے پاکستانیاں دی ترسیلات زر پاکستان بھیڄݨ دی سہولت اسکیم کوں جاری رکھݨ دا فیصلہ کیتے ۔ انہاں آکھیے جو ٻاہرلے ملک رہݨ آلے پاکستانی ساݙی طاقت اَتے پاکستان دا قیمتی اثاثہ ہن ۔ انہاں دی خون پسینے دی کمائی ترسیلات زر پاکستان دی ترقی اچ اہم کردار ادا کریندی اے جیں کوں میں سودھے پوری قوم قدر دی نگاہ نال ݙیکھدی اے۔وزیراعظم دے میڈیا ونگ توں جاری بیان موجب وزیراعظم وزارت خزانہ کوں ہدایت کیتی اے جو ورکرز ریمیٹنس انسینٹیو اسکیم کیتے ترجیحی بنیاداں تے وختی طور تے فنڈ جاری کیتے ونڄن ۔وزیراعظم مزید آکھیا جو مالی سال 2025 اچ ٻالرے ملک رہݨ آلے پاکستانیاں تریخ دی بلند ترین 38.3 ارب ڈالر دی ترسیلات زر بھیڄ تے 14 سالاں وچ پہلی واری کرنٹ اکاؤنٹ سرپلس دے ہدف کوں حاصل کرݨ اچ اہم کردار ادا کیتے۔ انہاں ترسیلات زر نال نہ صرف ودھدے درآمدی ٻل دی ادائیگی بلکہ زر مبادلہ دے ذخیرے وچ وی ودھارا تھئے ۔ ٻاہرلے ملک رہݨ آلے مزدوراں توں گھن تے کاروباری شخصیات تئیں، سارے آپݨی ترسیلات زر بھیڄ تے ملکی تعمیر و ترقی اچ اہم کردار ادا کریندن۔وزیراعظم زور ݙتے جو ٻاہرلے ملک رہݨ آلے محنتی پاکستانیاں ولوں بھیجی ونڄݨ آلی ترسیلات زر دے رستے اچ آندیاں رکاوٹاں کوں ہٹایا ویندا پئے اتے ایں نظام کوں بہتر، موثر اَتے سوکھا بݨایا ویندا پئے۔