وفاقی وزیر پروفیسر احسن اقبال نال چینی سفیر جیانگ زیڈونگ دی ملاقات

اسلام آباد۔27جولائی (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو سی پیک دا پہلا مرحلہ کامیابی نال مکمل تھی چکئے، سی پیک دے ݙوڄھے مرحلے وچ صنعتی تعاون، زراعت، آئی ٹی اتے سماجی ترقی تے توجہ مرکوز اے، سی پیک کوں وسطی ایشیا توں جوڑݨ خطے وچ اقتصادی استحکام دا ذریعہ ہوسی۔ وزارت منصوبہ بندی موجب وفاقی وزیر پروفیسر احسن اقبال نال چین دے سفیر جیانگ زیڈونگ ملاقات کیتی۔ ملاقات وچ وفاقی وزیر میری ٹائم افیئرز محمد جنید انوار چوہدری وی شریک ہن۔ ملاقات وچ ݙوہائیں ملکاں دے اعلیٰ سطحی وفد وی شرکت کیتی۔ملاقات اچ ڳالھ کریندے پروفیسر احسن اقبال آکھیا جو آندے واری تھیوݨ آلی جے سی سی وچ اہم فیصلے متوقع ہن جنہاں نال ݙوہائیں ملکاں وچال تعلقات مزید بہتر تھیسن۔ انہاں آکھیا جو سی پیک دا پہلا مرحلہ کامیابی نال مکمل تھی چکئے، سی پیک دے ݙوڄھے مرحلے وچ صنعتی تعاون، زراعت، آئی ٹی اتے سماجی ترقی تے توجہ مرکوز اے، سی پیک کوں وسطی ایشیا توں جوڑݨ خطے وچ اقتصادی استحکام دا ذریعہ ہوسی۔ وفاقی وزیر مزید آکھیا جو سی پیک منصوبیں دی سکیورٹی کوں بہتر بݨاوݨ کیتے حکومت اقدامات چاتن، گوادر دی ترقی اتے اقتصادی زونز دی تعمیر اہم ترجیح اے، حکومت گوادر دی بندرگاہی صلاحیت توں بھرپور فیدہ چاوݨ کیتے پرعزم اے۔ احسن اقبال آکھیا جو گوادر اتے ایندے نیڑے معدنیات دے شعبے وچ بے شمار موقع موجود ہن، جدید انفراسٹرکچر دے قیام دے ذریعے معدنیات توں بھرپور فیدہ چاتا ونڄ سڳدے۔ انہاں آکھیا جو چین دے نال زراعت دے شعبے وچ شراکت داری جاری اے، چین توں تربیت یافتہ ایگری گریجویٹس موسمیاتی تبدیلی نال نبݨݨ وچ مددگار ہوسن۔ وفاقی وزیر آکھیا جو پاکستان سپیس سینٹر دا قیام قومی اہمیت رکھیندے ایں منصوبے کوں وختی مکمل کرݨ کیتے چین کلیدی کردار ادا کریسی۔ چین دے سفیر ایں عزم دا اعادہ کیتا جو ݙوہائیں ملکاں وچال تعاون آوݨ آلے سالاں وچ مزید وسعت اختیار کریسی۔