نائب وزیراعظم محمد اسحاق ڈار دی نیویارک اچ پاکستانی نژاد امریکی کمیونٹی نال ملاقات، ممتاز پاکستانی نژاد امریکیاں دے اجتماع توں خطاب

اسلام آباد۔27جولائی (اے پی پی) نائب وزیراعظم / وزیر خارجہ سینیٹر محمد اسحاق ڈار پاکستان اتے امریکا ݙوہائیں ملکاں کیتے پاکستانی تارکین وطن دے تعاون دی تعریف کریندے ݙو طرفہ تعلقات کوں تکڑا بݨاوݨ اتے عالمی سطح تے پاکستان دے مثبت تشخص دے ودھارے اچ انہاں دے اہم کردار دا اعتراف کیتے۔ ترجمان دفتر خارجہ توں جاری اعلامیہ موجب  نائب وزیراعظم محمد اسحاق ڈار نیویارک اچ پاکستانی نژاد امریکی کمیونٹی نال ملاقات کیتی اتے ممتاز پاکستانی نژاد امریکیاں دے اجتماع توں خطاب کیتا۔انہاں بھارت نال اڄوکی کشیدگی دے دوران پاکستانی نژاد امریکیاں دی یکجہتی، حمایت اتے کشمیری عوام دی آواز کوں چاوݨ وچ انہاں دے تعمیری کردار دی تعریف کیتی ۔ نائب وزیراعظم/وزیر خارجہ کمیونٹی دے اجتماع کوں پاکستان دی معاشی بحالی دے بارے ݙسیندے ایں ڳالھ دا ذکر کیتے جو ملک آئی ایم ایف پروگرام کامیابی نال مکمل کیتے، مہانگ وچ نمایاں کمی کیتی اے اتے سرمایہ کاراں دا اعتماد بحال کیتے۔ انہاں ایں امر دا اشتراک وی کیتا جو عالمی کریڈٹ ریٹنگ ایجنسیاں ہݨے ہی وچ پاکستان دے بہتر میکرو اکنامک آؤٹ لک کوں تسلیم کیتے۔ انہاں حکومت دی پاکستان کیتے جی 20 معیشتاں دی صف وچ شامل تھیوݨ دی خواہش دا اعادہ کیتا۔نائب وزیراعظم/وزیر خارجہ ایں ڳالھ تے زور ݙتا جو پاکستان سفارتی کلھیپے دے دور توں نکلئے اتے اڄوکے اعلیٰ سطحی دورے اتے کثیر جہتی سفارت کاری دے ذریعے بین الاقوامی سطح تے سرگرم عمل اے۔ نائب وزیراعظم / وزیر خارجہ پاکستان دی موجودہ صدارت اتے اقوام متحدہ دی سلامتی کونسل دی ݙو سالہ غیر مستقل رکنیت تے وی روشنی پاتی جیڑھا جو 182 ملکاں دی حمایت نال حاصل کیتی ڳئی اے اتے پاکستان دی اصولی سفارتکاری تے عالمی برادری دے اعتماد دا ثبوت اے۔ انہاں اقوام متحدہ دی سلامتی کونسل دیاں متعلقہ قرارداداں موجب جموں و کشمیر اتے فلسطین سودھے جھیڑیں دے پرامن حل کیتے پاکستان دے عزم دا اعادہ کیتا۔علاقائی حرکیات دا ذکر کریندے نائب وزیراعظم و وزیر خارجہ وسطی ایشیا تئیں ریل اتے تجارتی راہداریاں دے ذریعے علاقائی رابطیں کوں ودھاوݨ دے مقصد نال پڑوسی ملک افغانستان تئیں پاکستان دی رسائی تے زور ݙتا۔ انہاں پاکستان دی ایں توقع دا اظہار کیتا جو افغان سرزمین کوں دہشت گردی کیتے استعمال نہ کیتا ویسی۔ انہاں ایں سلسلے وچ افغان حکام دی طرفوں اڄوکے یقین ݙیواوݨ تے روشنی پاتی۔ انہاں اپݨی خودمختاری اتے علاقائی استحکام دے دفاع کیتے پاکستان دے عزم دی وی توثیق کیتی، آپریشن بنیان المرصوص دے دوران ملک دے مضبوط اتے پرعزم ردعمل دا حوالہ ݙتا جیں دی وجہ توں چھی بھارتی طیارے مار ݙھائے ڳئے۔ انہاں ایں نازک لمحے دے دوران قوم اتے تارکین وطن دی طرفوں اتحاد دے مظاہرے دی تعریف کیتی۔ نائب وزیر اعظم و وزیر خارجہ کمیونٹی کوں یقین ݙیوایا جو حکومت پی آئی اے دیاں پروازاں دی وختی توں جلدی بحالی کیتے سرگرم عمل اے جیں وچ بین الاقوامی ہوابازی دے معیارات موجب یورپ اتے برطانیہ کیتے رستیں دی بحالی کیتے اقدامات شامل ہن۔انہاں حکومت دے کلیدی اقدامات دا خاکہ پیش کریندے خاص طور تے خصوصی سرمایہ کاری سہولت کونسل (SIFC) دے کردار تے وی روشنی پاتی جیڑھی سرمایہ کاری دے طریقہ کار کوں ہموار کرݨ اتے ترجیحی شعبیں وچ موقعیں کوں کھولݨ کیتے ڈیزائن کیتا ڳئے۔ انہاں تارکین وطن کوں پاکستان دی ترقی، بالخصوص سرمایہ کاری، تجارت، تعلیم اتے ڈیجیٹل اختراع وچ فعال کردار ادا کرݨ دی دعوت ݙتی۔ نائب وزیر اعظم و وزیر خارجہ پاکستانی نژاد امریکی تارکین وطن کوں قومی ترقی دے نال نال سانجھے طور تے فیدہ مند پاکستان امریکا سانجھے تعاون کوں تکڑا بݨاوݨ وچ اسٹریٹجک شراکت دار دے طور تے شامل کرݨ دے حکومت پاکستان دے عزم دا اعادہ کیتا۔