ترک صدر رجب طیب ایردوان ہر فورم تے فلسطینیاں اتے امت مسلمہ کیتے جرأت مندانہ آواز چاتی اے، وزیر اطلاعات عطاء اللہ تارڑ دا تقریب نال خطاب

اسلام آباد۔28 جولائی(اے پی پی)وفاقی وزیر اطلاعات و نشریات عطاء اللہ تارڑ آکھیے جو رجب طیب ایردوان مسلم دنیا دے مضبوط، بااصول اتے جرأت مند رہنما ہین جنہاں نہ صرف ترکیہ دی تعمیر و ترقی اچ ودھ کردار ادا کیتے ٻھل امت مسلمہ دی آواز کوں ہر عالمی فورم تے چاتے، انہاں دے دور اچ پاکستان اتے ترکیہ وچال برادرانہ تعلقات ٻئے تکڑے تھئین۔ اے ڳالھ انہاں اسلام آباد اچ ادارہ فروغ قومی زبان اچ معروف محقق، سینئر صحافی اتے ترکیہ ریڈیو اینڈ ٹیلی ویژن (ٹی آر ٹی) دی اردو سروس دے سربراہ ڈاکٹر فرقان حمید دی کتاب “رجب طیب ایردوان۔ عالم اسلام دا ٹائیگر” دی تقریب ڳھنݙ کھلائی نال خطاب کریندے آکھی۔ تقریب اچ ترکیہ، آذربائیجان، ترکمانستان، قازقستان، ازبکستان اتے روانڈا دے معزز سفراء، معروف محقق ڈاکٹر فرقان حمید، ممتاز صحافیاں اتے مختلف شعبیاں دے لوکاں شرکت کیتی۔ وفاقی وزیر آکھیا جو رجب طیب ایردوان دی عوامی قیادت، بصیرت اتے فلاحی وژن انہاں کوں صرف ترکیہ ہی نئیں پورے مسلم دنیا دا قائد بݨا ݙتے۔ انہاں جسٹس اینڈ ڈویلپمنٹ پارٹی کوں ہک حقیقی عوامی جماعت اچ ڈھال ݙتے، استنبول دے میئر دے طور تے صدر ایردوان دا دور “سنہری دور” آکھیا ویندے جتھاں انہاں اعلیٰ انتظامی صلاحیتاں اتے مؤثر طرز حکمرانی دی مثال قائم کیتی اے۔ انہاں آکھیا جو استنبول تہذیبی اتے تاریخی شہر اے جتھاں مشرق و مغرب مِلین، رجب طیب ایردوان جھیاں عوامی رہنما جݙاں نچلی سطح توں ابھردے تاں او عوام دے دلاں اچ وس ویندے۔ وفاقی وزیر آکھیا جو صدر ایردوان پاکستان دے عظیم دوست ہن، انہاں دے دور اچ ݙوہاں ملکاں وچال تعاون اچ عملی وسعت آئی، شہباز شریف جݙاں وزیر اعلیٰ پنجاب ہن تاں ایں دور اچ ترکیہ دے تعاون نال لاہور میٹرو بس اتے ویسٹ مینجمنٹ سودھے کئی منصوبے مکمل تھئے جیڑھے ایں سنڳت دی سوھݨی مثال ہین۔ انہاں آکھیا جو خلافت تحریک ایں سنڳت دی شروعات دا منڈھ اے، 1947ء توں پہلے ای برصغیر دے مسلمان ترک بھراواں نال جڑیے ہوئن، اے سنڳت حداں توں وی انڄھ اے، ترکیہ ہمیشہ پاکستان دے موقف دی کُھل تے حمایت کیتی اے، بھارت نال اڄوکے ڄھیڑے اچ ترک عوام پاکستانی عوام دے نال مونڈھا رلا تے کھڑے رہین، قدرتی آفتاں ہوون، عالمی چیلنجز یا سیاسی بحران، ہر اوکھ اچ ترکیہ پاکستان دے نال کھڑے۔ وزیر اطلاعات صدر ایردوان ولوں فلسطین دے مظلوم عوام کیتے چاتی ڳئی آواز کوں جرات مندانہ اتے تاریخی قرار ݙیندے آکھیا جو صدر رجب طیب ایردوان پناہ گزیناں کیتے ہمیشہ در کھولین، پاکستان آپ مہاجرین دے مسلے نال نمٹیے اتے ساکوں ݙاݙھا پتا اے جو ٻنھاں کیتے در کھلے رکھݨ کتنا وݙا ظرف اے۔ انہاں آکھیا جو صدر ایردوان فلسطینیاں کیتے ہر بین الاقوامی پلیٹ فارم تے آواز چاتی ات ٻھاویں او اقوام متحدہ ہووے، ݙی ایٹ سربراہ اجلاس ہووے یا شنگھائی تعاون تنظیم۔ انہاں آکھیا جو اسرائیل دی بربریت دنیا دے سامݨے اے، فلسطینیاں کیتے انسانی امداد کوں روکݨ ہک انسانیت سوز المیہ اے، پاکستان نہ صرف فلسطینی عوام کیتے انسانی امداد بھجوائی ٻھل فلسطینی طلباء کوں میڈیکل کالجاں اچ تعلیم دے مواقع وی ݙتن۔ انہاں آکھیا جو وزیراعظم شہباز شریف ہر فورم تے فلسطینیاں کیتے آواز چاتی اے، صدر ایردوان کوں پاکستان اچ وݙی محبت، عزت اتے قدر نال ݙتھا ویندے، اے کتاب صدر ایردوان دی بصیرت افروز قیادت، فلاحی وژن اتے امت مسلمہ کیتے انہاں دے کردار کوں خراج تحسین اے، پاکستان اتے ترکیہ دے عوام دل دے رشتے اچ ٻدھیے ہوئن اتے اے تعلق ویلھے دے نال نال ٻیا تکڑا تھیسی۔ ایں موقع تے خطاب کریندے کتاب دے مصنف، سینئر صحافی اتے ٹی آر ٹی اردو سروس دے سربراہ ڈاکٹر فرقان حمید آکھیا جو صدر رجب طیب ایردوان ہک اینڄھی غیر معمولی شخصیت ہین جنہاں ترکیہ ہی نئیں ٻھل پوری امت مسلمہ دی قیادت دا حق ادا کیتے۔ انہاں آکھیا جو ایردوان دی جدوجہد، فلاحی وژن اتے عوامی خدمت تے مبنی سیاسی سفر صرف ترکیہ دی تاریخ نئیں ٻھل مسلم دنیا کیتے ہک تحریک اے۔ ڈاکٹر فرقان حمید آکھیا جو ایردوان دی قیادت اچ ترکیہ دفاعی خودکفالت، اقتصادی استحکام اتے جمہوریت دے تحفظ جحیں میداناں اچ تاریخی کامیابیاں حاصل کیتن۔ انہاں آکھیا جو ایردوان دی شخصیت صرف ترکیہ تئیں محدود نئیں ٻھل انہاں دی فکر، نظریہ اتے جرات مندانہ مؤقف پوری امت کیتے مشعلِ راہ اے۔ ڈاکٹر فرقان حمید آکھیا جو پاکستان اتے ترکیہ وچال روحانی، تاریخی اتے برادرانہ تعلق اے، صدر ایردوان دی کوششاں نال پاکستان اتے ترکیہ وچال ودھدی ہوئی قربت، روحانی ہم آہنگی، دفاعی تعاون اتے ثقافتی یگانگت کوں وی ایں کتاب اچ وݙے سوھݨے انداز اچ بیان کیتا ڳئے۔ انہاں آکھیا جو کتاب اچ ایردوان اتے پاکستان وچال قائم دل و جاں دے تعلق دا وی خوبصورت تذکرہ اے۔ صدر ایردوان نہ صرف پاکستانی قیادت بلکہ عوام دے نال وی روحانی تعلق ٻݨائے، انہاں دا علامہ اقبال دی شاعری دا حوالہ ݙیوݨ، دراصل پاکستان نال انہاں دی والہانہ عقیدت دا ثبوت اے۔