وفاقی وزیر خزانہ و محصولات سینیٹر محمد اورنگزیب نال نیدرلینڈز دی سفیر دی الوداعی ملاقات

اسلام آباد۔28 جولائی (اے پی پی)وفاقی وزیر خزانہ و محصولات سینیٹر محمد اورنگزیب نال پاکستان اچ نیدرلینڈز دی سفیر ہینی ڈی وریز (H.E. Mrs. Henny de Vries) وزارت خزانہ اچ الوداعی ملاقات کیتی۔ وزیر خزانہ پاکستان اتے نیدرلینڈز وچال ݙو طرفہ تعلقات ودھاوݨ اتے مستحکم کرݨ اچ ہینی ڈی وریز دیاں کوششاں دی تعریف کیتی۔ انہاں خاص کر تجارت اتے کاروبار سودھا مختلف شعبیاں اچ تعاون کیتے کوششاں کوں وی تحسین پیش کیتا۔ سینیٹر محمد اورنگزیب پاکستان اچ سرگرم ڈچ کمپنیاں دے مثبت کردار اتے انہاں دی سماجی و اقتصادی ترقی اچ شراکت دی تعریف کیتی۔ فریقین باہمی دلچسپی دے امور تے الایا۔ وزیر خزانہ سفیر کوں پاکستان اچ حالیہ معاشی پیش رفت ݙسایا جیندے اچ خودمختار کریڈٹ ریٹنگ اچ بہتری، سکیورٹی صورتحال اچ استحکام اتے سرمایہ کاراں دے اعتماد اچ ودھارا شامل ہن جیڑھے سارے کلیدی شعبیاں اچ پائیدار استحکام دا نتیجہ ہن۔ سفیر ہینی ڈی وریز پاکستان اچ میکرو اکنامک استحکام دے حصول تے اطمینان کریندے ملک دے موجودہ ترقیاتی پندھ دی تعریف کیتی اتے امید کیتی جو پاکستان طویل مدتی اقتصادی ترقی اتے خوشحالی دی طرف اپݨا سفر جاری رکھیسی۔