غزہ “بین الاقوامی قانون اتے انسانی اصولاں دا قبرستان” بݨ ڳئے، نائب وزیراعظم تے وزیر خارجہ اسحاق ڈار دا مسئلہ فلسطین تے بین الاقوامی کانفرنس نال خطاب

نیویارک۔29 جولائی (اے پی پی) نائب وزیراعظم تے وزیر خارجہ سینیٹر محمد اسحاق ڈار مسئلہ فلسطین دے پرامن اتے ݙو ریاستی حل بارے منگل کوں نیویارک اچ اعلیٰ سطحی بین الاقوامی کانفرنس اچ شرکت کیتی ۔ ترجمان دفتر خارجہ ولوں ایں موقع تے جاری اعلامیہ موجب کانفرنس سعودی عرب اتے فرانس دی سانجھی صدارت اچ تھیندی پئی اے۔ شریک چیئرمینز دی قیادت اتے اَٹھ ورکنگ گروپس دے کردار دی کوششاں کوں سراہندے ہوئیں نائب وزیراعظم تے وزیر خارجہ کانفرنس توں بامقصد نتائج دے حصول کیتے پاکستان دی فعال شرکت اتے عزم دا اعادہ کیتا۔ انہاں غزہ اچ اسرائیل دی جاری جارحیت دی شدید مذمت کریندے ہوئیں ایں کوں “بین الاقوامی قانون اتے انسانی اصولاں دا قبرستان” قرار ݙتا۔ انہاں آکھیا جو 58,000 توں ودھ فلسطینیاں جنہاں اچ ودھ توں ودھ تریمتیں اتے ٻال شامل ہن، انہاں دے قتل کوں بین الاقوامی قانون، اقوام متحدہ دی قرار داداں اتے عالمی عدالت انصاف (آئی سی جے) دے اقدامات دی کُھلی خلاف ورزی اے ۔ بین الاقوامی اقدام دی فوری لوڑھ تے زور ݙیندیں ہوئیں نائب وزیراعظم تے وزیر خارجہ فوری، غیر مشروط اتے مستقل جنگ بندی، بلا روک ٹوک انسانی امداد تئیں رسائی، اقوام متحدہ دے ادارے یو این آر ڈبلیو اے دی حمایت، جنگی جرائم دی جوابدہی اتے ݙو ریاستی حل کیتے ہک مستند سیاسی عمل دی بحالی دا مطالبہ کیتا۔ انہاں فلسطین کیتے اقوام متحدہ دی مکمل رکنیت اتے عالمی سطح تے ایں دی شناخت تے وی زور ݙتا۔ انہاں ایں گالھ تے وی زور ݙتا جو کانفرنس کوں قابل عمل ودیاں دے نال ݙو ریاستی حل دی مرکزی اہمیت کوں دہرایا ونڄے، اسرائیل دے غزہ توں انخلا دے مطالبے دے نال اقوام متحدہ دی سلامتی کونسل دی قرار داد 2735 اتے او آئی سی ۔ عرب پلان دے مطابق غزہ دی تعمیر نو دی حمایت کرݨی چاہیدی اے۔ انہاں آکھیا جو کانفرنس اچ جبری نقل مکانی، آبادیاتی جوڑ توڑ، آبادکاریاں اتے الحاق کوں وی مسترد کرݨا چاہیدے۔ فرانس ولوں فلسطین دی ریاست کوں تسلیم کرݨ دے فیصلے دا خیرمقدم کریندیں ہوئیں نائب وزیراعظم تے وزیر خارجہ بئے ملکاں کوں ایں دی پیروی دی ترغیب ݙتی۔ انہاں او آئی سی ۔ عرب پلان اتے کہیں وی بین الاقوامی تحفظ دے طریقہ کار کیتے تکنیکی امداد، صلاحیت سازی اتے حمایت فراہم کرݨ کیتے پاکستان دی تیاری دا اظہار وی کیتا۔ نائب وزیراعظم تے وزیر خارجہ سینیٹر محمد اسحاق ڈار زور ݙتا جو مسئلہ فلسطین ہک اخلاقی لوڑھ اتے بین الاقوامی برادری کیتے ہک امتحان اے۔ انہاں آکھیا جو قبضہ ختم تھیوݨا چاہیدے اتے جلدی ختم تھیوݨا چاہیدے، ہݨ ویلھا اے جو فلسطین کوں آزادی، خودمختاری اتے ریاستی حیثیت حاصل تھیوے۔