نوجوان پاکستان دا مستقبل، انہاں کوں ہنرمند بݨا تےدرست سدھ تے ٹور سڳدوں، وزیر مملکت وجہیہ قمر

کوئٹہ۔ 29 جولائی (اے پی پی) وفاقی وزیر مملکت برائے تعلیم تے پیشہ ورانہ تربیت وجہیہ قمر آکھیا جو نوجوان پاکستان دا مستقبل، انہاں کوں ہنرمند بݨا تے درست سدھ تے ٹور سڳدن۔  بلوچستان وزیر اعظم دی ترجیحات اچ شامل اے، بلوچستان ترقی یافتہ اتے خوشحال تھیسی تاں پاکستان ترقی کریسی۔ بلوچستان دے نوجواناں دی کپیسٹی بلڈنگ دا پروگرام وی شروع کر ݙتا ڳئے تانجو بین الاقوامی فورمز تے اے جوان ملک تے قوم دا ناں روشن سڳن، نوجواناں کوں جدید تقاضیاں نال ہم آہنگ تربیت اتے ہنر ݙتا ویندا پئے۔ اے ڳالھیں انہاں کوئٹہ اچ ٹیکنیکل ٹریننگ سینٹر دے دورے دے موقع تے پریس کانفرنس نال خطاب کریندے ہوئیں کیتی۔وجہیہ قمر آکھیا جو ہنر فراہم کرݨ آلے اداریاں دا دورہ کیتا جئیں دا مقصد ہا جو ہنر اسلام آباد اچ ݙتی ویندی پئی اے کیا اوہا تربیت اتھاں ݙتی ویندی پئی اے؟ بیوٹمز یونیورسٹی اچ نیشنل انکیوبیشن سینٹر جو وفاقی وزارت انفارمیشن ٹیکنالوجی دے ماتحت کم کریندا پئے ہک ایہو جہا ادارہ جو پاکستان اچ سارے انکیوبیشن سینٹرز کیتے ہک مثال اے جئیں طرح نال پی پی اے ایف مدد فراہم کریندی پئی اے او قابل تحسین اے، ٻالاں اتے ٻالڑیاں کوں جیڑھی سہولتاں ݙتی ویندی پئن، او لائق تحسین ہن۔ انہاں آکھیا جو بلوچستان دے 36 ضلعیاں توں تعلق رکھݨ آلے ٻال تے ٻالڑیاں سٹارٹ اپ تے کم کریندے پئن، وزیر اعظم دی ترجیح سکلڈ بیسڈ ایجوکیشن کوں ودھاوݨ اے،60 فیصد توں ودھ یوتھ اے اگر اساں یوتھ کوں صحیح سمت ݙٹھا تے انہاں کوں قومی اثاثہ بݨیسوں، نیوٹیک سودھے بئے ادارے کم کریندے پئن۔بلوچستان دے اندر چیلنجز ہن، پرے دے علاقیاں توں طلباء دا آوݨ اتے انہاں کوں سہولتاں ݙیوݨ اچ اوکھ اے، وفاقی حکومت ولوں جدید تقاضیاں کوں ݙیکھدیں ہوئیں انڈسٹری دے نال منسلک ہنر ٻالڑیاں کوں ݙتا ویندا پئے۔ ٻالڑیاں کوں بیوٹی پارلر اتے کوکنگ دے علاوہ کوئی سکلز نہ ہئی لیکن ہݨ شی فیکسز دے ناں نال انہاں ٻالڑیاں کوں جدید تربیت فراہم کیتی ویندی پئی اے۔ انفارمیشن ٹیکنالوجی اتے آرٹیفیشل انٹیلی جنس کوں ترجیح ݙتی ویندی پئی اے، پورے صوبے اچ جیڑھی سپورٹ دی لوڑھ اے میݙی وزارت ولوں ہر ممکن ٹیکنیکل تے فنانشل سپورٹ ݙتی ویسی ۔ اساں ساریاں کوں رَل تے بلوچستان دے نوجواناں کوں اڳوں گھن آوݨا پوسی، بلوچستان ترقی کریسی، بلوچستان خوشحال تھیسی تاں پاکستان ترقی یافتہ اتے خوشحال تھیسی، بلوچستان حکومت دی ترجیح اچ شامل اے، پورے پاکستان اچ سکالرشپس وغیرہ اچ بلوچستان کیتے ودھ حصہ رکھیا ویندا پئے او طلباء جو کہیں وی وجہ توں اڳوں نئیں آ سڳے انہاں کوں اے موقع ݙتا ویسی۔وزیر اعظم سکلز دے تحت 4000 دے نیڑے نوجواناں کوں ہنر مند بݨایا ڳئے، وزیر اعظم سکلز ڈویلپمنٹ پروگرام دے تحت 44 ہزار نوجواناں کوں تربیت ݙتی ڳئی اے،بلوچستان دے نوجواناں کوں قومی دھارے اچ گھن آوݨ، تریمتیں کوں بااختیار معاشی طور تے خودمختار بݨاوݨ کیتے حکومت پاکستان پاورٹی ایلویشن پروگرام دے نال رَل تے کم کریندی پئی اے۔ انفارمیشن ٹیکنالوجی، ٹیکسٹائل، تعمیرات، زراعت، موسمیاتی تبدیلی سویں شعبے شامل ہن، وفاقی حکومت ایں بارے مکمل تعاون کریسی، نوجوان پاکستان دا مستقبل ہن انہاں کوں امپاور کرݨ کیتے رَل تے کوششاں دی لوڑھ اے۔