پاکستان اتے چین ترقی تے ٹر پئے، پاک امریکہ تعلقات ٻئے ڳھاٹے تھیندے پئن، ملکی معیشت ترقی کریندی پئی اے، ریلوے اچ مثبت تبدیلی ݙسدی اے، وزیراعظم دا پاک بزنس ایکسپریس ٹرین دی تقریب نال خطاب

لاہور۔29جولائی(اے پی پی)وزیراعظم محمد شہباز شریف آکھیے جو پاکستان اتے چین ترقی دیاں نویاں راہواں تے ٹر پئن، پاک امریکہ تعلقات نویں دور اچ ویندے پین، ملکی معیشت درست سمت تے ٹر پئی اے اتے ریلوے دا شعبہ مثبت تبدیلی ݙکھیندا پئے۔ اے ڳالھ انہاں لاہور ریلوے اسٹیشن تے پاک بزنس ایکسپریس ٹرین دی افتتاحی تقریب نال خطاب اچ آکھی۔ تقریب اچ وفاقی وزیر ریلوے حنیف عباسی، وفاقی وزیر اطلاعات و نشریات عطا اللہ تارڑ، ریلوے حکام اتے ٻئے اہم لوک وی موجود ہن۔ وزیراعظم محمد شہباز شریف آکھیا جو اڄ مدت بعد میکوں ریلوے اسٹیشن لاہور اچ خوشگوار تبدیلی ݙیکھݨ کوں ملی اے، پاکستان ریلوے اچ مثبت تبدیلی ݙسدی پئی اے، پاک بزنس ٹرین اچ صرف اشرافیہ کیتے ہی نئیں عام آدمی کیتے وی یورپی ریلوے آلی کار شاندار سفری سہولتاں ݙتیاں ڳن، ٹکٹ دا پراݨا نظام ختم کر تے جدید ڈیجیٹائز سسٹم متعارف کرایا ڳیا، مسافر لاؤنج، استقبالیہ ڈیسک اتے ٹرین اچ یورپ آلی کار مسافراں کیتے شاندار انتظامات تے وزیر ریلوے کوں مبارکباد ݙینداں۔ وزیراعظم محمد شہباز شریف آکھیا جو وفاقی وزیر حنیف عباسی ریلوے کوں ولا اپݨے پیریں تے آن کھڑا کیتے، ریلوے دی بہتری کیتے اڄ میݙا خواب پورا تھی ڳئے۔ انہاں آکھیا جو ترقی کیتے حالی اساں ٻئے ٻہوں پندھ کرݨن، اداریاں دی بہتری اتے ملکی ترقی کیتے ساکوں ݙینھ رات کم کرݨے، محنت اتے دیانت کوں اپنا تے ملک دی تقدیر بدلی ونڄ سڳدی اے، ڄڳ کوں ݙِکھا ݙیسوں، ڄیکر نیت نیک اتے ارادہ پکا ہووے تاں وݙے توں وݙی منزل وی پاتی ونڄ سڳدی اے۔ ایں موقع تے وزیراعظم  آکھیا جو 9 مئی دے معرکہ حق اچ پاک فوج دلیری اتے مہارت نال دشمن دا مقابلہ کیتے، جنگ جیتݨ دے بعد پاکستان دا عالمی سطح تے ماݨ ودھیے اتے پورے ڄڳ ڄاݨ ڳھدے جو کیویں ساݙیاں فضائی، بری اتے بحری افواج بہادری، مہارت اتے جدید ٹیکنالوجی نال ٻہوں ہی گھٹ ویلھے اچ اپݨے توں وݙے دشمن کوں نک دے لیکے کݙھوائن جیندا میں آپ گواہ ہاں، پاکستان بھارت کوں جنگ اچ تاریخی شکست ݙتی، ایہہ پاکستان دی سفارتی کامیابی دی جیندی ڄاڳدی مثال اے۔ وزیراعظم آکھیا جو اساݙے ایٹمی اثاثے قومی سلامتی دے ضامن ہین، دشمن ساݙو میلی اکھ نال ݙیکھݨ دی جرات نئیں کر سڳدا۔ وزیر اعظم آکھیا جو عسکری فتح دے نال نال معاشی میدان اچ وی کامیابی ملی اے، حکومتی اقدامات پاروں مہنگائی اچ واضح کمی آئی اے، افراط زر دی شرح اچ 5 فیصد کمی آئی اے، معاشی اشاریے بہتری دو ٹردے پین، اے معاشی کامیابی ٹیم ورک دا نتیجہ اے، آوݨ آلے ݙینھاں اچ معاشی میدان اچ ٻیاں کامیابیاں ملسن۔ چین پاکستان شاندار تعلقات دے حوالے نال وزیراعظم محمد شہباز شریف آکھیا جو پاکستان اتے چین ترقی دیاں نویاں راہواں تے گامزن ہن، چین دے نال سی پیک فیز 2 کیتے پوری طرح کوآرڈی نیشن اے۔ وزیراعظم آکھیا جو امریکا دے نال نویں سروں تعلقات ودھاوݨ کیتے اقدامات کیتے ویندے پئن۔ ایں توں پہلے وزیراعظم محمد شہباز شریف مسافر لاؤنج، استقبالیہ سودھا لاہور ریلوے اسٹیشن دے مختلف شعبیاں دا دورہ کیتا۔ بعداچ انہاں پاک بزنس ایکسپریس ٹرین دا افتتاح کیتا اتے ٹرین کوچز دا معائنہ کیتا۔ ایں موقع تے وفاقی وزیر وزیراعظم کوں بریفنگ ݙتی اتے ݙسایا جو پاک بزنس ٹرین لاہور توں کراچی وچال چلسی اتے لاہور توں ساݙھے 18 گھنٹے اچ کراچی پُڄسی۔