بھارت وانگوں ایندی پراکسیز کوں وی ہائبرڈ جنگ اچ ایں انجام اتے ذلت دا سامݨا کرݨا پوسی، فیلڈ مارشل سید عاصم منیر

راولپنڈی۔30جولائی (اے پی پی) چیف آف آرمی سٹاف فیلڈ مارشل سید عاصم منیر نشان امتیاز (ملٹری) آکھیا جو معرکہ حق اچ بھارت کوں شکست وانگوں ایندی پراکسیز فتنۃ الخوارج اتے فتنۃ الہندستان کوں وی ہائبرڈ جنگ اچ ایجھے انجام اتے ذلت دا سامݨا کرݨا پوسی، دہشت گردی نال نبڑݨ کیتے متحد قومی ردعمل دی لوڑھ اے۔ پاک فوج دے شعبہ تعلقات عامہ (آئی ایس پی آر) موجب (بدھ) کوں 16ویں قومی ورکشاپ بلوچستان دے شرکا نال خطاب کریندیں ہوئیں آرمی چیف دہشت گردی دی لعنت کوں منڈھوں پٹݨ اتے قومی ہم آہنگی اتے انضمام کیتے بلوچستان دی سماجی تے اقتصادی ترقی کیتے پاک فوج دے غیر متزلزل عزم دا اعادہ کیتا۔ شرکا اچ ارکان پارلیمنٹ، سول سوسائٹی دے نمائندے، سرکاری ملازمین، ماہرین تعلیم، میڈیا دے نمائندے اتے نوجوان شامل ہن۔ آرمی چیف دہشت گرد پراکسیز دی بھارت دی کھلم کھلا سرپرستی دی شدید مذمت کیتی اتے اینکوں بلوچستان دے لوکاں دی مضبوط حب الوطنی کوں نشانہ بݨاوݨ دی ناکام کوشش قرار ݙتا۔ انہاں واضح کیتا جو معرکہ حق اچ شکست کھاوݨ دے بعد بھارت ہݨ آپݨے مذموم عزائم کوں اڳوں ودھاوݨ کیتے آپݨی پراکسی جنگ کوں ودھا ݙتے، آرمی چیف خاص طور تے فتنۃ الخوارج اتے فتنۃ الہندستان کوں پاکستان دے خلاف بھارتی ہائبرڈ جنگ دے پیادیاں دے طور تے استعمال کرݨ دا حوالہ ݙتا۔ آرمی چیف آکھیا جو انہاں پراکسیز کوں ایہو سویں انجام اتے ذلت دا سامݨا کرݨا پوسی جئیں ذلت دا سامݨا بھارت کوں معرکہ حق اچ کرݨا پئے۔ فیلڈ مارشل عاصم منیر زور ݙتا جو دہشت گرد مذہب، فرقے یا نسل دی کوئی حداں نئیں ڄاݨدے، ایں کیتے ایں خطرے نال نبڑݨ کیتے قومی سطح تے اجتماعی عزم دے نال متحد تھی تے جواب ݙیوݨ ضروری اے۔ آرمی چیف بلوچستان اچ ترقیاتی اقدامات دی اہمیت تے روشنی پاتی۔ انہاں صوبائی اتے قومی ترقی دے مقاصد دے حصول کیتے اداریاں وچال تعاون اتے ہم آہنگ قومی نقطہ نظر دی لوڑھ تے زور ݙتا۔ آرمی چیف خطے اچ امن کیتے پاکستان دے عزم دا اعادہ کریندیں ہوئیں قومی تیاری دی اہمیت کوں اجاگر کیتا۔ آرمی چیف علاقائی امن کیتے پاکستان دے عزم دا اعادہ کریندیں ہوئیں آکھیا جو کہیں وی ٻاہرلے یا اندرلے خطرے دا فیصلہ کن جواب ݙیوݨ، قومی وقار دے تحفظ اتے آپݨے شہریاں دی فلاح تے بہبود کوں یقینی بݨاوݨ کیتے قوم دی تیاری دی لوڑھ تے زور ݙتا۔