وزیراعظم دی طرفوں سردار اویس احمد خان لغاری دی کارکردگی دی تعریف وچ لکھیا ڳیا خط وزارتِ توانائی کوں مل ڳئے

اسلام آباد۔31جولائی (اے پی پی) وزیراعظم محمد شہباز شریف دی طرفوں وفاقی وزیر توانائی سردار اویس احمد خان لغاری دی کارکردگی دی تعریف وچ لکھیا ڳیا خط وزارتِ توانائی کوں مل ڳئے۔ وزارت توانائی توں جاری بیان موجب وفاقی وزیر توانائی دی توانائی دے شعبے وچ نمایاں اصلاحاتی اقدامات اتے بہترین کارکردگی دی تعریف کرݨ سانڳے خط لکھیا ڳئے۔خط وچ وزیراعظم سردار اویس لغاری دی قیادت دی تعریف کریندے آکھیا ڳیا جو اوکھے حالات وچ توانائی دے شعبے وچ اصلاحاتی ایجنڈے کوں کامیابی نال اڳوں ودھاوݨ انہاں دی مؤثر حکمتِ عملی، ادارہ جاتی تعاون اتے غیر معمولی محنت دا مظہر اے۔ خط وچ وزیراعظم ایں ڳالھ تے خصوصی زور ݙتا جو سردار اویس لغاری دیاں کوششاں نال 780 ارب روپے دے گردشی قرضے وچ نمایاں کمی ممکن تھئی جیں دے نتیجے وچ گردشی قرضے دا حجم گھٹ تھی تے 1,614 ارب روپے تئیں آڳئے، ایں کوں ہک غیر معمولی کامیابی قرار ݙتا ڳیا۔ایں توں انڄ 35 توں ودھ آئی پی پیز دے نال معاہدیں دی ول (نویں سروں) تشکیل اتے چھی معاہدیں دے خاتمے کوں ہک فیصلہ کن اصلاحاتی اقدام قرار ݙتا ڳئے جیں نال قومی خزانے کوں 3.6 کھرب روپے توں ودھ دی بچت ممکن تھئی۔خط وچ وزیرِاعظم فی یونٹ 8.35 روپے دی مجموعی ٹیرف وچ کمی دا وی ذکر کیتا جیں نال عوامی سطح تے براہ راست ریلیف ملیا ، صنعتی سرگرمیاں وچ بہتری آئی اتے ملکی معیشت تے مثبت اثرات پئن۔ خط وچ “اپݨا میٹر، اپنڑی ریڈنگ” جیھے عوام دوست اقدامات کوں جدید اتے جوابدہ طرزِ حکمرانی دی مثال قرار ݙتا ڳیا جیڑھا توانائی دے شعبے وچ عوام دے اعتماد دی بحالی وچ معاون ثابت تھیسن۔ خط دے آخر وچ وزیراعظم سردار اویس لغاری اتے انہاں دی ٹیم کوں خراج تحسین پیش کریندے امید ظاہر کیتی جو انہاں دیاں مسلسل کوششاں پاکستان دی توانائی دی سلامتی اتے معاشی استحکام کوں مزید تقویت ݙیسن