وفاقی وزیر صحت مصطفی کمال دی صدارت اچ نیشنل ای پی آئی اجلاس

اسلام آباد۔31جولائی (اے پی پی) وفاقی وزیر صحت مصطفی کمال دی صدارت اچ نیشنل ایکسٹینڈڈ پروگرام آف امیونائزیشن (ای پی آئی) دا اعلیٰ سطحی جائزہ اجلاس تھیا۔ اجلاس وچ وفاقی وزیر صحت کوں ملک وچ حفاظتی ٹیکے لاوݨ دے پروگرام دے تحت جاری سرگرمیاں، کوریج، چیلنجز اتے مستقبل دے اہداف تے تفصیلی بریفنگ ݙتی ڳئی۔وفاقی وزیر صحت مصطفی کمال آکھیا جو ای پی آئی دی کامیابی کیتے وفاق اتے صوبیں وچال نیڑے رابطہ اتے ہم آہنگی ناگزیر اے، اساݙا ہدف سرگرمیاں دی تعداد نی بلکہ بیماریاں دا ٻوجھ گھٹ کرݨ اتے ہک صحت مند معاشرے دا قیام اے۔ انہاں سروس ڈلیوری اتے عوامی تاثر وچال موجود خلاء کوں ختم کرݨ کیتے مؤثر تجویزاں پیش کیتیاں اتے ایں ڳالھ تے زور ݙتا جو پاکستان دا کوئی وی ٻال حفاظتی ٹیکیں دی کوریج توں محروم نی رہݨا چا ہیدا۔وزیر صحت آکھیا جو اساں کوں بہتر حکمت عملی دے پاسے ونڄݨا ہوسی جتھاں والدین خود حفاظتی ٹیکیں دی اہمیت کوں سمجھن، خود مراکز صحت دا رُخ کرن اتے رضاکارانہ طور تے ٻالاں کوں ویکسین لواون۔ انہاں آکھیا جو اصل کامیابی اوں ویلھے ہوسی جݙاں معاشرہ ویکسین کیتے خود حکومت توں رجوع کریسی، بیماری توں بچݨ اساݙی پہلی ترجیح ہووݨی چاہیدی اے۔ وزیر صحت آکھیا جو پاکستان دا ہیلتھ کیئر سسٹم ہݨ وی ہک “سک کیئر” سسٹم اے جتھاں توجہ بیماری دے بعد علاج تے ݙتی ویندی اے۔ اساں کوں وزارت صحت کوں حقیقی معنیں وچ ہیلتھ کیئر منسٹری بݨاوݨا ہوسی جتھاں بیماریاں توں بچݨ کوں ترجیح ݙتی ونڄے اتے ٻالاں کوں بیمار تھیوݨ توں پہلے بچایا ونڄے۔اجلاس وچ ایں ڳالھ تے اتفاق کیتا ڳیا جو حفاظتی ٹیکیں دی کوریج کوں 95 فیصد تئیں گھن آوݨ کیتے سارے وسائل اتے اقدامات کوں یقینی بݨایا ویسی تاں جو پاکستان کوں ہک صحت مند قوم آلے پاسے گھن ونڄ سڳے. اجلاس وچ چارے صوبیں، آزاد جموں و کشمیر، گلگت بلتستان سودھے عالمی شراکت داراں یونیسف، عالمی ادارہ صحت (ڈبلیو ایچ او)، گاوی اتے گیٹس فاؤنڈیشن دے نمائندیں شرکت کیتی