سپیکر قومی اسمبلی ایاز صادق اتے برطانوی ہاؤس آف کامنز دے سپیکر سر لنزے ہوئل دی ملاقات

جنیوا۔31جولائی (اے پی پی) سپیکر قومی اسمبلی سردار ایاز صادق اتے برطانوی ہاؤس آف کامنز دے اسپیکر سر لنزے ہوئل دی ملاقات تھئی جیں وچ ݙوہائیں رہنماواں ݙو طرفہ پارلیمانی تعاون، جمہوری اقدار دے ودھارے تے سانجھی دلچسپی دے امور تے تفصیلی ڳالھ مہاڑ کیتی۔ قومی اسمبلی سیکرٹریٹ موجب اے ملاقات جنیوا وچ چیھویں سپیکرز کانفرنس دے موقع تے تھئی۔ایں موقع تے سپیکر سردار ایاز صادق آکھیا جو پاکستان، برطانیہ دے نال اپݨے پراݨے، تاریخی اتے خوشگوار تعلقات کوں اہمیت ݙیندے۔ انہاں ݙوہائیں ملکاں دیاں پارلیماناں وچال رابطے کوں مزید ودھاوݨ دی لوڑھ تے زور ݙتا تاں جو عوامی سطح تے تعلقات کوں مزید مضبوط بݨایا ونڄ سڳے۔ انہاں آکھیا جو پاکستان دی قومی اسمبلی اتے برطانیہ دی ہاؤس آف کامنز وچال پارلیمانی تعاون نال نہ صرف جمہوری روایتاں کوں ودھارا ملسی بلکہ ݙو طرفہ تعلقات وچ وی نویں جہتاں پیدا تھیسن۔سپیکر قومی اسمبلی ایں ڳالھ تے وی زور ݙتا جو برطانیہ وچ رہݨ آلی پاکستانی کمیونٹی ݙوہائیں ملکاں وچال ھک تکڑے پُل دا کردار ادا کریندی پئی اے جیں دے ذریعے ثقافتی، تعلیمی اتے تجارتی شعبیں وچ تعاون کوں مزید ودھارا مل سڳدے۔سپیکر سردار ایاز صادق ملاقات دے دوران مقبوضہ جموں و کشمیر دی صورتحال تے وی روشنی پاتی اتے آکھیا جو بھارت دی طرفوں انسانی حقوق دیاں مسلسل خلاف ورزیاں بین الاقوامی قوانین اتے انسانی اقدار دے خلاف ہن۔ انہاں آکھیا جو مسئلہ کشمیر دا حل اقوام متحدہ دی سلامتی کونسل دیاں قرارداداں موجب ناگزیر اے تاں جو خطے وچ پائیدار امن قائم تھی سڳے۔ݙوہائیں سپیکرز ایں ڳالھ تے اتفاق کیتا جو دنیا کوں درپیش چیلنجز، خصوصاً جمہوری انحطاط، انسانی حقوق دیاں خلاف ورزیاں، اتے عالمی امن و سلامتی دے مسئلیں دے حل کیتے پارلیمانی سفارت کاری دا ودھارا ویلھے دی اہم لوڑھ اے۔ ݙوہائیں رہنماواں جمہوری اقدار دے تحفظ اتے پارلیمانی تعاون کوں مزید ودھاوݨ دے سانجھے عزم دا اعادہ کیتا