وزیراعظم دی اڳواݨی اچ انسداد دہشت گردی و ریاستی رٹ بارے سٹیئرنگ کمیٹی دا جائزہ اجلاس

اسلام آباد۔31جولائی(اے پی پی)وزیراعظم محمد شہباز شریف ملک توں دہشت گردی دیاں پاراں پٹݨ دا عزم دوہریندے آکھیے جو پورا ڄڳ دہشت گرداں دے خلاف اساݙیاں کامیاب کارروائیاں کوں منیندے، پاکستان دیاں بہادر افواج آپریشن رد الفساد اتے ضرب عضب اچ دہشت گرداں دا وݙا مقابلہ کیتے اتے ہݨ تاریخ ساز معرکہ حق اچ ڄق پاکستان دی فتح وی منی اے۔ اے ڳالھ انہاں اسلام آباد اچ انسداد دہشت گردی و ریاستی رٹ بارے سٹیئرنگ کمیٹی دے جائزہ اجلاس دی اڳواݨی کریندے آکھی۔ انہاں آکھیا جو ریاست پاکستان دہشت گردی دے خلاف جنگ اچ کثیر الجہتی حکمت عملی اپنائی اے، پاکستان ولوں زمینی آپریشن، متعلقہ قانون سازی، بامعنی عوامی رابطے اتے انتہاء پسند سوچ دی حوصلہ شکنی ڄھیں اہم عناصر دا بھرپور اتے مؤثر استعمال کیتا ڳیا۔ کمیٹی دی دہشت گردی دے خلاف وفاقی و صوبائی حکومتاں وچال ہم آہنگی کوں مؤثر بݨاوݨ اتے ایں سانڳے کمیٹی دیاں سفارشاں تے سختی نال عملدرآمد دی ہدایت کریندے انہاں آکھیا جو بہادر افواج دے سپوتاں دا دہشت گردی دے خلاف ایں جنگ اچ کردار قابل تعریف و قابل تحسین اے، وطن کیتے اپݨیاں جاناں دا نذرانہ پیش کرݨ آلے اہلکار و افسران اتے قربانی دے جذبے نال سرشار انہاں دے اہل خانہ اتے میݙے سودھا پوری قوم کوں ماݨ اے۔ وزیراعظم آکھیا جو دہشت گردی دے خلاف جنگ اچ پوری پاکستانی قوم، بہادر افواج، قانون نافذ کرݨ آلے ادارے، انٹیلی جنس ادارے متحد اتے ہک مٹھ ہن، صوبائی حکومتاں، انٹیلی جنس بیورو، وزارت داخلہ، کاؤنٹر ٹیررازم ڈیپارٹمنٹ بالخصوص پنجاب انسداد دہشت گردی ڈیپارٹمنٹ دہشت گردی دے خلاف ایں جنگ اچ وݙے مؤثر اقدامات کیتن، پاکستان کوں فتنتہ الہندوستان اتے فتنتہ الخوارج اتے ایہو ڄھیں ݙوجھے سماج دشمن عناصر دے مکمل خاتمے کیتے کمیٹی جامع، مؤثر اتے قابل عمل حکمت عملی تے کم کریندی پئی اے۔ وزیراعظم آکھیا جو سارے متعلقہ اداریاں دیاں مشترکہ کارروائیاں و تعاون نال سمگلنگ دے خلاف مؤثر کارروائیاں کیتاں ڳئین جیںدے نال سمگلنگ روکݨ ممکن تھئی، سمگلنگ روکݨ نال معیشت تے مثبت اثرات پئین، دہشت گردی توں پاک اتے پرامن مضبوط ریاستی ڈھانچہ ہی بین الاقوامی سطح تے سرمایہ کاراں دے اعتماد کوں بحال کریندے، بین الاقوامی سطح تے سرمایہ کاراں دے اعتماد دی بحالی کیتے حکومت سارے نظام دی ڈیجیٹلائزیشن اتے ٹیکس سسٹم اچ بہتری دیاں انقلابی تبدیلیاں کیتن۔ وزیراعظم آکھیا جو پاکستان سٹاک ایکسچینج اچ ریکارڈ اضافہ اتے گلوبل ریٹنگز اچ بہتری پاکستان دی معیشت اچ استحکام دی نشاندہی کریندی اے اتے ایںدے نال بیرونی سرمایہ کار دا اعتماد بحال ہوسی، غیر قانونی طور تے پاکستان اچ مقیم افغان شہریاں دی بین الاقوامی قوانین دے عین مطابق وطن واپسی دے پروگرام تے عملدرآمد مؤثر طور تے جاری اے۔ اجلاس اچ نائب وزیراعظم محمد اسحاق ڈار، فیلڈ مارشل چیف آف آرمی سٹاف سید عاصم منیر، نیشنل سکیورٹی ایڈوائزر لیفٹیننٹ جنرل محمد عاصم ملک، وفاقی وزیر اطلاعات و نشریات عطاء اللہ تارڑ، وفاقی وزیر قانون اعظم نذیرتارڑ، وفاقی وزیر اکنامک افیئرز ڈویژن احد خان چیمہ، وزیراعظم دے مشیر برائے بین الصوبائی تعاون رانا ثنا اللہ، وزیر مملکت برائے داخلہ طلال چوہدری، سارے صوبیاں دے چیف سیکرٹریز، انسپکٹر جنرلز اتے متعلقہ سرکاری حکام شرکت کیتی۔