صادق آباد اچ شیخانی پولیس چوکی تے کچے دے ڈاکوواں دے حملے اچ ایلیٹ فورس دے 5 اہلکار شہید

صادق آباد۔01 اگست (اے پی پی) ضلع رحیم یار خان دی تحصیل صادق آباد اچ شیخانی پولیس چوکی تے کچے دے ڈاکواں دے حملے اچ ایلیٹ فورس دے 5 اہلکار شہید تھی ڳئے جݙاں جو پولیس اتے ڈاکواں وچال فائرنگ دے تبادلے اچ ہک ڈاکو ماریا ڳیا۔ رات گئے درجناں ڈاکواں ماہی چوک دے نیڑے پولیس چوکی تے حملہ کیتا، پولیس اتے ڈاکواں وچال شدید فائرنگ دا تبادلہ تھیا۔ ڈاکواں دے حملے اچ 5 پولیس اہلکار شہید تھی ڳئے جنہاں اچ کانسٹیبل محمد عرفان، کانسٹیبل محمد سلیم، کانسٹیبل محمد خلیل، کانسٹیبل نخیل اتے غضنفر عباس شامل ہن۔ حملے اچ شہید تھیوݨ آلے 2 پولیس اہلکاراں دا تعلق رحیم یار خان توں جݙاں جو 3 دا تعلق بہاولنگر توں اے۔ شہید تھیوݨ آلے پولیس اہلکاراں دی لاشاں شیخ زید ہسپتال منتقل کر ݙیتی ڳئن۔ پولیس اتے ڈاکوواں وچال ݙو پاسہ فائرنگ دے تبادلے اچ ہک ڈاکو وی ہلاک تھی ڳیا۔ ڈاکواں دے پولیس چوکی تے حملے دے بعد ڈی پی او عرفان علی سموں بھاری نفری دے نال موقع تے پُڄ ڳئے، پولیس حملہ کرتے فرار تھیوݨ آلے ڈاکواں نال مقابلہ اتے پیچھا کریندی پئی اے۔ ڈی پی او عرفان علی سموں آکھیا جو ڈاکواں کوں بزدلانہ حملے دا خمیازہ بھگتنا پوسی، ڈاکو ریاست اتے قانون توں بالاتر نئیں تھی سڳدے، ڈاکواں کوں کیفر کردار تئیں پُڄا تے ساہ گھنسوں۔ شہید پولیس اہلکاراں دی نماز جنازہ اڄ جمعے کوں ݙوپہر ݙیڈھ وڄے پولیس لائنز رحیم یار خان اچ ادا کیتی ویسی