بار دی سیاست کوں بارز تئیں محدود رکھݨا چا ہیدے تاں جو عدلیہ اتے وکلا دا ادارہ غیر جانبدار تشخص برقرار رکھ سڳے، وزیرِ قانون اعظم نذیر تارڑ

اسلام آباد۔1اگست (اے پی پی) وفاقی وزیر قانون و انصاف سینیٹر اعظم نذیر تارڑ نال ملتان ہائی کورٹ بار ایسوسی ایشن سودھے جنوبی پنجاب دی بار ایسوسی ایشنز دے وفداں ملاقات کیتی۔ ملاقات وچ وکلا دی فلاح و بہبود، بار ایسوسی ایشنز کوں درپیش مسئلیں اتے انہاں دے مؤثر حل تے تفصیلی ڳالھ مہاڑ تھئی۔ ملتان ہائی کورٹ بار دے صدر وکلا برادری سانڳے کیتے ڳئے حکومتی اقدامات تے وزیرِ قانون دا شکریہ ادا کیتا اتے آکھیا جو وزارتِ قانون دا کردار قابلِ تحسین اے۔ وزارت قانون و انصاف توں جاری پریس ریلیز موجب وفاقی وزیر قانون سارے نمائندیں نال ڳالھ مہاڑ کریندے ہوئیں ایں ڳالھ تے زور ݙتا جو بار دی سیاست کوں بارز تئیں محدود رکھݨا چا ہیدے تاں جو عدلیہ اتے وکلا دا ادارہ غیر جانبدار اتے خودمختار حیثیت برقرار رکھ سڳے۔ انہاں آکھیا جو وزارتِ قانون وکلا دی فلاح و بہبود کوں اپݨیاں ترجیحات وچ ساریں توں اڳوں رکھیندی اے اتے انہاں دے جائز مسئلیں دے حل کیتے ہر ممکن تعاون کریسی۔ ای لاءبریریز اتے سولرائزیشن پراجیکٹس حکومت پنجاب دے تعاون نال جاری ہن۔ کورٹ فیس دا پراݨا مسئلہ وزیراعلیٰ پنجاب مریم نواز شریف دی ہدایت تے حل کر ݙتا ڳئے۔ملاقات وچ شجاع آباد، جہانیاں، لودھراں، دنیا پور، ڈیرہ غازی خان، کوٹ ادو، راجن پور، مظفرڳڑھ، علی پور، جتوئی، جلال پور، کبیر آلا اتے بورے آلا بارز دے صدور اتے نمائندیں وی شرکت کیتی اتے اپݨے اپݨے علاقیں وچ وکلا کوں پیش آندے مسئلیں دا وزیر قانون کوں ݙسایا۔ سینیٹر اعظم نذیر تارڑ سارے بار نمائندیں کوں یقین ݙیوایا جو انہاں دے مسئلیں کوں ترجیحی بنیاداں تے حل کیتا ویسی اتے بارز دے نال رابطے کوں مزید تکڑا بݨایا ویسی