برآمدات وچ نمایاں بہتری ݙیکھݨ وچ آئی اے، پاکستان دا تجارتی شعبہ بدلدے عالمی حالات وچ ڈھلݨ دی صلاحیت رکھیندے ، جام کمال خان

اسلام آباد۔1اگست (اے پی پی) وفاقی وزیر تجارت جام کمال خان آکھیے جو ویلیو ایڈڈ اتے غیر روایتی برآمدات وچ اساݙی کامیابی ایں ڳالھ دا ثبوت اے جو پاکستان دا تجارتی شعبہ بدلدے عالمی حالات وچ ڈھلݨ دی صلاحیت رکھیندے ۔ اے ڳالھ انہاں وزارت تجارت وچ مالی سال 25-2024 دے دوران پاکستان دی تجارتی کارکردگی دے جائزے کیتے اعلیٰ سطحی اجلاس توں ڳالھ مہاڑ کریندے آکھی ۔ جاری پریس ریلیز موجب اجلاس وچ وزارت دے سینئر افسراں شرکت کیتی جیں وچ عالمی تجارتی چیلنجز دے باوجود پاکستان دی برآمداتی حکمت عملی دا جائزہ اتے اڳوں دے لائحہ عمل تے ڳالھ مہاڑ کیتی ڳئی۔عالمی سطح تے جاری تجارتی جھیڑے، معاشی سست روی، قیمتاں دی سخت مسابقت اتے جغرافیائی سیاسی کشیدگیاں دے باوجود پاکستان دیاں برآمدات استحکام دا مظاہرہ کیتا۔ مالی سال 25-2024 دے دوران ملک دیاں کُل برآمدات 31.75 ارب امریکی ڈالر تئیں پُڄ ڳئیاں جیڑھی جو گزریل مالی سال 30.76 ارب امریکی ڈالر ہن یعنی برآمدات وچ نمایاں بہتری ݙیکھݨ وچ آئی جیں دا زیادہ تر کریڈٹ ویلیو ایڈڈ اتے غیر روایتی شعبیں کوں ویندے۔ برآمدات وچ ودھارے دے نمایاں شعبے جنہاں وچ ٹیکسٹائل اتے ملبوسات دا شعبہ، تیار ملبوسات وچ 15 فیصد اضافہ، سیتے ہوئے ملبوسات وچ 16 فیصد ودھارا، ہوم ٹیکسٹائلز وچ 9 فیصد ودھارا، تمباخوں اتے سگریٹس وچ 135 فیصد غیر معمولی ودھارا ، پلاسٹک مصنوعات وچ 17 فیصد ودھارا، سیمٹ دیاں برآمدات وچ 25 فیصد ودھارا، دوائیں اتے آئی سی ٹی متعلق خدمات دیاں برآمدات وچ وی مثبت پیش رفت ݙیکھݨ وچ آئی اے۔وزیر تجارت انہاں شعبہ جات دی کارکردگی دی تعریف کیتی تے آکھیے جو غیر روایتی برآمدات وچ ودھارا پاکستان دی لمبے عرصے دی تجارتی پالیسی کیتے چنڳی علامت اے۔ جام کمال آکھیا جو درآمدات دے حوالے نال سرمایہ جاتی چیزاں وچ 24 فیصد ودھارا ریکارڈ کیتا ڳیا جیڑھا جو ملکی صنعت دی بحالی اتے صارفین دے اعتماد وچ بہتری دی علامت اے۔ اجلاس وچ وفاقی وزیر دی طرفوں اہم ہدایت وی جاری کیتیاں ڳئن جنہاں وچ ملک مخصوص برآمداتی منصوبے، خاص طور تے ابھردیاں ہوئیاں اتے غیر روایتی منڈیاں تے توجہ، ٹریڈ الرٹ سسٹم دا قیام تاں جو عالمی سطح تے تجارتی رکاوٹاں، SPS/TBT معاملات اتے تجارتی اقدامات دا وختی جواب ݙتا ونڄ سڳے. ایں دے علاوہ سیکٹورل ایکسپورٹ کونسلز دی فعالی تاں جو نجی شعبے توں مؤثر مشاورت اتے پالیسی سازی کوں بہتر بݨایا ونڄ سڳے، مصنوعی ذہانت اتے ڈیٹا اینالٹکس دے ذریعے تجارتی انٹیلی جنس، مصنوعات و منڈی دی مطابقت اتے مارکیٹنگ کوں جدید خطوط تے استوار کرݨ، سروسز ایکسپورٹس (خصوصاً ICT، فری لانسنگ اتے تخلیقی صنعتاں) دے ودھارے کیتے جامع قومی حکمت عملی دی تیاری دے بارے وچ ہدایت جاری کیتیاں ڳئن۔وزیر تجارت جام کمال خان آکھیا جو ویلیو ایڈڈ اتے غیر روایتی برآمدات وچ اساݙی کامیابی ایں ڳالھ دا ثبوت اے جو پاکستان دا تجارتی شعبہ بدلدے عالمی حالات وچ ڈھلݨ دی صلاحیت رکھیندے ، حکومت تجارتی برادری کوں سہولتاں ݙیوݨ ، نویں منڈیاں تئیں رسائی یقینی بݨاوݨ اتے ݙو طرفہ و کثیرالطرفہ فریم ورکس جیھے FTA/PTA کوں بھرپور طریقے نال استعمال کرݨ کیتے پُرعزم اے۔ انہاں آکھیا جو تجارت اساݙی معیشت دی تبدیلی اتے روزگار دے موقع پیدا کرݨ دی کنجی (کلید) اے اتے وزارت ایں ہدف کوں گھنݨ سانڳے کم جاری رکھیسی