وزیراعظم شہباز شریف دی دعوت تے ایران دے صدر ڈاکٹر مسعود پیزشکیان 2 اگست توں پاکستان دا ݙو ݙینھ دا سرکاری دورہ کریسن

اسلام آباد۔1اگست (اے پی پی) وزیراعظم محمد شہباز شریف دی دعوت تے اسلامی جمہوریہ ایران دے صدر ڈاکٹر مسعود پیزشکیان 2 توں 3 اگست تئیں پاکستان دا ݙو ݙینھ دا سرکاری دورہ کریسن۔ ترجمان دفترخارجہ موجب ڈاکٹرمسعود پیزشکیان دے نال ہک اعلیٰ سطح دا وفد ہوسی جیں وچ ایران دے وزیر خارجہ سید عباس عراقچی، سینئر وزراء اتے ݙوجھے اعلیٰ حکام شامل ہوسن۔اپݨے قیام دے دوران ایرانی صدر مسعود پیزشکیان صدر مملکت آصف علی زرداری نال ملاقات دے علاوہ وزیراعظم محمد شہباز شریف نال وفد دی سطح تے ڳالھ مہاڑ وی کریسن۔ واضح رہے جو ایران دے صدر دی حیثیت نال ڈاکٹرمسعود پیزشکیان دا اے پاکستان دا پہلا سرکاری دورہ اے۔ وزیراعظم شہباز شریف چھیکڑی واری 26 مئی 2025 کوں ایران دا دورہ کیتا ہئی۔ ایرانی صدر دے دورہ پاکستان نال پاکستان اتے ایران دے برادرانہ تعلقات مزید تکڑے تے مستحکم تھیسن