پاکستان اتے چین وچال سٹریٹجک تعلقات سانجھے اعتماد، غیرمتزلزل حمایت اتے سانجھے عزم دی مثال ہن، فیلڈ مارشل سید عاصم منیر

راولپنڈی۔1اگست (اے پی پی) آرمی چیف فیلڈ مارشل جنرل سید عاصم منیرآکھیے جو پاکستان اتے چین وچال سٹریٹجک تعلقات باہمی اعتماد، غیرمتزلزل حمایت اتے سانجھے عزم دی مثال ہن، انہاں دی پائیدار شراکت علاقائی استحکام کوں ودھارا ݙیوݨ اتے مشترکہ سٹریٹجک مفادات دے تحفظ وچ اہم کردار ادا کریندی رہسی۔ پاک فوج دے شعبہ تعلقات عامہ (آئی ایس پی آر) توں جاری بیان موجب چین دی پیپلز لبریشن آرمی (پی ایل اے) دے قیام دی 98 ویں سالگرہ جی ایچ کیو وچ منائی ڳئی۔ پاکستان وچ عوامی جمہوریہ چین دے سفیر جیانگ زائی ڈونگ ایں موقع تے مہمان خصوصی ہن۔ تقریب وچ ڈیفنس اتاشی میجر جنرل وانگ ژونگ، چینی سفارت خانے دے حکام اتے پاکستان دیاں تِرائی مسلح افواج دے سینئر عسکری افسراں وی شرکت کیتی۔آرمی چیف، فیلڈ مارشل جنرل سید عاصم منیر چینی مہماناں دا استقبال کیتا اتے پی ایل اے کوں ایں دی 98ویں سالگرہ تے مبارخ ݙتی۔ انہاں چین دے دفاع، سلامتی اتے قوم دی تعمیر وچ پی ایل اے دے اہم کردار دی تعریف کیتی۔ آرمی چیف پاکستان-چین تعلقات دی مضبوطی اتے سٹریٹجک اہمیت تے زور ݙیندے ہوئیں آکھیا جو ݙوہائیں ملکاں وچال تعلقات منفرد، سدا بہار اتے بدلدے علاقائی و عالمی چیلنجز دے باوجود غیر معمولی طورتے مستحکم ہن۔ فیلڈ مارشل آکھیا جو پاکستان اتے چین وچال سٹریٹجک تعلقات سانجھے اعتماد، غیرمتزلزل حمایت اتے مشترکہ عزم دی مثال ہن۔ انہاں زور ݙتا جو بدلدی ہوئی سٹریٹجک حرکیات دے باوجود ݙوہائیں ملکاں دی دوستی مستحکم اتے ناقابلِ شکست رہی اے۔اپݨے خطاب دے چھیکڑ وچ فیلڈ مارشل سید عاصم منیر آکھیا جو پاکستانی فوج اتے پی ایل اے سچے بھراواں وانڳوں ہن۔ انہاں دی پائیدار شراکت علاقائی استحکام کوں ودھارا ݙیوݨ اتے مشترکہ سٹریٹجک مفادات دے تحفظ وچ اہم کردار ادا کریندی رہسی۔ تقریب توں خطاب کریندے چینی سفیر پی ایل اے دی 98ویں سالڳنڈھ مناوݨ کیتے تقریب دی میزبانی تے آرمی چیف دا خلوص نال شکریہ ادا کیتا۔ انہاں دہشت گردی دے خلاف جنگ وچ پاکستانی مسلح افواج دے مستحکم کردار دی تعریف کیتی اتے پاکستان نال چین دی سٹریٹجک شراکت کیتے غیرمتزلزل حمایت اتے عزم دا اعادہ کیتا۔