وفاقی وزیر اورنگزیب کھچی لوک ورثہ وچ میو کمیونٹی دے ثقافتی ڈائیوراما دا افتتاح کر ݙتا

اسلام آباد۔1اگست (اے پی پی) وفاقی وزیر قومی ورثہ و ثقافت ڈویژن اورنگزیب خان کھچی لوک ورثہ پاکستان نیشنل میوزیم آف ایتھنالوجی وچ “میو کمیونٹی” کیتے نویں ثقافتی ڈائیوراما دا افتتاح کیتا۔ ایں نمائشی ڈسپلے دا مقصد میو برادری دی تاریخ، ثقافت اتے روایتاں کوں اجاگر کرݨ اے۔تقریب توں خطاب کریندے وفاقی وزیر آکھیا جو میو برادری پاکستان دے ثقافتی منظر نامے دا اہم اتے متحرک حصہ اے، انہاں دیاں روایتاں، ثقافتی خدمات اتے تاریخی اہمیت کوں محفوظ رکھݨ اساݙی قومی ذمہ واری اے۔ انہاں لوک ورثہ دی طرفوں پسماندہ طبقیں دی نمائندگی دے اقدامات کوں چنڳاں آکھیا۔ایں تقریب وچ پارلیمانی سیکرٹری فرح ناز اکبر، سیکرٹری اسد رحمان گیلانی، ایگزیکٹو ڈائریکٹر لوک ورثہ ڈاکٹر محمد وقاص سلیم اتے وݙی تعداد وچ میو کمیونٹی دے لوک شریک ہن۔ اے ڈسپلے میو کمیونٹی دے تعاون نال تیار کیتا ڳئے۔ ڈاکٹر وقاص سلیم آکھیا جو اے اقدام لوک ورثہ دے وژن “ثقافت دے ذریعے کمیونٹی ڈویلپمنٹ” دا حصہ اے۔ ہر کمیونٹی دی ہک کہانی ہوندی اے اتے اساݙا مقصد انہاں کہانیاں کوں قومی بیانیے دا حصہ بݨاوݨا اے۔میو برادری جیڑھی زیادہ تر جنوبی پنجاب اتے سندھ وچ آباد اے، زراعت، رنگین ملبوسات، صوفی موسیقی اتے لوک روایتاں وچ ہک منفرد سنڄاݨ رکھیندی اے۔ ڈسپلے وچ “سنگنگ کارنر” وی شامل اے جتھاں وفاقی وزیر میو زبان وچ صوفیانہ کلام سݨایا۔ وفاقی وزیر آکھیا جو وزیراعظم شہباز شریف دی قیادت وچ قومی ورثہ و ثقافت ڈویژن ملک دیاں ساریاں ثقافتی برادریاں دیاں خدمات و روایتاں کوں اجاگر کرݨ کیتے بھرپور اقدامات کریندا پئی اے۔