چیف جسٹس آف پاکستان جسٹس یحییٰ آفریدی دی صدارت اچ پشاور وچ عدالتی شعبے وچ اصلاحات دے تسلسل دے ودھارے اتے ادارہ جاتی رابطیں دا جائزہ اجلاس

اسلام آباد۔1اگست (اے پی پی) چیف جسٹس آف پاکستان جسٹس یحییٰ آفریدی دی صدارت اچ عدالتی شعبے وچ اصلاحات دے تسلسل دے ودھارے سانڳے پشاور وچ ہک اعلیٰ سطحی اجلاس تھیا جیں دا مقصد بار ایسوسی ایشنز اتے لاء اینڈ جسٹس کمیشن آف پاکستان وچال ادارہ جاتی رابطیں دا جائزہ گھنݨ اتے انہاں کوں بہتر بݨاوݨ ہئی۔اجلاس وچ چیف جسٹس پشاور ہائی کورٹ جسٹس ایس ایم عتیق شاہ، نائب چیئرمین پاکستان بار کونسل طاہر وڑائچ، نائب چیئرمین خیبر پختونخوا بار کونسل احمد فاروق خٹک، نائب صدر سپریم کورٹ بار ایسوسی ایشن فدا بہادر، چیئرمین ایگزیکٹو کمیٹی خیبر پختونخوا بار کونسل اکبر خان کوہستانی، رجسٹرار سپریم کورٹ آف پاکستان، رجسٹرار پشاور ہائی کورٹ، سیکرٹری لاء اینڈ جسٹس کمیشن آف پاکستان، حکومت خیبر پختونخوا دے سیکرٹریز خزانہ، قانون و پارلیمانی اموراتے منصوبہ بندی و ترقی، ڈائریکٹر جنرل کے پی جوڈیشل اکیڈمی، ڈائریکٹر پلاننگ پشاور ہائی کورٹ اتے وفاقی وزارت قانون و انصاف دے حکام شرکت کیتی۔ اجلاس دا مقصد انصاف ݙیوݨ کوں بہتر اتے قانونی برادری دی قانون سازی اتے پالیسی سازی وچ جامع نمائندگی کوں یقینی بݨاوݨ اے۔سپریم کورٹ دے شعبہ تعلقات عامہ توں جاری اعلامیے موجب اجلاس دے شروع وچ چیف جسٹس آف پاکستان شرکاء دا خیرمقدم کریندے ملک دے پرے دے ضلعیں دے اپݨے اڄوکے دوریں دے مشاہدے کوں شیئر کیتا جتھاں انہاں عدالتی انفراسٹرکچر دا جائزہ ڳھدا اتے اہم چیلنجز دی نشاندہی کیتی۔ انہاں آکھیا جے ترقیاتی فنڈز موجود ہن لیکن اداریں وچال گھٹ رابطیں دی وجہ نال مؤثر نافذ کرݨ وچ رکاوٹ پیدا تھئی اے۔ انہاں بار ایسوسی ایشنز کوں عدالتی ترقیاتی منصوبیں بالخصوص عدالتی کمپلیکسز متعلق منصوبیں وچ شامل کرݨ دی لوڑھ تے زور ݙتا۔چیف جسٹس آف پاکستان اجلاس دے شرکاء نال ڳالھ مہاڑ کریندے ہوئیں آکھیا جو رابطے دے ایں خلاء کوں ختم کرݨ کیتے کمیشن فیصلہ کیتے جو ہر صوبے وچ سینئر سطح دے نمائندے تعینات کیتے ویسن جیڑھے ہائی کورٹس وچ تعینات تھیسن اتے ضلعی بار ایسوسی ایشنز دے نال رابطہ کار دا کردار ادا کریسن، انہاں افسراں دیاں ذمہ واریاں عدالتی اصلاحات متعلق آگاہی پیدا کرݨ، مقامی ترجیحات دی نشاندہی کرݨ اتے تلویں سطح تے اصلاحات دی نگرانی کرݨ شامل ہوسن۔ انہاں آکھیا جو بار ایسوسی ایشنز کوں وی دعوت ݙتی ویسی جو او اپݨیاں ترقیاتی تجویزاں متعلقہ ضلعی ترقیاتی کمیٹیاں کوں جمع کراون جنہاں دی صدارت متعلقہ ڈسٹرکٹ اینڈ سیشن ججز کریسن۔ ہݨ وفاقی اتے صوبائی محکمے وی ایں عمل دا حصہ ہن تاں جو منصوبیں تے تکھے عملدرآمد کیتا ونڄ سڳے اتے وسائل دی تکرار توں بچیا ونڄ سڳے۔ سانجھے تعاون دی اہمیت کوں اجاگر کریندے چیف جسٹس آف پاکستان جسٹس یحییٰ آفریدی بار نمائندیں تے زور ݙتا جو او اپݨے ارکان کوں متحرک کرن اتے اصلاحاتی عمل وچ مسلسل شریک رہن۔ انہاں ہدایت کیتی جو بار ایسوسی ایشنز کوں ݙتی ونجݨ آلی سرکاری امداد کوں منظم اتے مؤثر انداز وچ استعمال کیتا ونڄے تاں جو ایں دا ودھ توں ودھ فیدہ ملے تے خرچے وچ شفافیت برقرار رہے۔انہاں صوبائی محکمہ جات تے وی زور ݙتا جو او نامزد افسراں دے نال نیڑے رابطے وچ رہن تاں جو ضلعی کمیٹیاں دی طرفوں تجویز کیتے ڳئے منصوبیں تے وختی عملدرآمد ممکن تھیوے۔ انہاں پسماندہ ضلعیں وچ گھٹ انفراسٹرکچر، غیر مستحکم بجلی ݙیوݨ اتے محدود ڈیجیٹل رسائی جیھے مسئلیں دا ذکر کریندے انہاں علاقیاں کیتے واضح اہداف تے مبنی اقدامات دی لوڑھ تے زور ݙتا۔ اجلاس وچ اے وی طے پاتے جو صوبائی حکومتاں انہاں منصوبیں کوں اپݨے سالانہ ترقیاتی منصوبیں وچ شامل کریسن اتے انہاں کوں ترجیح ݙیسن۔ ایں توں انڄ خواتین سائلین کیتے ساہ ݙیوݨ آلے علاقیں اتے بنیادی صنفی سہولتاں کوں پرے دے علاقٰں دی ترقیاتی منصوبہ بندی وچ پہلی ترجیح ݙتی ویسی۔چیف جسٹس آف پاکستان بار ایسوسی ایشنز کوں فیڈرل جوڈیشل اکیڈمی توں ݙتے ڳئے کنٹینیونگ لیگل ایجوکیشن (سی ایل ای) پروگرامز توں بھرپور فیدہ چاوݨ دی ترغیب ݙتی۔ انہاں ہدایت کیتی جو تربیتی کیلنڈر کوں وسیع پیمانے تے ونݙیا ونڄے اتے ہر بار وچ فوکل پرسن تعینات کیتے ونڄن تاں جو اکیڈمی نال مؤثر رابطہ قائم رکھیا ونڄ سڳے۔اجلاس دے چھیکڑ وچ چیف جسٹس آف پاکستان شرکاء کوں نیشنل جوڈیشل پالیسی میکنگ کمیٹی دے اڄوکے فیصلیں دا ݙسایا ۔ بار نمائندیں عدلیہ دے شراکتی نقطہ نظر دی تعریف کیتی تے سائلین و وکلا کوں پیش آندے چیلنجز کوں تسلیم کرݨ تے چیئرمین دا شکریہ ادا کیتا۔ اجلاس وچ موجود وفاقی و صوبائی سٹیک ہولڈرز انصاف دی مؤثر، قابلِ رسائی اتے عوامی مرکزیت تے مبنی فراہمی دے سانجھے مقصد گھنݨ سانڳے مکمل تعاون دا یقین ݙیوائے۔