وفاقی وزیر آئی ٹی تے ٹیلی کمیونیکیشن شزا فاطمہ خواجہ دا لینڈ انفارمیشن اینڈ مینجمنٹ سسٹم مرکز دا دورہ، زراعت اتے زمین دے نظم و نسق اچ جاری ڈیجیٹل اتے مصنوعی ذہانت تے مبنی جدید اقدامات دا جائزہ

اسلام آباد۔1اگست (اے پی پی) وفاقی وزیر برائے آئی ٹی تے ٹیلی کمیونیکیشن شزا فاطمہ خواجہ خصوصی سرمایہ کاری سہولت کونسل (ایس آئی ایف سی) دے ڈائریکٹر جنرل دے نال لینڈ انفارمیشن اینڈ مینجمنٹ سسٹم (لمز) دے مرکز دا دورہ کیتا جتھ انہاں زراعت اتے زمین دے نظم و نسق اچ جاری ڈیجیٹل اتے مصنوعی ذہانت تے مبنی جدید اقدامات دا جائزہ ڳھدا۔ جمعے کوں وزارت انفارمیشن ٹیکنالوجی تے ٹیلی کمیونیکیشن توں جاری کیتے ڳئے بیان موجب وفد دا استقبال ڈی جی (لمز) میجر جنرل محمد ایوب احسن کیتا جݙاں جو ڈاکٹر کرنل وقار انہاں کوں بریفنگ ݙتی۔ بریفنگ اچ ݙسیا ڳیا جو لمز ملک اچ فوڈ سکیورٹی کوں یقینی بݨاوݨ، جدید ایگری ٹیک مشورے ݙو ملین توں ودھ کساناں تئیں پُڄاوݨ اتے مثلاً 2023 وچ چٹی مکھی دے حملے سویں مسائل دے خودکار حل دے ذریعے 5 ارب روپے توں ودھ دی بچت سویں اقدامات اچ اہم کردار ادا کریندا پئے۔وفاقی وزیر اتے انہاں دی ٹیم ے وزارت آئی ٹی دے تحت شروع کیتے ڳئے منصوبے “ایگری سٹیک” دا عملی مظاہرہ وی ݙٹھا۔ وفاقی وزیر ایں اقدام دی تعریف کریندیں ہوئیں آکھیا جو اے ایگری سٹیک پاکستان دی زراعت اچ انقلاب گھن آوݨ دی مکمل صلاحیت رکھیندے کیوں جو اے ہک مکمل ڈیجیٹل ایکو سسٹم اتے ای-کامرس پلیٹ فارم اے جو لمز دے ذریعے تیار کیتا ڳئے۔ ݙوجھے اہم اقدامات وچ “پاک سرزمین کارڈ” ای شامل اے جو کساناں کیتے ہک سمارٹ ٹول اے جئیں کوں جی آئی ایس/آر ایس (GIS/RS) دی بنیاد تے ڈیزائن کیتا ڳئے تاں جو زمین دے ریکارڈ، سبسڈی اتے زرعی مشورے تئیں سوکھی رسائی ممکن تھی سڳے۔ وفد وچال پاکستانی زرعی مصنوعات دی برآمدی استعداد دے نال برانڈنگ دے امکانات تے وی تفصیلی ڳالھ تھئی۔ نینگراں کیتے زراعت دے شعبے اچ ٹیکنالوجی دے ذریعے روزگار دے موقع پیدا کرݨ تے زور ݙتا ڳیا جنہاں اچ سمارٹ فونز دی ونݙ، رابطے دی بہتری، فصلاں دی پیداوار دی پیشین گوئی کیتے مصنوعی ذہانت دا استعمال اتے لمز دے تحت مرکزی زرعی ٹیکنالوجی نظام دا قیام شامل اے۔