وزیراعظم دی صدارت اچ گلگت بلتستان اتے آزاد کشمیر اچ اڄوکے مون سون اچ جانی تے مالی ضیان تے جائزہ اجلاس، ضیان دے ہر ممکن ازالے کیتے وفاقی حکومت ولوں امدادی پیکج ݙتا ویسی، شہباز شریف

اسلام آباد۔1اگست (اے پی پی) وزیراعظم محمد شہباز شریف  آکھیا جو وفاقی حکومت اڄوکی بارشاں اتے سیلاب توں متاثرہ آزاد کشمیر اتے گلگت بلتستان دی حکومت، انتظامیہ اتے عوام نال کھڑی اے، متاثرہ علاقیاں اتے عوام نال یکجہتی کیتے جلدی گلگت بلتستان دا دورہ کریساں اتے ضیان دے ہر ممکن ازالے کیتے وفاقی حکومت ولوں امدادی پیکج ݙتا ویسی، سارے متعلقہ وفاقی ادارے آزاد کشمیر اتے گلگت بلتستان دی انتظامیہ نال رَل تے تھیوݨ آلے ضیان دا تخمینہ لاون۔جمعے کوں وزیراعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت گلگت بلتستان اتے آزاد کشمیر اچ اڄوکے مون سون دے نتیجے اچ جانی تے مالی نقصانات تے جائزہ اجلاس تھیا۔ ایں موقع تے وزیراعظم آکھیا جو اڄوکے مون سون سیزن اچ ملک بھر اتے خصوصاً آزاد کشمیر اتے گلگت بلتستان اچ جانی تے مالی ضیان دے افسوسناک واقعات تھئن۔ وزیراعظم آکھیا جو وفاقی حکومت ݙکھ دی ایں گھڑی اچ آزاد کشمیر اتے گلگت بلتستان دی حکومت، انتظامیہ اتے عوام دے نال کھڑی اے، متاثرہ علاقیاں اتے عوام نال یکجہتی دے اظہار کیتے جلدی گلگت بلتستان دا دورہ کریساں اتے نقصانات دے ہر ممکن ازالے کیتے وفاقی حکومت ولوں امدادی پیکج ݙتا ویسی۔ وزیراعظم خصوصی ہدایت کیتی جو سارے متعلقہ وفاقی ادارے آزاد کشمیر اتے گلگت بلتستان دی انتظامیہ نال رَل تے تھیوݨ آلے نقصانات دا تخمینہ لاون، شدید موسمی صورتحال دے نقصانات توں بچاوݨ کیتے محکمہ موسمیات دی پیشگی اطلاع دے نظام کوں ہنگامی بنیاداں تے موثر اتے فعال بݨایا ونڄے۔ متاثرہ علاقیاں اچ جاری امدادی کاروائیاں اچ جانی تے مالی نقصانات توں بچاوݨ کوں پہلی ترجیح ݙتی ونڄے، ذرائع مواصلات اتے سڑکاں دی بحالی اتے تعمیر تے مرمت تے مقامی اتے متعلقہ وفاقی ادارے خصوصی توجہ ݙیون۔چیئرمین این ڈی ایم اے لیفٹیننٹ جنرل انعام حیدر ملک پورے ملک اچ شدید مون سون توں تھیوݨ آلے ہݨ تئیں دے نقصانات، آزاد کشمیر اتے گلگت بلتستان اچ ممکنہ موسمی صورتحال اتے ہݨ تئیں کیتے ڳئے اقدامات تے اجلاس اچ بریفنگ ݙتی جئیں اچ ݙسیا ڳیا جو اڄوکے مون سون سیزن اچ ہݨ تئیں پورے ملک اچ مجموعی طور تے 295 اموات تھی ڳئن جݙاں جو 700 توں ودھ لوک زخمی ہن، 1600 توں ودھ گھر مکمل طور تے تباہ تھی ڳئے ہن جݙاں جو 376 مال مویشی وی بارشاں دی نظر تھی ڳئن۔ بریفنگ اچ ݙسیا ڳیا جو حالیہ مون سون سیزن اچ ندی نالیاں اچ شدید چڑھائی (طغیانی) اے۔ تربیلا چشمہ، تونسہ، کالا باغ دے مقام تے گھٹ درجے جݙاں جو دریائے چناب اچ ہیڈ مرالہ اتے گدو دے مقام تے درمیانے درجے دے سیلاب دے امکانات ہن، اڄوکے مون سون سیزن اگست دے چھیکڑ اچ شدید تھیوݨ دا امکان اے، این ڈی ایم اے آپݨے طور تے بچاوݨ کیتے بھرپور انتظامات کریندی پئی اے۔اجلاس اچ آزاد کشمیر دے وزیراعظم چوہدری انوار الحق، وزیراعلیٰ گلگت بلتستان حاجی گلبر خان، نائب وزیراعظم و وزیر خارجہ محمد اسحاق ڈار، وفاقی وزیر برائے موسمیاتی تبدیلی ڈاکٹر مصدق ملک، وفاقی وزیر برائے اطلاعات تے نشریات عطاء اللہ تارڑ، چیئرمین این ڈی ایم اے انعام حیدر ملک اتے ݙوجھے اعلیٰ حکام اتے سرکاری عہدیداراں شرکت کیتی۔