اپوزیشن ذہنی بیماری دا شکار، تحریک انصاف کولو پالیسی اے نا ہی ویژن، ملک کوں ݙیوالا کرݨ دی کندھی تے چھوڑ ونڄݨ آلے اڄ ملکی ترقی تے تنقید کریندن، عطا اللہ تارڑ

اسلام آباد۔1 اگست(اے پی پی)وفاقی وزیر اطلاعات و نشریات عطا اللہ تارڑ اپوزیشن کوں ذہنی بیمار قرار ݙیندے آکھیے جو تحریک انصاف کولو پالیسی اے نا ہی ویژن، ملک کوں یوالا کرݨ دی کندھی تے چھوڑ ونڄݨ آلے اڄ ملکی ترقی تے تنقید کریندن، اپوزیشن کولو 9 مئی دی حقیقت دا کوئی جواب کائنی۔ اسلام آباد اچ اپوزیشن دی پریس کانفرنس تے ولدا ݙیندے وفاقی وزیر اطلاعات آکھیا جو تحریک انصاف دا اعلامیہ مضحکہ خیز اتے کوڑا اے جیندا حقیقت نال کوئی وقاسطہ کائنی، ڄݙاں ساکوں حکومت ملی ہئی تاں معیشت ݙیوالی تھیوݨ آلی ہئی، اوں ویلھے تحریک انصاف آلے دعائیں منڳدے ہن جو پاکستان ݙیوالا تھی ونڄے، انہاں آئی ایم ایف کوں وہ خط لکھین ٻھل اڄ معیشت مستحکم تھیندی پئی اے اتے انہاں کوں اے ڳالھ ہضم نئیں تھیندی پئی۔ انہاں آکھیا جو ملک دی تاریخ اچ پہلی واری کرنٹ اکاؤنٹ سرپلس تھئے، زرمبادلہ دے ذخائر ودھین، مہانگ 38 فیصد توں گھٹ تھی تے سنگل ڈیجٹ تے آ گئے، پالیسی ریٹ 22 فیصد توں گھٹ تے 11 فیصد تئیں آ چکیے اتے سٹاک مارکیٹ اچ مسلسل بہتری ݙسدی پئی اے، اے سارے عوامل ملکی معیشت تے سرمایہ کاراں دے اعتماد دا ثبوت ہین۔ انہاں آکھیا جو اپوزیشن نہ تحقیق کریندی اے اتے نہ ہی کوئی ٹھوس بیانیہ ݙے سڳی اے، ایندا اعلامیہ گھسیا پٹیا اتے حقائق توں خالی اے جیندے اچ نہ کوئی اعداد و شمار ہن اتے نہ ہی کہیں پالیسی دا ذکر اے۔ انہاں آکھیا جو وزیراعظم شہباز شریف خصوصی کوششاں نال تنخواہ گھنݨ آلے طبقے تے ٹیکس ڳھٹ کیتے، تنخواہواں ودھائن، عوام دوست بجٹ پیش کیتے، اپوزیشن کوں بجٹ یا معاشی اشاریاں تے تنقید دا کوئی جواز نئیں ملیا۔ عطا اللہ تارڑ آکھیا جو مصطفی نواز کھوکھر رئیل اسٹیٹ مافیا دا حصہ رہین اتے ہݨ قوم کوں اخلاقیات دا سبق ݙیندن، او اپݨے اثاثیاں بارے وی قوم کوں ولدا ݙیون، سارے ڄاݨدن جو انہاں اپݨے آمدن دے ذرائع کیویں ودھائن۔ وفاقی وزیر آکھیا جو اپوزیشن صرف تنقید برائے تنقید کریندی اے، انہاں کولو نہ کوئی معاشی پالیسی اے اتے نہ ہی کوئی روڈ میپ، او صرف رٹے رٹائے فقرے کسیندن، انہاں کولو کوئی وائٹ پیپر اے نا ہی معیشت بارے کوئی سدھی ڳالھ، اے ذہنی بیمار تھی چکین۔ انہاں آکھیا ڄݙاں وی پاکستان اچ کوئی اہم غیر ملکی وفد یا سربراہ آندے تاں تحریک انصاف ایں دورے کوں خراب کرݨ دا پورا زور لیندی اے، صبحائیں ایرانی صدر پاکستان پڄدے پئین، پوری قوم انہاں دے آوݨ دی تانڳھی اے ٻھل اپوزیشن ایں موقع تے وی منفی بیانیہ کھنݙیندی پئی اے۔ انہاں آکھیا جو تحریک انصاف مختلف حصیاں اتے مختلف گروپاں اچ ونڈی ہوئی اے، علی امین گنڈاپور دے بیان کوں بھارت اپݨے مفاد کیتے استعمال کریندا پئے جیڑھا افسوسناک اے۔ انہاں آکھیا جو “معرکہ حق” اچ پاکستان کوں شاندار فتح ملی، “آپریشن بنیان مرصوص” دی کامیابی دا پورے ملک اچ جشن منایا گیا ٻھل اپوزیشن اینڄھے وݙے موقعے تے وی دشمن دے بیانیہ کوں ودھارا ݙیندی رہی اے۔ انہاں آکھیا جو بانی چیئرمین پی ٹی آئی دے دور اچ ملک کلہیپے دا شکار ہا، مشرق اتے مغرب نال تعلقات خراب ہن کیوں جو او خارجہ پالیسی دی اہمیت اتے نزاکت کوں سمجھݨ توں فارغ رہین، انہاں دے دور اچ ملک ڈیفالٹ دے دہانے تے کھڑا ہا اتے انہاں اپݨے رویے اتے ناقص پالیسیاں پاروں ملک کوں ناقابل تلافی نقصان پچایا۔ انہاں آکھیا جو اپوزیشن دی پریس کانفرنس “چوں چوں دا مربہ” ہائی، اانہاں کولو کوڑ، فساد، انتشار اتے پروپیگنڈے دے علاوہ ٻیا کڄھ کائنی، انہاں دیاں چیکاں صرف ذاتی مفاد کیتے نکلدن۔ انہاں آکھیا جو 9 مئی دے مقدمیاں دا ٹرائل شفاف اتے قانون دے مطابق تھیا، ݙو سال تئیں عدالت اچ کیس چلیا، شواہد پیش کیتے ڳئن ٻھل دفاع کیتے تحریک انصاف کولو کجھ نہ ہا، کیمرے دی اکھ سب کجھ سنٻھالیے جو کیویں شہداء دیاں یادگاراں دی بے حرمتی کیتی گئی اتے جلائو گھیرائو کیتا گیا، اے مناظر قوم ݙٹھن، اپوزیشن کولو 9 مئی دے مقدمیاں دا جواب کائینی تہوں اینڄھیاں پریس کانفرنساں کر تے چیک ٻکاٹ تھیندی پئی اے اتے اے بالکل بلا جواز اے، اے ناکام سیاستدان ہن، پاکستان انشاء اللہ ترقی کریسی اتے عوام دشمن عناصر کوں شکست ہوسی۔(