وزیراعظم دی اڳواݨی اچ گلگت بلتستان و آزاد کشمیر اچ ساوݨ پاروں جانی و مالی نقصانات بارے جائزہ اجلاس

اسلام آباد (اے پی پی)وزیراعظم محمد شہباز شریف آکھیے جو وفاقی حکومت اڄوکے ساوݨ اچ ودھ بارشاں اتے سیلاب نال متاثرہ آزاد کشمیر اتے گلگت بلتستان دی حکومت، انتظامیہ اتے عوام دے نال کھڑی اے، متاثرہ علاقیاں اتے عوام نال یکجہتی کیتے تیکھے متاثرہ علاقیاں اچ آپ ویساں، نقصانات دی بھرائی کیتے وفاقی حکومت وݙا امدادی پیکج ڈیسی۔ اے ڳالھ انہاں اسلام اباد اچ گلگت بلتستان اتے آزاد کشمیر اچ ساوݨ پاروں تھیوݨ آلے جانی و مالی نقصانات بارے جائزہ اجلاس دی اڳواݨی کریندے آکھی۔ وزیراعظم آکھیا جو سارے متعلقہ وفاقی ادارے آزاد کشمیر اتے گلگت بلتستان دی انتظامیہ نال مل تے تھیوݨ آلے نقصانات دا اندازہ لاون، شدید موسمی صورتحال دے نقصانات توں بچݨ کیتے محکمہ موسمیات دے پیشگی اطلاع دے نظام کوں ہنگامی بنیاداں تے مؤثر اتے فعال ٻݨایا ونڄے۔ چیئرمین این ڈی ایم اے لیفٹیننٹ جنرل انعام حیدر ملک اجلاس اچ بریفنگ ݙیندے آکھیا جو ساوݨ اچ ہݨ تئیں پورے ملک اچ مجموعی طور تے 295 اموات تھی چکین ڄڈانجو 700 توں ودھ بندے زخمی ہن۔ 1600 توں ودھ گھر مکمل طور تے تباہ تھی گئن اتے 376 مال مویشی وی مینھ وات تھئین، ساوݨ اچ ندی نالیاں اچ شدید چھل اے، تربیلا، چشمہ، تونسہ، کالا باغ دے مقام تے نچلے درجے دا جڈانجو دریائے چناب اچ ہیڈ مرالہ اتے گدو دے مقام تے وچلے درجے دے سیلاب دا امکان اے۔ اجلاس اچ آزاد کشمیر دے وزیراعظم چوہدری انوار الحق، وزیراعلیٰ گلگت بلتستان حاجی گلبر خان، نائب وزیراعظم و وزیر خارجہ محمد اسحاق ڈار اتے ٻئے اعلیٰ حکام شرکت کیتی۔