وفاقی وزیرپروفیسراحسن اقبال دی چین دے نائب وزیر خارجہ سن ویڈونگ نال ملاقات

بیجنگ ۔2اگست (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو اڄوکی علاقائی کشیدگی وچ چین پاکستان دی غیر مشروط حمایت جاری رکھی، سی پیک دا سفر کاغذ توں ارباں ڈالر دے منصوبے تئیں پُڄ ڳئے، پاک چین دوستی بدلدے حالات اتے ہر دور وچ نویں توانائی نال مزید مضبوط تھیندی پئی اے۔ اے ڳالھ انہاں چین دے نائب وزیر خارجہ سن ویڈونگ نال ملاقات اچ آکھی۔ ایں توں پہلے چینی نائب وزیر خارجہ وزیر منصوبہ بندی احسن اقبال دا استقبال کیتا اتے ملاقات وچ سانجھی دلچسپی، سی پیک فیز ٹو دے تحت صنعتی اتے بزنس ٹو بزنس تعاون تے تفصیلی ڳالھ مہاڑ کریندے ݙوہائیں وزیراں ݙو طرفہ تعلقات کوں مزید مستحکم بݨاوݨ دے عزم دا اظہار کیتا۔ ایں موقع تے وزیر منصوبہ بندی وزیراعظم شہباز شریف دیاں نیک خواہشات اتے خیرسگالی دا پیغام چین دی قیادت تئیں پُچایا۔وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیا جو سن ویڈونگ دے پاکستان وچ سفارت کاری دے دور وچ اساں سی پیک دا سفر ارباں ڈالر دے منصوبے تئیں پُچائے۔ انہاں آکھیا جو اڄوکی علاقائی کشیدگی وچ چین پاکستان دی غیر مشروط حمایت جاری رکھی، پاکستانی عوام چین دی قیادت اتے عوام دی لازوال دوستی تے ناز کریندوں، پاک چین دوستی بدلدے حالات اتے ہر دور وچ نویں توانائی دے نال مضبوط تھیندی پئی اے۔ احسن اقبال مزید آکھیا جو چین دی ترقی دا ماڈل اساݙے کیتے مشعل راہ اے، پاکستان چین دے تجربے توں فیدہ چاتے برآمدات اتے ٹیکنالوجی دی بنیاد تے معیشت دی تشکیل دی طرف ٹُردا پئے۔وفاقی وزیر آکھیا جو “اُڑان پاکستان” دا فائیو ایز فریم ورک سی پیک فیز ٹو دے وژن نال حکمت اے، “اُڑان پاکستان” دا مرکزی مقصد عوام دوست اصلاحات دے ذریعے معاشی، سماجی اتے معاشرتی استحکام کوں یقینی بݨاوݨ اے۔ احسن اقبال آکھیا جو سی پیک فیز ٹو وچ صنعتی و تکنیکی شعبے اہم ہوسن۔ انہاں آکھیا جو چین دی قیادت عالمی امن کیتے مثالی کردار ادا کریندی پئی اے۔ وفاقی وزیر مزید آکھیا جو اساݙی ترجیح ہک باصلاحیت، تعلیم یافتہ اتے ہنر مند افرادی قوت دی تیاری اے۔ احسن اقبال آکھیا جو بزنس ٹو بزنس تعاون نال سی پیک دا دائرہ وسیع تھیسی۔ملاقات اچ ڳالھ کریندے چین دے نائب وزیر خارجہ سن ویڈونگ آکھیا جو چین مختلف شعبیں وچ پاکستان دے نال تعاون کوں ودھارا ݙیوݨ کیتے پرعزم اے، پاکستان دے فائیو ایز فریم ورک نال معاشی استحکام اتے خود انحصاری دے امکانات روشن ہن۔ انہاں آکھیا جو سی پیک منصوبیں وچ قائدانہ اتے اہم کردار تے چین وچ احسن اقبال کوں قدر دی نگاہ نال ݙٹھا ویندے۔