وفاقی وزیر تجارت جام کمال خان دی رومانیہ دے سفیر ڈین اسٹونیسکو نال ملاقات

اسلام آباد۔2اگست (اے پی پی) وفاقی وزیر تجارت جام کمال خان آکھیے جو رومانیہ دیاں کمپنیاں کیتے پاکستان وچ سرمایہ کاری دے پرکشش موقع موجود ہن، حکومت ٹیرف اتے نان ٹیرف رکاوٹاں مرحلہ وار گھٹ کریندی پئی اے۔ اے ڳالھ وفاقی وزیر تجارت جام کمال خان رومانیہ دے سفیر ڈین اسٹونیسکو کوں ملاقات اچ آکھی۔ وزارت تجارت موجب ایں موقع تے پاکستان اتے رومانیہ وچال تجارتی، دفاعی اتے توانائی تعاون تے تفصیلی ڳالھ مہاڑ کیتی ڳئی۔ رومانیہ دے سفیر پاکستانی برآمدات کیتے کنسٹانزا بندرگاہ استعمال کرݨ دی تجویز پیش کیتی۔ وفاقی وزیر آکھیا جو کنسٹانزا بندرگاہ تئیں رسائی برآمدی لاجسٹکس وچ تنوع دا ہک اہم قدم اے۔ ملاقات دے دوران زرعی، گوشت، دوا سازی، سرجیکل اتے گرین انرجی دے شعبیں وچ تعاون ودھاوݨ تے اتفاق وی کیتا ڳیا۔سفیر ڈین اسٹونیسکو رومانیہ دی طرفوں پاکستان کوں شمسی اتے ہوا نال بجلی بݨاوݨ دی ٹیکنالوجی ݙیوݨ دی پیشکش کیتی اتے پاکستانی صنعتی صلاحیتاں دا اعتراف کریندے صنعتی شراکت داری وچ دلچسپی دا اظہار وی کیتا۔ وفاقی وزیر تجارت جام کمال خان آکھیا جو حکومت ٹیرف اتے نان ٹیرف رکاوٹاں مرحلہ وار گھٹ کریندی پئی اے، رومانیہ دیاں کمپنیاں کیتے پاکستان وچ سرمایہ کاری دے پرکشش موقع موجود ہن۔ سفیر اسٹونیسکو پاکستانی آئی ٹی ماہرین دیاں صلاحیتاں دی تعریف کریندے ہوئیں آکھیا جو رومانیہ پاکستانی آئی ٹی پروفیشنلز کیتے موقع ݙیوݨ کیتے تیار اے۔ وفاقی وزیر انہاں کوں ݙسیا جو پاکستانی آئی ٹی ماہرین عالمی سطح تے معیاری خدمات ݙیندے پئن ۔ ملاقات وچ ٹیکنالوجی سیکٹر وچ سانجھے تعاون کوں مزید تکڑا بݨاوݨ تے اتفاق کریندے ثقافتی سفارت کاری، کمیونٹی انضمام اتے ویزہ سہولتاں وچ بہتری تے زور ݙتا ڳیا۔ ملاقات خوشگوار ماحول وچ تھئی جیں دوران سانجھے تعلقات کوں مستحکم بݨاوݨ تے اتفاق کیتا ڳیا۔