پاکستان اتے ایران دا وزرائے تجارت دے اعلیٰ سطحی اجلاس وچ تجارتی و سرحدی تعاون دے ودھارے تے اتفاق

اسلام آباد۔3اگست (اے پی پی) پاکستان اتے ایران ݙو طرفہ معاشی تعاون کوں ودھارا ݙیوݨ کیتے تجارتی، سرحدی اتے سانجھے اعتماد تے مبنی سانجھے داری کوں مزید وسعت ݙیوݨ تے اتفاق کیتے۔ وفاقی وزیر تجارت جام کمال خان ایرانی وزیر صنعت، کان کنی و تجارت محمد آتابک نال اسلام آباد وچ ملاقات دے دوران تجارتی و سرحدی تعاون دے ودھارے تے اتفاق کیتا، ݙوہائیں وزیراں دی ملاقات ایرانی صدر ڈاکٹر مسعود پزشکیان دے ݙو ݙینھ دے سرکاری دورہ پاکستان دے موقع تے تھئی۔وزارت تجارت  موجب اعلیٰ سطحی مذاکرات وچ ݙوہائیں وزیراں تجارت دے ودھارے ، سرحدی رکاوٹاں کوں مکاوݨ اتے ترجیحی شعبیں وچ بھروسے مند تعاون دے نویں رستے بݨاوݨ تے زور ݙتا۔ ایرانی وزیر محمد آتابک پاکستان دی حکومت اتے وزارت تجارت دے فعال کردار دی تعریف کریندے آکھیا جو جے تساں اپݨی ٹیم سودھے وختی اتے سنجیدہ کوششاں نہ کریندے تاں اساں ایں مقام تئیں نہ پُج سڳدے ہاسے، ضروری اے جو ایں پیش رفت کوں منظم اتے نتیجہ خیز تجارتی ڈھانچے وچ ڈھالیا ونڄے۔وفاقی وزیر جام کمال خان وی ایں جذبے دا اظہار کریندے آکھیا جو ݙوہائیں حکومتاں اتے نجی شعبے وچ بھرپور عزم اتے جذبہ کم کریندا پئے، سفارت کاری وچ ہک لمحہ آندے جݙاں لوہا گرم ہوندے اتے اے وی اوہو لمحہ اے جݙاں اساکوں وختی قدم چاوݨا ہوسی کیوں جو دیر معاملات کوں مزید الجھا ݙیندی اے۔ انہاں زور ݙتا جو جذبے اتے سیاسی عزم دے بعد ہی رسمی اقدامات کیتے ویندن اتے پاکستان ایران دے نال معاشی تعلقات کوں جوائنٹ اکنامک کمیشن، بزنس ٹو بزنس ملاقاتاں اتے شعبہ جاتی تجارتی وفداں دے ذریعے مزید مضبوط کرݨ کیتے تیار ہے۔ݙوہائیں وزیراں زراعت، لائیو سٹاک، خدمات، توانائی اتے سرحد پار لاجسٹکس جیھے مخصوص شعبیں دی نشاندہی کریندے آکھیا جو اے شعبے سانجھے تعاون دے ودھارے وچ اہم کردار رکھیندن۔ جام کمال خان تجویز ݙتی جو وفاقی و صوبائی ایوان ہائے صنعت و تجارت دے نمائندیں تے مشتمل مرکوز تجارتی وفد بݨائے ونڄن تاں جو مارکیٹ تئیں رسائی اتے اصولاں و ضابطیں تے تفصیلی ڳالھ مہاڑ ممکن تھی سڳے۔ انہاں آکھیا جو اساں ایں ماڈل کوں بیلاروس سودھے کئی ملکاں وچ کامیابی نال آزمائے اتے چاہندے ہاسے جو ایران دے نال وی صلاحیت رکھݨ آلے شعبیں وچ سانجھے تعاون کوں ودھایا ونڄے تاں جو ݙو طرفہ رابطیں دے ودھارے توں حقیقی فیدہ چاتا ونڄ سڳے۔ ݙوہائیں وزیراں موجودہ تجارتی راہداریاں اتے سرحدی سہولتاں دے زیادہ استعمال تے وی اتفاق کیتا۔ جام کمال خان علاقائی تجارت دی اہمیت تے روشنی پاوݨ کیتے آکھیا جو آسیان ملکاں کہیں طرح اپݨےہمسایہ ملکاں دے نال تجارت دے ذریعے ترقی دیاں منزلاں طے کیتیاں ہن۔ انہاں آکھیا جو جغرافیہ ہک نعمت اے، پاکستان اتے ایران کوں گھٹ فاصلے دے فیدے کوں استعمال کرݨا چاہیدے، جے اساں اے موقع ونڄا ݙیسوں تاں ویلھا اتے خرچے ݙوہائیں دا نقصان تھیسی۔انہاں پیشین گوئی کیتی جو جے ݙوہائیں ملک اپݨیاں صلاحیتاں کوں مکمل طور تے استعمال وچ گھن آون تاں سانجھی تجارت اڳوں کجھ سالاں وچ 5 توں 8 ارب ڈالر سالانہ تئیں پُج سڳدی اے۔ انہاں مزید آکھیا جو ایران اتے پاکستان دی تجارتی سانجھے داری ترکی، وسطی ایشیا، روس اتے مشرق وسطیٰ تئیں کھنڈ تے ہک وسیع اتے طاقتور علاقائی تجارتی بلاک وچ بدل سڳدی اے۔ایرانی وزیر محمد آتابک ہر اعلیٰ سطحی دورے دے دوران ہک خصوصی بی 2 بی ݙینھ مختص کرݨ دی تجویز دی حمایت کریندے آکھیا جو اساں ایران توں کاروباری وفد کوں پاکستان گھن آوݨ کیتے تیار ہیسے۔ انہاں پاکستانی برآمدات وچ ودھارے کیتے جاری مذاکرات دا ذکر کریندے ہوئیں ݙوہائیں حکومتاں تے زور ݙتا جو او نویں معاہدیں تے وختی عملدرآمد کوں یقینی بݨاون۔ انہاں مزید آکھیا جو ݙوہائیں ملکاں دے تاجر اتے صنعت کار تیار ہن، او ہک ݙوجھے تے اعتماد کریندے ہن انہاں کوں اساݙی طرفوں صرف ہک واضح اتے مسلسل سہولتی نظام دی لوڑھ ہے۔مذاکرات وچ ݙوہائیں فریقاں ایں ڳالھ تے وی زور ݙتا جو پاکستان اتے ایران دے عوام دے وچال ثقافتی اتے لسانی حکمت باہمی تعلقات دی بنیاد اے۔ جام کمال خان خصوصی اکنامک فری زون دے سی ای او نال ہک اڄوکی ملاقات دا حوالہ ݙیندے ہوئیں آکھیا جو انہاں بلوچی زبان وچ ڳالھ کیتی جو ݙوہائیں ملکاں دے وچال گھاٹے رابطےدی عکاسی کریندے۔ انہاں آکھیا جو اے صرف تجارت نئیں بلکہ عوامی رابطیں دی ڳالھ اے۔ اساݙے تاجراں وچال جیڑھی واقفیت اتے اعتماد اے او پائیدار اقتصادی انضمام دی ساریں توں مضبوط بنیاد بݨ سڳدی اے۔ملاقات دے چھیکڑ وچ ݙوہائیں وزیراں پاکستان-ایران جوائنٹ اکنامک کمیشن دے اڳوں اجلاس کوں وختی منعقد کرݨ، عوامی و نجی شعبیں دی شمولیت کوں یقینی بݨاوݨ اتے سرحدی تعاون و تجارتی لاجسٹکس کوں پہلی ترجیح ݙیوݨ تے اتفاق کیتا۔ ملاقات دا عمومی پیغام اے ہئی جو “ہݨ ویلھا اقدام دا اے”۔ اعلیٰ سیاسی حکمت اتے باہمی اعتماد دے نال پاکستان اتے ایران سٹریٹجک اقتصادی شراکت داری دے ہک نویں دور وچ داخل تھیوݨ کیتے تیار ہن جیڑھے پورے خطے دی تجارت دا منظر نامہ بدل سڳدے۔