پاکستان اتے ایران دے تعلقات سانجھی ثقافت اتے مذہب تے قائم ہن، ݙوہائیں ملکاں دی قیادت ݙو طرفہ تجارت دے حجم کوں 10 ارب ڈالر دے ہدف تئیں پُچاوݨ کیتے پرعزم اے، وزیراعظم شہباز شریف دی ایرانی صدر دے نال سانجھی پریس کانفرنس

اسلام آباد۔3اگست (اے پی پی) وزیراعظم محمد شہباز شریف آکھیے جو پاکستان اتے ایران دے تعلقات سانجھی ثقافت اتے مذہب تے مبنی ہن، پاکستان اتے ایران دی قیادت سانجھی تجارت دے حجم کوں جلدی توں جلدی 10 ارب ڈالر دے ہدف تئیں پُچاوݨ کیتے پرعزم اے، پاکستان پرامن مقصد کیتے ایران دے جوہری پروگرام دی حمایت کریندے، دہشتگردی دے خلاف پاکستان اتے ایران دا موقف ہک اے، کہیں وی طرح دی دہشتگردی کوں برداشت نی کیتا ونڄ سڳدا۔اے ڳالھ وزیراعظم محمد شہباز شریف ایرانی صدر ڈاکٹر مسعود پزشکیان دے نال اتھاں معاہدیں اتے مفاہمت دیاں یادداشتاں دے تبادلے دی تقریب دے موقع تے سانجھی پریس کانفرنس کریندے آکھی ۔ وزیراعظم محمد شہباز شریف ایران دے صدر ڈاکٹر مسعود پزشکیان اتے پاکستان وچ ایران دے سفیر اتے انہاں دے وفد دا خیرمقدم کریندے ہوئیں آکھیا جو اساݙے برادر اتے دوست ملک دے صدر پہلی واری صدر دے طور تے پاکستان دا دورہ کریندے پئن اتے اڳوں وی تہاݙے دورے ہوسن۔ انہاں آکھیا جو ݙو طرفہ ملاقاتاں دے دوران اساں بھرپی سانجھے تعلقات، مذہبی، ثقافتی اتے جغرافیائی شعبیں سودھے جامع ڳالھ مہاڑ کیتی اے۔ انہاں آکھیا جو ایران دے صدر پاکستان کیتے پیار دا جذبہ رکھیندن۔انہاں آکھیا جو جون وچ اسرائیل بغیر کہیں ٹھوس ثبوت دے ایران دے خلاف جارحیت کیتی تاں پاکستان دے عوام اتے حکومت ایں دی بھرپور مذمت کیتی۔ انہاں آکھیا جو ایں جنگ دا کوئی جواز کائناں ہئی۔ وزیراعظم حکومت اتے پاکستان دے عوام دی طرفوں جنگ وچ ایران دے سائنسداناں، جرنیلاں اتے ݙوجھے شہیداں کیتے مغفرت اتے زخمیاں دی جلدی صحت یابی دی دعا کریندے آکھیا جو جنگ وچ سپریم لیڈر آیت اللہ خامنائی دی بہادرانہ اتے دانشمندانہ قیادت وچ ایرانی افواج اتے عوام نے شجاعت نال مقابلہ کیتا اتے ایرانی میزائلاں دی بارش وچ اسرائیلی دفاع کوں بری طرح بے نقاب کیتا۔ انہاں مزید آکھیا جو جنگ دے دوران ایران دے عوام اتے حکومت نے اپݨی خودمختاری اتے غیرت دا بھرپور دفاع کیتا۔وزیراعظم آکھیا جو پاکستان دا اصولی موقف اے جو اقوام متحدہ دے چارٹر دے مطابق پرامن مقصد کیتے جوہری طاقت دا پورا حق حاصل اے، میں سمجھدا ہاں جو ایں حوالے نال پاکستان، ایران دے اصولی موقف دے نال کھڑے۔ وزیراعظم مزید آکھیا جو اڄ کئی معاہدیں اتے ایم او یوز تے دستخط کیتن، میݙی دعا ہے جو اے ایم او یوز وختی معاہدیں وچ بدل ونڄن اتے اساݙی ݙو طرفہ تجارت کوں وختی 10 ارب ڈالر تئیں ودھاوݨ، ایں حوالے نال اساݙے وفد ڳالھ مہاڑ کوں اڳوں ودھاون۔انہاں آکھیے دہشتگردی دے خلاف پاکستان اتے ایران دا موقف ہک اے، کہیں قسم دی دہشتگردی کوں برداشت نی کیتا ونڄ سڳدا، اساں خطے وچ امن و ترقی دیاں سڑکاں کوں کھولݨ کیتے کئی سو کلومیٹر لمبیاں سرحداں کوں کھولݨ کیتے دہشتگردی دے خلاف بھرپور تعاون کوں یقینی بݨیسوں تاں جو ہمیشہ کیتے دہشتگردی کوں ختم کیتا ونڄ سڳے۔وزیراعظم محمد شہباز شریف غزہ وچ بُرے ظلم و ستم دے حوالے نال آواز چاوݨ تے ایرانی سپریم لیڈر آیت اللہ خامنہ ای اتے ایران دے صدر کوں خراج تحسین پیش کریندے آکھیا جو پاکستان ہمیشہ غزہ اتے فلسطین دے عوام کیتے بھرپور آواز چاتی اے، اڄوکے ݙینھاں اچ نائب وزیراعظم اقوام متحدہ وچ ایں حوالے نال پاکستان دا موقف بھرپور طور تے پیش کیتا۔ انہاں آکھیا جو ہر لمحہ بے گناہ نشوماں کوں کونٹھا ویندا پئے، ٻڈھے، عورتاں اتے نینگراں دے خون نال گَلیاں ڳاڑھیاں ہن، ایں توں ودھ ظلم اے ہے جو پاݨی، خوراک اتے دوائیں دا داخلہ بند کر تے انہاں کوں بکھ تے مجبور کر ݙتا ڳئے، اے نظارے ݙیکھݨ دی ہمت کائنی۔ وزیراعظم آکھیا جو پوری دنیا کوں ہک زبان تھی تے غزہ دے حوالے نال آواز چاوݨی چاہیدی اے۔ امن دے قیام کیتے عالمی برادری کوں توانائیاں لاوݨیاں ہوسن، نئیں تاں تاریخ اساکوں معاف نہ کریسی۔غیر قانونی بھارتی مقبوضہ جموں و کشمیر دی صورتحال دا ذکر کریندے وزیراعظم محمد شہباز شریف آکھیا جو پوری وادی نشوم کشمیریاں دے خون نال ڳاڑی اے، کشمیریاں کوں وی آزادی دا حق اے اتے ایں دے بغیر انہاں دی آزادی مکمل نہ ہوسی، پاکستان  ایں حوالے نال ہمیشہ آواز چاتی اتے چاہندا رہسی، اساں ایران دے وی شکر گزار ہن جو ایران  ہمیشہ کشمیریاں دے حق کیتے آواز چاتی اے۔ وزیراعظم سعدی شیرازی دے اشعار دا حوالہ وی ݙتا جنہاں وچ آکھیا ڳیا جو چنڳے ویلھے ہر کوئی دوست ہوندے اتے دوستی دا دعویٰ کریندن لیکن دوست او ہوندے جیڑھا اوکھے ویلھے دوست دا ہتھ پکڑ ڳھنے۔ایں موقع تے ڳالھ مہاڑ کریندے ایران دے صدر ڈاکٹر مسعود پزشکیان قرآنی آیتاں دا حوالہ ݙتا اتے آکھیا جو اساݙا دوست اتے ہمسایہ ملک پاکستان اساݙا ݙوجھا گھر اے۔ انہاں وزیراعظم محمد شہباز شریف اتے حکومت دی طرفوں شاندار میزبانی تے اظہار تشکر کریندے آکھیا جو پاکستان دی حکومت، پارلیمان اتے عوام دی طرفوں ایران تے امریکی اتے اسرائیلی جارحیت وچ بھرپور موقف اپنایا اتے اساݙا ساتھ ݙتا جیں تے اساں شکر گزار ہیسے ۔ انہاں آکھیا جو شاعر مشرق علامہ اقبال وی اپݨے اشعار وچ اتحاد اتے بھرپی دا درس ݙتا اتے ملت اسلامیہ کوں ہک قرار ݙتا۔ انہاں آکھیا جو اساݙی دوستی اتے تعلقات گھاٹے تاریخی اتے ثقافتی رشتے نال جڑئے ہن۔ انہاں آکھیا جو مذہب دی بنیاد تے اتحاد دا سبق اساݙے پیغمبر وی ݙتا ہئی اتے جݙاں تئیں اساں ہک تھی تے رہسوں تاں اساݙی خودمختاری قائم رہسی۔ایرانی صدر ڈاکٹر مسعود پزشکیان آکھیا جو ایران پاکستان کوں اپݨا ہمسایہ ہی نی بلکہ بھرا سمجھدے۔ انہاں آکھیا جو سانجھے تعلقات اتے تعاون کوں مزید وسعت ݙے تے اساں سانجھی تجارت کوں 3 ارب ڈالر توں ٻہوں وختی 10 ارب ڈالر دے ہدف تئیں ودھا سڳدوں ۔ اڄ اساں سیاست، ثقافت وغیرہ دے شعبیں وچ سانجھے تعاون دے ودھارے کیتے مختلف دستاویزاں تے دستخط کیتن، جیں نال ٹرانسپورٹ، سائنس و ٹیکنالوجی، ثقافت، سیاحت اتے کاروباری شعبیں دی ترقی وچ مدد ملسی۔ انہاں آکھیا جو اساں انہاں اہم معاہدیں تے عملدرآمد کوں یقینی بݨاوݨ دے حوالے نال سانجھے رابطے دے ودھارے سانڳے پرعزم ہیسے۔ایرانی صدر آکھیا جو ٹرانزٹ ٹریڈ دیاں راہداریاں، ریل، روڈ اتے بحری روٹس دی ترقی، بارڈر مارکیٹاں، مشترکہ فری اکنامک زونز دا قیام اساݙے کیتے بہوں ضروری اے جیں نال ݙوہائیں ملکاں دے رابطیں وچ استحکام اتے وسعت آسی۔ انہاں مزید آکھیا جو دہشت گرداں دی طرفوں سرحدی علاقیاں وچ خطرات دے تناظر وچ ݙوہائیں ملکاں دے عوام دے تحفظ کیتے باہمی اقدامات ضروری ہن۔ایران دے صدر آکھیا جو علاقائی اتے عالمی امور تے ݙوہائیں ملکاں دی صلاح سانجھی ہے اتے معاشی رابطیں دے ودھارے نال ترقی و خوشحالی کوں یقینی بݨایا ونڄ سڳدے۔ انہاں فلسطین، لبنان اتے شام وچ انسانی حقوق دی خلاف ورزی دے اسرائیلی اقدامات دی سخت مذمت کریندے ہوئیں آکھیا جو اسرائیل نسل کشی دے اقدامات دا مرتکب اے۔ انہاں جلدی جنگ بندی دا مطالبہ کریندے آکھیا جو پاکستان اتے ایران یقین رکھیندن جو علاقائی اتے عالمی سطح تے سانجھے تعاون دے ودھارے نال توسیع پسندانہ عزم کوں روکیا ونڄ سڳدے تاں جو خطے وچ سیکورٹی و سلامتی کوں یقینی بݨایا ونڄ سڳے۔ انہاں مزید آکھیا جو اسرائیلی جارحیت مکاوݨ کیتے علاقائی اتے عالمی سانجھے داری دی لوڑھ ہے۔ اقوام متحدہ دی سلامتی کونسل کوں ݙوڑے معیار کوں چھوڑ تے جارحیت دا خاتمہ یقینی بݨاوݨا چاہیدے، رکن ملکاں دی خودمختاری یقینی بݨاوݨ کیتے اقوام متحدہ دے جامع کردار دی لوڑھ اے۔اپݨی ڳالھ دے آخر وچ مہمان نوازی تے ہک واری ول اظہار تشکر کریندے وزیراعظم محمد شہباز شریف کوں دورہ ایران دی دعوت وی ݙتی تاں جو باہمی تعلقات دے ودھارے دے عمل کوں مزید وسعت ݙتی ونڄ سڳے۔ایں توں پہلے پاکستان اتے ایران مختلف معاہدیں اتے مفاہمت دیاں یادداشتوں دا تبادلہ کیتا، ایں حوالے نال ایرانی صدر ڈاکٹر مسعود پزشکیان دے دورہ پاکستان دے موقع تے وزیراعظم ہاؤس وچ خصوصی تقریب دا انعقاد کیتا ڳیا۔ تقریب وچ وزیراعظم محمد شہباز شریف اتے ایرانی صدر ڈاکٹر مسعود پزشکیان وی شرکت کیتی۔ ایں موقع تے مجموعی طور تے 12 دستاویزاں دا تبادلہ کیتا ڳیا جنہاں وچ ساریں توں پہلے پلانٹ پروٹیکشن اتے پلانٹ کوارنٹائن دا معاہدہ ہئی۔ ایران دے وزیر معدنیات، صنعت و تجارت محمد آتابک اتے وفاقی وزیر قومی غذائی تحفظ و تحقیق رانا تنویر حسین دستاویزاں دا تبادلہ کیتا۔پاکستان اتے ایران میر جاوے تافتان بارڈر گیٹ دے سانجھے استعمال دے معاہدے دیاں دستاویزاں دا تبادلہ ایرانی وزیر خارجہ سید عباس عراقچی اتے وزیر مملکت خزانہ بلال اظہر کیتا۔ ایں موقع تے ایران دے پاردیز ٹیکنالوجی پارک اتے پاکستان کونسل آف سائنٹیفک اینڈ انڈسٹریل ریسرچ دے درمیان سائنس، ٹیکنالوجی اتے ایجادات دے حوالے نال سانجھے داری کیتے ایم او یو دیاں دستاویزاں دا تبادلہ ایران دے پاکستان وچ سفیر رضا امیری مقدم اتے وفاقی وزیر سائنس و ٹیکنالوجی خالد حسین مگسی کیتا۔اٰں توں انڄ انفارمیشن اینڈ کمیونیکیشن ٹیکنالوجی دے شعبے وچ سانجھے کم کیتے ایم او یو دیاں دستاویزاں دا تبادلہ ایران دے وزیر معدنیات، صنعت و تجارت محمد آتابک اتے وفاقی وزیر آئی ٹی شیزہ فاطمہ خواجہ وچال تھئے۔ ایں طرح کلچر اینڈ آرٹ، سیاحت، سائنس، تعلیم، ٹیکنالوجی، صحت اتے فیملی افیئرز، ماس میڈیا اتے سپورٹس دے شعبیں وچ ݙو طرفہ تعاون دے فروغ کیتے ایکسچینج پروگرام دیاں دستاویزاں دا تبادلہ وفاقی وزیر ثقافت و قومی ورثہ محمد اورنگزیب خان کھچی اتے ایرانی وزیر خارجہ سید عباس عراقچی کیتا۔پاکستان اتے ایران دے میٹرولوجیکل دے اداریں وچ باہمی تعاون دے ایم او یو دیاں دستاویزاں دا تبادلہ وفاقی وزیر دفاع خواجہ محمد آصف اتے ایران دے وزیر محمد آتابک کیتا۔ میری ٹائم سیفٹی اینڈ فائر فائٹنگ دے شعبے وچ ایم او یو دیاں دستاویزاں دا تبادلہ ایران دی وزیر روڈز و اربن ڈویلپمنٹ فرزانہ صادق اتے وفاقی وزیر بحری امور جنید انوار چوہدری کیتا۔ تقریب دے دوران کریمنل معاملات وچ جوڈیشل اسسٹنس دے حوالے نال ایم او یو دیاں دستاویزاں دا وی تبادلہ کیتا ڳیا اتے وزیر مملکت داخلہ طلال چوہدری اتے ایران دے وزیر خارجہ سید عباس عراقچی دستاویزاں دا تبادلہ کیتا۔ایں طرح 2013 دے ایم او یو برائے فضائی خدمات ایگریمنٹ دے ضمنی ایم او یو دیاں دستاویزاں دا تبادلہ سیکرٹری وزارت دفاع لیفٹیننٹ جنرل (ر) محمد علی اتے ایران دی روڈ اینڈ اربن ڈویلپمنٹ دی وزیر فرزانہ صادق کیتا۔ ایں توں انڄ پاکستان اتے ایران ایران دی نیشنل سٹینڈرڈز آرگنائزیشن اتے پاکستان سٹینڈرڈز اینڈ کوالٹی کنٹرول اتھارٹی وچال مصنوعات دی رجسٹریشن اتے انسپکشن، ٹیسٹنگ وغیرہ دے حوالے نال ایم او یو تے عملدرآمد دیاں دستاویزاں دا تبادلہ وفاقی وزیر سائنس و ٹیکنالوجی خالد حسین مگسی اتے ایران دے پاکستان وچ سفیر رضا امیری مقدم کیتا۔ سیاحت دے شعبے وچ سال 2027-2025 دے دوران سانجھے تعاون تے عملدرآمد دے حوالے نال وزیراعظم دے مشیر سیاسی امور و بین الصوبائی رابطہ رانا ثنا اللہ خان اتے ایران دی وزیر فرزانہ صادق دستاویزاں دا سانجھا تبادلہ کیتا۔تقریب دے چھییکڑ اچ آزادانہ تجارت دے معاہدے دے حوالے نال بین الوزارتی بیانیہ دیاں دستاویزاں دا تبادلہ وفاقی وزیر تجارت جام کمال خان اتے ایران دے وزیر محمد آتابک کیتا۔