وفاقی وزیر داخلہ محسن نقوی نال امریکہ دی قائم مقام سفیر نیٹلی بیکر دی ملاقات

اسلام آباد۔ 21 اگست (اے پی پی) وفاقی وزیر داخلہ محسن نقوی نال امریکہ دی قائم مقام سفیر نیٹلی بیکر دی اہم ملاقات تھئی جیندے اچ پاک امریکہ تعلقات، دہشت گردی روکݨ اَتے منشیات روکݨ دے حوالے نال تعاون تے ڳالھ مہاڑ کیتی ڳئی۔قائم مقام امریکی سفیر نیٹلی بیکر نشان امتیاز ملݨ تے وزیر داخلہ محسن نقوی کوں مبارخ ݙتی اَتے انہاں کیتے نیک خواہشات دا اظہار کیتا۔ قائم مقام امریکی سفیر پاکستان، خاص طور تے خیبرپختونخوا اچ مینھ تے چھل پاروں جانی ضیان تے افسوس دا اظہار کیتا۔ انہاں آکھیا جو ساݙیاں ساریاں ہمدردیاں فوت تھیوݨ آلیں دے خانداناں نال ہن۔ایں موقع تے، وزیر داخلہ محسن نقوی پائیدار عالمی امن کیتے مخلصانہ اقدامات تے امریکی صدر ڈونلڈ ٹرمپ دیاں غیر معمولی کوششاں دی تعریف کیتی۔ انہاں دا آکھݨ ہئی جو پاک بھارت سودھے 4 جنگاں رکوا تے امریکی صدر ڈونلڈ ٹرمپ انسانیت دی خدمت کیتی اے۔ امید اے جو امریکی صدر ڈونلڈ ٹرمپ دیاں روس-یوکرائن اَتے غزہ اچ جنگ بندی دیاں کوششاں کامیاب تھیسن۔ محسن نقوی آکھیا جو امریکی صدر ڈونلڈ ٹرمپ دے دور اچ پاک امریکہ تعلقات اچ وسعت اَتے گرمجوشی آئی اے۔ پاکستان امن کیتے چاتے گئے ہر قدم دا خیر مقدم کریندے۔ قائم مقام امریکی سفیر دا آکھݨ ہا جو پاکستان ساݙا اہم دوست ملک اے۔ اساں پاکستان نال تعلقات کوں خصوصی اہمیت ݙیندوں