افغان عبوری حکومت عسکریت پسندانہ سوچ توں نکل تے ذمہ دار ریاست دا رویہ اپناوے، امن خراب کرݨ دی کہیں وی کوشش دا تکڑا ولدا ݙتا ویسی، عطاء اللہ تارڑ

اسلام آباد۔29 ستمبر(اے پی پی)وفاقی وزیرِ اطلاعات و نشریات عطاء اللہ تارڑ آکھیے جو افغان عبوری حکومت کوں عسکریت پسندانہ سوچ توں نکل تے ذمہ دار ریاست دی سوچ اپناوݨی ہوسی، پاکستان امن، مذاکرات اتے پرامن بقائے باہمی تے یقین رکھیندے، ٻھل پاکستان دی امن دی خواہش کوں کمزوری نہ سمجھیا ونڄے، امن کوں خراب کرݨ دی کہیں وی کوشش دا ولدا ݙتا ویسی۔ اسلام اباد اچ”افغان صورتحال اتے امن دی اڳونہی“ سانڳے تقریب نال خطاب کریندے وفاقی وزیرِ اطلاعات آکھیا جو پاکستان اتے افغانستان ہمسایہ ممالک ہین، ساݙے تعلقات ہمیش چنڳے رہین، پاکستان کئی ݙھاکیاں تئیں 40 لکھ توں ودھ افغان مہاجرین دی میزبانی کیتی، پاکستان امن چاہندے اتے ایں سانڳے ہمیشہ مذاکرات اتے ڳالھ مہاڑ نال مسلے حل کرݨ دی کوشش کیتی اے، پاکستان معاملیاں کیتے افغانستان کئی وفود ٻھیڄن، بھل اے سوال اہم اے جو کیا امن دا عزم موجود اے؟ افغانستان اچ موجودہ مسائل دی ہک وݙی وجہ عسکریت پسندانہ سوچ اے، افغان عبوری حکومت کوں ایں سوچ توں نکل تے ریاستی تے مدبرانہ طرزِ فکر اپناوݨا ہوسی۔ ڄیکر ݙوہیں ملکاں وچال تجارت ہووے تاں ݙوہیں ملکاں دے عوام خوشحال تھیسن، وسطی ایشیاء تئیں تجارتی راہداری دی راہ اچ بنیادی رکاوٹ عسکریت پسندی اے، افغانستان اچ دہشتگرداں اتے بین الاقوامی سطح تے کالعدم قرار ݙتیاں ڳئیاں تنظیماں دے ارکان دے محفوظ ٹھکاݨے موجود ہن۔ عطاء اللہ تارڑ آکھیا جو پاکستان مذاکرات نال افغان حکومت تے واضح کیتے جو اوکوں ایں سوچ توں ٻاہرو نکلݨا ہوسی اتے ہک قابلِ عمل اتے پائیدار نظام نال امن قائم کرݨا ہوسی۔ انہاں آکھیا جو افغانستان ہک نوجوان آبادی والا ملک اے ٻھل تریمتیں دی وݙی تعداد کوں افرادی قوت دا حصہ بݨݨ توں محروم رکھا ڳئے ڄیندے نال ملک دی معاشی ترقی متاثر تھییندی پئی اے، معاشرے دے کڄھ طبقیاں کوں بنیادی حقوق توں محروم رکھا ویندا پئے۔ انہاں آکھیا جو پرامن بقائے باہمی کیتے ”جیوو تے جیوݨ ݙیو“ دے اصول کوں منݨا ہوسی۔ انہاں آکھیا جو افغانستان اچ ہک پاسے دہشت گردی تے دہشت گرداں دے محفوظ ٹھکاݨیاں دا مسئلہ موجود اے اتے ٻئے پاسو افغان عوام کوں انہاں دے بنیادی حقوق توں محروم رکھا ویندا پئے، افغان حکومت اتے عوام وچال ایں خلیج نال افغانستان اچ مسائل ودھدے پئن اتے لوک تبدیلی کیتے آواز چیندے پئن، افغان عوام کوں تعلیم، اجتماع، انجمن سازی، پرامن بقائے باہمی تے معاشی آزادی سودھا اپݨے بنیادی حقوق ملݨے چاہیدن۔ انہاں آکھیا جو افغانستان جھئیں وسیع امکانات رکھݨ والے ملک اچ صرف عسکریت پسندانہ سوچ پاروں عوام دے حقوق اتے اقتصادی خوشحالی توں انکار نئیں کیتا ونڄ سڳدا۔ افغان عبوری حکومت کوں بالآخر ایں سوچ توں ٻاہرو نکل تے اپݨے عوام دی بہتری کیتے کم کرݨا ہوسی ڄیندے نال پورے خطے اچ استحکام آسی۔ انہاں آکھیا جو روس اتے وسطی ایشیائی ریاستاں دے دوست ایں حقیقت کوں سمجھدن جو خطے اچ امن قائم تھیوݨ نال تجارت ودھسی اتے سرمایہ کاری آسی۔ وفاقی وزیر آکھیا جو خطے اچ امن دے حصول تے تجارت دے معاملے تے اتفاقِ رائے موجود اے، ہکو مسئلہ افغانستان اچ امن دا اے اتے اے اوں ویلھے مسی ڄݙاں افغان عبوری حکومت مسئلے دی سنگینی کوں سمجھدے ہوئیں نیک نیتی نال ایںدا حل ڳولے۔ انہاں آکھیا جو پاکستان اچ حملیاں کیتے افغان سرزمین دے استعمال اتے دہشتگرد تنظیماں کوں افغانستان توں ملݨ والی سپورٹ تے اپݨے تحفظات افغان حکومت کوں ݙسائن، ولدے اچ کارروائیاں وی کیتن، پاکستان دی امن دی خواہش کوں کمزوری نہ سمجھا ونڄے۔