وفاقی وزیر تجارت جام کمال خان دی بنگلہ دیش دے مشیر برائے خوراک نال ملاقات

ڈھاکہ۔22اگست (اے پی پی) وفاقی وزیر تجارت جام کمال خان بنگلہ دیش دے مشیر برائے خوراک علی امام مجمدار نال ڈھاکہ اچ ملاقات کیتی۔ جاری پریس ریلیز موجب ملاقات اچ ݙوہیں رہنماواں فوڈ سکیورٹی دے شعبے اچ تعاون ودھاوݨ اتے زرعی شعبے اچ سانجھ داری دے امکانات تے ڳالھ مہاڑ کیتی۔ ݙوہیں ملکاں جنوری 2025ء اچ پاکستان ٹریڈنگ کارپوریشن اتے بنگلہ دیش ڈائریکٹوریٹ جنرل آف فوڈ دے وچال تھیوݨ آلے چاول دے وپار دے معاہدے تے اطمینان دا اظہار کیتا۔ ایں معاہدے دے تحت پاکستان کامیابی نال 50 ہزار میٹرک ٹن چاول ݙتے ۔ فریقین ایں ڳالھ تے اتفاق کیتا جو “اے معاہدہ حکومتی اتے کاروباری وفداں دے باقاعدہ تبادلیں کیتے رستے ہموار کریسی تاں جو ضروری چیزاں دے وپار اچ ودھارا تھی سڳے۔” وفاقی وزیر آکھیا جو “نومبر 2025ء اچ کراچی اچ تھیوݨ آلی تریجھی بین الاقوامی فوڈ اینڈ ایگریکلچر نمائش بنگلہ دیشی کاروباری لوکاں اتے حکام کوں پاکستان دی زرعی گنجائش کوں نیڑے توں ݙیکھݨ دا موقع ݙیسی۔” وزیر اتے مشیر ݙوہیں ایں ڳالھ تے زور ݙتا جو ودھدی فوڈ ڈیمانڈ کوں پورا کرݨ کیتے فصلاں دی پیداوار ودھاوݨ اتے جدید زرعی طریقے اپناوݨ دی لوڑھ اے