وزیراعلیٰ پنجاب دا آندے مینھ پاروں پیشگی انتظامات کرݨ کیتے کمشنرز و ڈپٹی کمشنرز کوں الرٹ رہݨ دا حکم

لاہور۔22اگست (اے پی پی) وزیراعلیٰ مریم نواز آندے مینھ پاروں لاہور، راولپنڈی، ملتان، بہاولپور، دیرہ غازی خان، سرگودھا، گجرات اتے گوجرانوالہ دے ضلعیں اچ پیشگی انتظامات کرݨ کیتے کمشنرز و ڈپٹی کمشنرز کوں الرٹ رہݨ دا حکم ݙے ݙتا۔ ترجمان ایوان وزیر اعلیٰ موجب وزیراعلیٰ چھل دی صورتحال نال نبڑݨ کیتے امدادی ٹیماں کوں وختی متاثرہ علاقیں اچ متعین کرݨ، آبادی دے وختی انخلا کیتے مسیتاں اتے لاؤڈ سپیکر تے اعلانات، متاثرہ علاقیں دے شہریاں کوں ایس ایم ایس مسیج بھیج تے ݙساوݨ اتے متاثرہ علاقیں اچ مال ڈھور دی ویکسینیشن و علاج معالجے دی سہولت ݙیوݨ یقینی بݨاوݨ دا حکم ݙتا۔ ایویں پی ڈی ایم اے پنجاب انتظامیہ اتے اداریں کوں دریائے جہلم، چناب، راوی و ستلج نال لڳدے علاقیں اچ خصوصی انتظامات، دریائے ستلج نال لڳدے علاقیں اچ ریسکیو، انتظامیہ، پولیس و ݙوجھے محکمہ کوں ضروری اقدامات اتے دریاواں دے پاٹ اچ رہݨ آلیاں آبادیاں دا وختی انخلا یقینی بݨاوݨ دی ہدایت کیتی ڳئی اے۔ وزیراعلیٰ مریم نواز چھل متاثرین دے علاج معالجے کیتے کلینک آن ویل و فیلڈ ہسپتال متعین کرݨ اتے مال ڈھور دی وختی منتقلی کیتے پیشگی انتظامات کرݨ دا وی حکم ݙتے۔ وزیراعلیٰ آکھیے جو پی ڈی ایم اے پنجاب دے پیشگی الرٹس، ایس او پیز اتے ہدایت تے عمل درآمد یقینی بݨایا ونڄے۔ وزیراعلیٰ دی ہدایت تے شعبہ زراعت، آبپاشی، ہیلتھ، جنگلات، لائیو سٹاک، لوکل گورنمنٹ اتے محکمہ ٹرانسپورٹ الرٹ جاری کر ݙتے۔