صدر مملکت آصف علی زرداری کوں پنج ملکاں دے سفیراں سفارتی اسناد پیش کیتن

اسلام آباد۔22اگست(اے پی پی)صدر مملکت آصف علی زرداری وپار، معیشت اتے ثقافت دے شعبیاں اچ سری لنکا، انڈونیشیا، کرغزستان، آسٹریا اتے جرمنی نال ݙو طرفہ تعاون کوں ٻیا تکڑا بݨاوݨ تے زور ݙتے۔ ایوان صدر دے پریس ونگ توں جمعہ کوں جاری بیان دے مطابق صدر مملکت اے ڳالھ ایوانِ صدر اچ تھیوݨ آلی تقریب اچ سری لنکا دے ہائی کمشنر اتے انڈونیشیا، کرغزستان، آسٹریا اتے جرمنی دے سفیراں نال الیندے آکھی جنہاں صدر مملکت نال ملاقات کیتی اتے آپݨیاں سفارتی اسناد پیش کیتن۔ سری لنکا دے ہائی کمشنر ریئر ایڈمرل ایچ ایل اے ݙون فریڈ سینی ویرانٹے، انڈونیشیا دے سفیر/آسیان ملکاں دے چیئرمین چندرا وار سینانتو، کرغزستان دے سفیر کلیچ بیک سلطان، آسٹریا دے سفیر وولف گینگ اولیور کٹشیرا اتے جرمنی دی سفیر ائنا روتھ لوئس لیپل آپݨیاں اسناد سفارت صدر مملکت آصف علی زرداری کوں ݙتن۔

سفیراں دی آمد تے مسلح افواج دے ہک دستے انہاں کوں گارڈ آف آنر پیش کیتا۔ صدر مملکت ہائی کمشنر اتے سفیراں کوں انہاں دیاں نویں ذمے واریاں تے مبارکباد ݙتی اتے امید کیتی جو پاکستان اچ انہاں دا قیام ݙو طرفہ تعلقات کوں ٻیا ودھاوݨ اتے باہمی مفاد دے شعبیاں اچ تعاون ٹورݨ کیتے اہم ثابت تھیسی۔