وزیراعظم دی اڳواݨی اچ وفاقی کابینہ دا اجلاس، زرعی پیداواری لاگت گھٹ کرݨ کیتے کمیٹی ٻݨا ݙتی، خصوصی اقتصادی زونز قانون 2012 اچ ترمیم دی منظوری

اسلام آباد۔22اگست(اے پی پی)وزیراعظم محمد شہباز شریف دی سربراہی اچ وفاقی کابینہ زرعی پیداواری لاگت گھٹ کرݨ کیتے کمیٹی قائم کرݙتی اے جݙاں جو خصوصی اقتصادی زونز قانون 2012 اچ ترمیم دی اصولی منظوری ݙتی ڳئی اے۔ وزیراعظم محمد شہباز شریف دی اڳواݨی اچ وفاقی کابینہ دا اجلاس اسلام آباد اچ تھئے۔ اجلاس اچ وزیراعظم اتے وفاقی کابینہ ملک اچ مینھ اتے سیلاب اچ فوت تھیوݨ آلیاں کیتے خصوصی دعا منگی۔ وزیراعظم سیلاب نال متاثرہ علاقیاں دا دورہ کرݨ اتے ریسکیو و ریلیف اقدامات دی نگرانی کرݨ آلے کابینہ ارکان دا خصوصی شکریہ ادا کیتا۔ وفاقی کابینہ دے اجلاس اچ وزرات قومی غذائی تحفظ و تحقیق دی سفارش تے یوریا دیاں قیمتاں اچ توازن دے حوالے نال سفارشات پیش کیتاں ڳیاں۔ وزیراعظم آکھیا جو فصلآں دی پیداوار ودھاوݨ کیتے پیداواری لاگت کوں گھٹ کرݨا ہوسی۔ وزیراعظم ایں حوالے نال وزیر ماحولیاتی تبدیلی ڈاکٹر مصدق ملک، وزیر پٹرولیم علی پرویز ملک، وزیر قومی غذائی تحفظ رانا تنویر حسین، مشیر وزیراعظم محمد علی اتے معاون خصوصی صنعت ہارون اختر تے مشتمل کمیٹی بݨا ݙتی۔ وفاقی کابینہ کوں وزرات صنعت و پیداوار ولوں یوٹیلٹی سٹورز کارپوریشن دی تحلیل دی سمری منظوری کیتے پیش کیتی ڳئی جیںدی کابینہ متفقہ منظوری ݙے ݙتی۔ بیان دے مطابق “31 جولائی توں ملک بھر اچ یوٹیلٹی سٹورز دا آپریشن ختم کر ݙتا ڳئے، تحلیل سانڳے وزیراعظم دی ہدایت تے ملازماں دے حقوق دا مکمل خیال رکھیا ویسی، اتے وزیراعظم ایں عمل کوں شفاف طریقے نال حتمی شکل ݙیوݨ اتے ملازماں دے حقوق دے حوالے نال سارے قانونی ضابطے مکمل کرݨ دا آکھیے۔ وفاقی کابینہ ملکی صنعتی ترقی اتے نویں صنعتاں دے قیام دی حوصلہ افزائی کیتے خصوصی اقتصادی زونز قانون 2012 اچ ترمیم دی اصولی منظوری ݙے ݙتی، نویں ترمیماں دے تحت خصوصی اقتصادی زونز کوں ودھ کاروبار و سرمایہ کار دوست ماحول ݙتا ویسی جیںدے نال صنعتاں دی تعمیر دی رفتار ودھسی۔ وزیراعظم آکھیا جو ملکی صنعتی ترقی کیتے کاروبار و سرمایہ کار دوست ماحول وݙا اہم اے، ملکی معیشت مستحکم اتے ترقی دی راہ تے ٹردی پئی اے، صنعتاں دی تعمیر نال ملکی برآمدات اتے روزگار اچ ودھارا تھیسی۔ وفاقی کابینہ، کابینہ ڈویژن دی سفارش تے قومی اقتصادی کونسل دی مالی سال 2023-24 دی سالانہ رپورٹ کوں پارلیمنٹ دے سامݨے پیش کرݨ دی وی منظوری ݙتی۔ ایںدے علاوہ وفاقی کابینہ اقتصادی رابطہ کمیٹی (ای سی سی) دے 19 اگست 2025ء کوں تھیوݨ آلے اجلاس اتے کابینہ کمیٹی برائے قانون سازی کیسز (سی سی ایل سی) دے 18 اگست 2025ء دے اجلاس اچ کیتے ڳئے فیصلیاں دی وی توثیق کیتی۔