زراعت معیشت دی ریڑھ دی ہݙی، زرعی شعبے اچ سرمایہ کاری پاکستان کوں مضبوط بݨیسی، وزیراعظم دا پاکستانی طلباء کوں تربیت کیتے چین بھیجݨ سانڳے تقریب نال خطاب

اسلام آباد۔22اگست(اے پی پی)وزیراعظم محمد شہباز شریف زراعت کوں پاکستانی معیشت دی ریڑھ دی ہݙی قرار ݙیندے آکھیے جو زرعی شعبے اچ سرمایہ کاری پاکستان کوں مضبوط بݨیسی، قرضیاں توں نجات ملسی، لائیو سٹاک اتے زراعت دے شعبے اچ چین دی مہارت، تجربیاں اتے ٹیکنالوجی توں فائدہ گھنسوں، ترقی دی کنجی نینگراں دے ہتھ اچ اے۔ اے ڳالھ انہاں زرعی شعبے اچ 300 مزید پاکستانی طلباء کوں تربیت کیتے چین بھیجݨ بارے تقریب نال خطاب اچ آکھی۔ ایں موقع تے چین دے سفیر جیانگ زائیڈونگ، وفاقی وزیر فوڈ سکیورٹی رانا تنویر حسین، وزیراعظم دے معاونین خصوصی، مشیر اتے زرعی شعبے دے گریجویٹس دے علاوہ متعلقہ وزارتاں دے حکام وی موجود ہن۔ وزیراعظم آکھیا جو زرعی شعبے دے مزید 300 گریجویٹس کوں چین اچ اُچے معیار دی زرعی تربیت کیتے بھیجیا ویندا پئے، انہاں طلباء دا چݨائو میرٹ تے شفاف طریقہ نال کیتا ڳئے۔ انہاں پاکستانی گریجویٹس کوں چین اچ عملی تربیت دا موقع ݙیوݨ تے چین دی حکومت اتے پاکستان اچ چینی سفیر دا شکریہ ادا کیتا۔ وزیراعظم آکھیا جو اے سفر میݙے دورہ چین توں شروع تھیا ہئی، جݙاں میں اتھاں زرعی یونیورسٹی دا دورہ کیتا اتے اعلیٰ معیار دی تعلیم اتے عملی تربیت توں ٻہوں متاثر تھیاں، ݙوجھے ملکاں دے کئی طلباء وی چین اچ زرعی تربیت ڳھندے پئے ہن، میں سوچیا جو پاکستان توں وی زرعی شعبے دے نینگراں کوں تربیت کیتے چین بھیڄیا ونڄے تاں اے جدید تکنیک اتے ٹیکنالوجی پاکستان اچ وی آوے اتے اساݙا زرعی شعبہ ترقی کر سڳے۔ وزیراعظم آکھیا جو پاکستان ہک زرعی ملک اے، زراعت ساݙی معیشت اچ ریڑھ دی ہݙی دی حیثیت رکھیندی اے جیندے اچ سرمایہ کاری نال پاکستان دی معیشت مضبوط تھیسی۔ وزیراعظم زرعی شعبے اچ جدید طریقیاں اتے مشینری دے استعمال توں فائدہ گھنݨ دی لوڑھ تے زور ݙیندے آکھیا جو 300 زرعی گریجویٹس چین اچ تربیت مکمل کر تے واپس آ چُکین، ݙوڄھے مرحلے اچ 300 مزید طلباء کوں بھیڄیا ویندا پئے۔ انہاں چین ونڄݨ آلے طلباء کوں نصیحت کیتی جو او چین اچ پاکستان دی بہترین نمائندگی کرن اتے جدید مہارتاں کوں سکھݨ تے توجہ ݙیون، سانجھے طلباء اتے استاداں نال رابطے بݨاون۔ وزیراعظم آکھیا جو چین پاکستان دا سَب توں آزمودہ دوست اے اتے او مشکل دی ہر گھڑی اتے آزمائش اچ پاکستان دا ہتھ ونݙیندے، چین بھیجے ونجݨ آلے زرعی گریجویٹس کوں صرف اتے صرف میرٹ تے شفاف طریقہ کار دے تحت چارے صوبیاں توں چݨیا ڳئے، گلگت بلتستان اتے آزاد کشمیر توں وی زرعی گریجویٹس کوں بھیڄیا ویندا پئے، بلوچستان دا کوٹہ انہاں دی آبادی دے تناسب نال 10 فیصد زیادہ رکھیا ڳئے تاں جو بلوچستان ترقی دی دروک اچ باقی صوبیاں دے ساویں تھی سڳے، ہونہار طلباء و طالبات کوں میرٹ تے لیپ ٹاپس ݙتے ویسن، ایںدے اچ وی بلوچستان دا حصہ 10 فیصد زیادہ رکھیا ڳئے، ملک بھر دے ہونہار زرعی گریجویٹس چین اچ تربیت مکمل کرݨ دے بعد پاکستان اچ آ تے خدمتاں ݙیسن، ڄیکر میرٹ کوں ہر شعبے اچ لاگو کر ݙتا ونڄے تاں پاکستان کڄھ سالاں اچ ایں مقام تے پڄ ویسی جیڑھا قیام پاکستان دا مقصد ہئی، ساکوں میرٹ، سخت محنت، امانت اتے دیانت کوں آپݨا شعار بݨاوݨا ہوسی۔ وزیراعظم یاد ݙوایا جو پاکستان کیتے لکھاں لوکاں ٻھا اتے رت دے دریا پار کیتن، آپݨیاں جاناں دے نذرانے پیش کیتن ٻھل اے او پاکستان نئیں جئیں کیتے لوکاں قربانیاں ݙتیاں، اساں کوں محنت، امانت اتے دیانت اپناوݨی ہوسی جو اساں ترقی دی دروک اچ ٻئے ملکاں دے کٹھے رل سڳوں۔ وزیراعظم زرعی گریجویٹس تے زور ݙتا جو “چین توں کاٹن دے ہائبرڈ بیج دی ٹیکنالوجی حاصل کرن تاں جو کاٹن دی پیداوار جو کݙاہیں 14 ملین ہئی اتے اڄ 4 ملین تے آ ڳئی اے، ایںدے اچ اساں بہتری گھن آ سڳوں۔ وزیراعظم آکھیا جو لائیو سٹاک اتے زرعی شعبے اچ اصلاحات نال اساں ترقی کر سڳدے ہیں۔ انہاں آکھیا جو او شنگھائی تعاون تنظیم دے اجلاس اچ شرکت کیتے چین ویسن جتھاں انہاں دیاں ݙو طرفہ ملاقاتاں تھیسن اتے ایںدے علاوہ وی کئی ایونٹس اچ شریک تھیسن۔ انہاں آکھیا جو میݙا مقصد سرمایہ کاری، جدید علوم اتے ٹیکنالوجی گھن تے آوݨ اے۔ انہاں طلباء تے زور ݙتا جو او مستقبل دے معمار بݨن تاں جو ملک کوں قرضیاں توں نجات ملے اتے اساں آپݨے وسیلے استعمال اچ گھن آ تے دولت پیدا کر سڳوں۔ وزیراعظم آکھیا جو ترقی دی کنجی نینگراں دے ہتھ اچ اے، اساݙا مستقبل روشن اے، زرعی شعبے کیتے جو وی وسیلے لوڑھ ہوسن، او ݙیسوں۔ ایں توں پہلے چینی سفیر جیانگ زائیڈونگ وی تقریب نال خطاب کیتے۔ ایں موقع تے وزیر غذائی تحفظ رانا تنویر حسین اتے تربیت کیتے چین ونڄݨ آلے زرعی گریجویٹس وی خطاب کیتا۔ چھیکڑ تے چینی سفیر جیانگ زائیڈونگ تقریب دے دوران وزیراعظم کوں پاکستان دے سیلاب متاثرین کیتے چیک وی ݙتا۔