مینھ دا 8 واں سپیل 27 اگست تئیں جاری رہݨ دا امکان اے، ترجمان پی ڈی ایم اے

لاہور۔23اگست (اے پی پی) پنجاب دے ٻہوں سارے ضلعیں اچ ساوݨ مینھ دی پیشگوئی، مینھ دا 8 واں سپیل 27 اگست تئیں جاری رہݨ دا امکان اے۔ ترجمان پی ڈی ایم اے موجب ساوݨ مینھ دا 8 واں سپیل 27 اگست تئیں جاری رہسی اتے ایں دوران پنجاب دے ٻہوں سارے ضلعیں لاہور، قصور، شیخوپورہ، سیالکوٹ، نارووال، میانوالی، خوشاب، سرگودھا، جھنگ، ننکانہ، ٹوبہ ٹیک سنگھ، دیرہ غازی خان، بھکر، لیہ، ملتان، بہاولپور، بہاولنگر، راجن پور، رحیم یارخان، راولپنڈی، مری گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد اتے وزیرآباد اچ مینھ دی پیشگوئی اے۔ ڈی جی پی ڈی ایم اے عرفان علی کاٹھیا آکھیے جو وزیراعلیٰ پنجاب دی ہدایت موجب صوبے دی انتظامیہ کوں الرٹ جاری کر ݙتا ڳئے۔ ہنگامی صورتحال نال نبڑݨ کیتے متعلقہ محکمے الرٹ رہن۔ پی ڈی ایم اے کنٹرول روم اچ صورتحال دی مانیٹرنگ مسلسل جاری اے۔ عرفان علی کاٹھیا ہدایت کیتی جو 1122 اتے واسا سودھے ݙوجھے ریسکیو ادارے مشینری سودھے عملے کوں الرٹ رکھن اتے تلویں علاقیں توں پاݨی کڈھݨ کوں وختی ممکن بݨاون۔ انہاں آکھیے جو اُتلے علاقیں اچ مینھ پاروں دریاواں دے رہݨ اچ غیر معمولی ودھارے دا ݙر اے۔ انہاں آکھیا جو دریائے ستلج اچ اُچے درجے دی چھل اتے پاݨی دی سطح 21 فٹ اے، دریائے ستلج اچ گنڈا سنگھ والا دی جاہ تے پاݨی دا وہݨ 1 لکھ 29 ہزار کیوسک اے جݙاں جو بھارت ولوں مزید پاݨی چھوڑئے ونجݨ دا ݙر اے۔ ڈی جی عرفان علی کاٹھیا آکھیے جو دریائے ستلج نال جُڑئے ضلعیں دی انتظامیہ کوں ہائی الرٹ کر ݙتا ڳئے۔ ڈپٹی کمشنرز دریاواں دے پاٹ اچ موجود شہریاں دے انخلا کوں یقینی بݨاون، چھل توں متاثرہ علاقیں اچ فلڈ ریلیف کیمپس بݨا ݙتے ڳئن۔ شہری انتظامیہ نال تعاون کرن، وختی محفوظ جاہ تے تے منتقل تھی ونڄن، آپݨی اتے گھرآلیں دی حفاظت کوں پہلی ترجیح ݙیون۔ ڈی جی پی ڈی ایم اے آکھیے جو مال ڈھور اتے ضروری سامان کوں محفوظ جاہ تے منتقل کر ݙیون۔