اڳوں ودھݨ دا ہکو رستہ “مذاکرات” ہن، پی ٹی آئی اتحادی جماعتاں دا متفقہ وژن اپناوے، وفاقی وزیر قیصر احمد شیخ

اسلام آباد۔24اگست (اے پی پی) وفاقی وزیر سرمایہ کاری بورڈ قیصر احمد شیخ پی ٹی آئی کوں مذاکرات اچ شامل تھیوݨ دا مشورہ ݙیندیں پی پی پی اتے مسلم لیگ (ن) ولوں آپسی سمجھداری دے ذریعے چیلنجز نال نبڑݨ دے عمل دی تعریف کیتی اے۔ آپݨے ہک خصوصی انٹرویو اچ قیصر احمد شیخ پی ٹی آئی تے زور ݙتا جو او محاذ آرائی دی بجائے ملک دے استحکام اتے ترقی کوں یقینی بݨاوݨ کیتے باقاعدہ ڳالھ مہاڑ اچ حصہ گھنے۔ انہاں نشاندہی کیتی جو اتحادی جماعتاں خاص طور تے پی پی پی اتے مسلم لیگ (ن) دا سانجھا وژن پیچیدہ سیاسی مسئلیں کوں حل کرݨ اچ موثر رہیے۔ انہاں زور ݙتا جو اجتماعی نقطہ نظر قومی خدشات کوں دور کرݨ اتے جاری سیاسی تعطل تے قابو پاوݨ کیتے ٻہوں اہم اے۔ قیصر احمد شیخ پی ٹی آئی تے زور ݙتا جو او متحد وژن دے نال ہم آہنگ تھیوے۔ انہاں سارے فریقاں تے زور ݙتا جو او قوم دی وݙی بھلائی کیتے ڳالھ مہاڑ اتے تعاون کوں پہلی ترجیح ݙیون۔ ہک سوال دے جواب اچ قیصر احمد شیخ آکھیا جو پی پی پی پہلے پی ٹی آئی کوں تعاون دی تجویز ݙتی ہئی لیکن ہݨ پی ٹی آئی دے غرور تے مبنی ردعمل دی وجہ نال ایں پیشکش تے افسوس اے، پی ٹی آئی دا رویہ جمہوری اصولاں توں متصادم اے۔ انہاں مزید آکھیا جو پیپلز پارٹی اتے مسلم لیگ ن آپسی سمجھداری نال کم کریندے پئن۔ ضمنی انتخابات دے حوالے نال ڳالھ کریندیں قیصر احمد شیخ آکھیا جو پیپلز پارٹی اتے مسلم لیگ (ن) اتحادی جماعتاں دی حیثیت نال اڳوں ودھݨ دا اجتماعی فیصلہ کیتے۔ انہاں ایں ڳالھ تے زور ݙتا جو کوئی وی حکمت عملی آپسی سمجھداری اتے ݙوہیں جماعتاں دے سانجھے اہداف تے مبنی ہوسی۔ جݙاں قیصر احمد شیخ توں صوبائی امور دے بارے اچ پچھیا ڳیا تاں انہاں غربت دی لکیر توں تلے زندگی گزارݨ آلے پنجاہ فیصد لوکاں دی مدد کیتے اقدامات دی بھرپور حمایت دا اظہار کیتا۔ انہاں واضح کیتا جو میں ذاتی طور تے ایں مسئلے کوں حل کرݨ آلے کہیں وی اقدام دی حمایت کرینداں۔ انہاں مزید آکھیا جو صوبیں دیاں لوڑھاں کوں پورا کرݨ ویلھے دی اہم لوڑھ اے۔