وفاقی وزیر داخلہ محسن نقوی دی رائے ونڈ اچ بین الاقوامی تبلیغی اجتماع کیتے مکمل تعاون دا یقین

اسلام آباد۔24اگست (اے پی پی) وفاقی وزیر داخلہ محسن نقوی تبلیغی مرکز رائے ونڈ دا دورہ کیتا اتے تبلیغی جماعت دے وݙکیاں مولانا محمد احمد بٹلر، مولانا عبید اللہ خورشید، ڈاکٹر سلیم اتے ݙوجھے نال ملاقات کیتی۔ ایں موقع تے انور غنی، میاں احسن، ڈاکٹر ندیم اشرف، مولانا عامر احسان، مولانا امجد فاروق، شبیر احمد عثمانی، مفتی عرفان اتے بریگیڈیئر (ر) مصدق وی موجود ہن۔ وزارت داخلہ موجب تبلیغی جماعت دے وݙکیاں وزیر داخلہ کوں نومبر اچ تھیوݨ آلے عالمی تبلیغی اجتماع دے انتظامات دا ݙسایا ۔ محسن نقوی تبلیغی جماعت دے وݙکیاں دی اسلام کیتے خدمتاں دی تعریف کیتی اتے اجتماع اچ شرکت کرݨ آلے غیر ملکی وفداں کوں سہولت ݙیوݨ کیتے مکمل تعاون دا یقین ݙیوائے۔ انہاں آکھیے جو جتھاں کہیں وی ویزا متعلق کوئی مسئلہ ہوسی اساں ایں کوں پہلی ترجیح تے حل کریسوں، اجتماع اچ ٻاہرلے ملک توں آوݨ آلے وفد اساݙے معزز مہمان ہن، انہاں کیتے ہر سطح تے ہر ممکن سہولت کوں یقینی بݨایا ویسی۔ وزیر داخلہ مزید آکھیے جو میں ہر سال تبلیغی اجتماع اچ باقاعدگی نال شرکت کرینداں اتے انشاء اللہ ایں سال وی شرکت کریساں۔ انہاں دعا منگی جو اللہ تعالیٰ اجتماع دے منتظمین کوں ایں چنڳے کم کوں جاری رکھݨ دا اجر عطا فرماوے۔ مولانا محمد احمد بٹلر آکھیا جو ساریں کوں اللہ تعالیٰ دے پاسے ونڄݨا ، اساں کوں اسلام اتے انسانیت دی خدمت کوں آپݨا مشن بݨاوݨا چاہیدے، حقیقی کامیابی اللہ تعالیٰ دے ݙسائے ہوئے رستے تے چلݨ اچ اے۔